KXCP Ali Məclisinin sədri Bəybala Əbil hazırda həbsdə olan hüquq müdafiəçisi, tanınmış vəkil, Hüquq Maarifçiliyi Cəmiyyətinin rəhbəri İntiqam Əliyevi doğum günü münasibəti ilə təbrik edib.

Doğum gününüzü təbrik edirəm Intiqam bəy.

Dünyada tanınmış hüquq müdafiəçisi, çoxsaylı yetişdirmələri olan Müəllim, Vətəndaş, Ziyalı, əqidəli mübariz, hüquqi dövlət və demokratik cəmiyyət fədaisi kimi bütövlükdə cəmiyyətimizin Sizdən ehtiyacı olan bir vaxtda, həyatınızın əlamətdar gününü zindanda keçirməyinizdən üzülür, tezliklə azadlığa çıxmağınızı arzulayırıq.

Fəlakətlər rejiminin ölkədə yaratdığı çoxsaylı problemlərlə mübarizədə uğur qazanmış az saylı sahələrdən birinin yönətməni olaraq məktəb yaratmısınız. Hüquq, Haqq, Ədalət və İntiqam məktəbi. Bu məktəbin fəaliyyəti bir daha göstərir ki, dayanıqlı müstəqillik və oturuşmuş demokratik cəmiyyət uğrunda hər cür mübarizənin uğurlu yolu hüquq müstəvisindən keçir. Rəhbərlik etdiyiniz Hüquq Maarifçiliyi Cəmiyyəti hüququn yalnız görsənti olduğu, ədalətdən əsər əlamətin qalmadığı bir zamanda, bütün hakimiyyətin bir əldə toplandığı, hətta yerli hakimiyyət və “dördüncü hakimiyyəti”n (medianın) tam nəzarətdə saxlanıldığı bir ölkədə hüquq müstəvisində mübarizə aparmağın mümkünlüyünü sübut etdi.

Azadlıqda hər şeydən əlləri üzülən insanlara verdiyiniz ümidi, gəncliyi hərəkətə gətirən pozitiv enerjinizi, hakimiyyətə yarıyan həmkarlarınıza yaşatdığınız xəcaləti, qayğılarınızı, sağlamlığınızı həbsə alanlar, xəyallarınıza, düşüncələrinizə, yaradıcı təfəkkürünüzə, qürurunuza, inamınıza, əqidənizə və mübariz əhval-ruhiyyənizə qadağa qoya bilməzlər İntiqam bəy.

Siz həmişə, hər yerdə və hər cür şəraitdə mücadilə verməyi bacaran insansınız, İntiqam bəy. Ən yüksək instansiyalarda hüquqlarını qoruduğunuz vətəndaşlar, hüquqi dövlət və demokratik cəmiyyət qurucusu gənclik, cəmiyyətimiz və bütövlükdə demokratik dünya Sizin azad olmağınızı gözləyir. Özünüzü qoruyun. İnanırıq ki, tezliklə həbsdə olan bütün vicdan məhbusları ilə birlikdə azadlığa çıxacaqsınız.

Ad gününüz və qəzanız mübarək İntiqam bəy.

Allah köməyiniz olsun.



Bəybala Əbil .