İsmayıllıdakı “İsma Bikes” velosiped zavodu müəmmalı şəkildə fəaliyyətini dayandırdı; 7 milyona tikilən müəssisə ölkə başçısı gedər-getməz qıfıllandı


Mirdaməd Sadıqova sadiq tender firmalarının milyonluq maxinasiyaları, başçı ilə əlbir nazir qardaşının maliyyə xəyanətləri barədə sensasion faktlar “Gündəm-xəbər”də...

İcra başçısı İsmayıllıda prezidentin açılışını etdiyi zavodu bağladı. “Gündəm-xəbər”in verdiyi məlumata görə, bu barədə sosial şəbəkələrdə hüquq müdafiəçisi Oqtay Gülalıyev xəbər yayıb.

Məlumatda deyilir ki, yeni açılmış zavod fəaliyyətini dayandırıb. Rayondan Hazırda “İsma Bikes” velosiped zavodu işləmir.Halbuki, həmin zavodun açılışında dövlət başçısı İlham Əliyev də iştirak edib, hətta velosiped sürüb.



İşsizliyə dəstək verən başçı

Bildirilib ki, bu il 50 nəfərin, gələn il 100 nəfərin işləyəcəyi zavodda Bolqarıstanla birlikdə Azərbaycanda müasir standartlara uyğun velosiped, əlil arabaları və s. istehsal olunacağı nəzərdə tutulub.

Həmçinin, velotreklər salınması və idman yarışları keçirilməsi planlaşdırılır. Zavodun inşası üçün 7 milyon manat vəsaitin xərcləndiyi bildirilir. Amma açılışından bir ay keçməmiş zavod fəaliyyətini dayandırıb.

Bunun səbəbi isə bəlli deyil. Yerli sakinlərdən biri idida edib ki, açılışında nümayiş olunan velosipedlər də bu zavodda istehsal olunmayıb, kənardan gətirilib.

Zavodun fəaliyyətinin dayandırılması nə ilə əlaqədar olduğu bilinməsə də, İsmayıllının icra başçısı Mirdaməd Sadıqov üçün biabırçı hadisədir.

Ölkə başçısının açılışında iştirak etdiyi və böhranın dərinləşdiyi vaxtda iş yerləri açılmasına dəstək verdiyi zamanda M.Sadıqovun rəhbəri olduğu rayonda zavod çox çəkmir ki bağlanır.

Bu məqalə hazırlandığı saata qədər rayon rəsmilərindən kimsə zavodun bağlanması haqda açıqlama verməmişdi və izah edilməmişdi ki səbəb nə ola bilər. Belə laqeyd və etinasız münasibət icra başçısının məsələyə yanaşmasından qaynaqlanır.

Xeyli sayda adamın işlədiyi zavodun açılar-açılmaz bağlanması rayonda iqtisadi vəziyyətə, sənayenin inkişafına vurulan zərbədir.

İcra hakimiyyəti başçısı isə milyonlar bahasına başa gələn zavodun qapılarını qıfıllayıb işləksiz quruma çevirir. Halbuki ixtisasca iqtisadçı olan M.Sadıqov zavodun işləməsinin rayon üçün nə dərəcədə əhəmiyyətli olduğunu bilməlidir.



Ələkbərovlar yoluna qayıdış

Rayona rəhbər gəldiyi gündən müsbət imic qazanmağa çalışan və Ələkbərovların qoyduğu problemləri həll etməyə can atan icra başçısı sonra işləri yarımçıq saxladı.

Məlum oldu ki, onun da başı maliyyə yeyintilərinə, biznesini qurmağa qarışıb. Mirdaməd Sadıqov son 2 ildə xeyli dəyişib və Ələkbərovların rayonda qurduğu çirkli biznesi davam etdirməyə qərar verib.

Məsələn, “İsmayıllı Tikinti-27” ASC-nin sədri Məhəbbət Əliyeva adlı şəxs olsa da, əslində bu qurumun arxasında başqaları, yəni, Sadıqovun əlbir olduğu tikinti mafiyası dayanır.

Mirdaməd Sadıqovun tikinti sektorunda maxinasiyalar aparması və rayondakı işbazlarla əlbir olaraq büdcədən külli miqdarda vəsait «yeməsi» barədə iddialar var.

Belə ki, Nizami Ələkbərovun vaxtında bir çox dövlət sifarişlərini icra edən, ənənəvi «tender qalibi» kimi tanınan, eyni zamanda sabiq icra başçısının oğlu Vüqar Ələkbərovun şirkəti olaraq bilinən «VAFİ-Region» MMC şirkətinin «qabaqcıl» yerini indi «İsmayıllı Tikinti – 27» ASC tutub.

Mediada yayılan məlumatlarda deyilir ki, M.Sadıqovun «etibarlı» şirkəti kimi tanınan bu şirkət də «VAFİ-Region» MMC ilə eyni ünvanda qeydiyyatdadır.

Sadıqova sadiq tender şirkətləri - Siyahı

Lakin bundan əvvəl də mətbuatın araşdırmaları nəticəsində məlum olmuşdu ki, bu ünvanda, yəni M.Orucov-100 ünvanında Ruhiya Cavadova adlı vətəndaş yaşayır.

Heç bir şirkətlə əlaqəsi yoxdur. “İsmayıllı Tikinti-27” ASC yeni icra başçısının vaxtında bir çox dövlət layihəsinin icraçısı olub, 1 milyon manatdan çox büdcə vəsaitinin mənimsənilməsində iştirak edib.

Həmçinin Sadıqovun sevimli «icraçı»ları arasında «Ağçay-48» və «ÜlviMİ» adlı MMC-lərin də adı çəkilir. Bu şirkətlərin hər ikisinin hüquqi ünvanı rəsmi sənədlərdə eyni ünvan - Aslanov küçəsi 17 göstərilib.

Rayonda «siyam əkizləri» kimi yada salınan bu şirkətlər İsmayıllı şəhərində və kəndlərdə bağçaların, körpələr evlərinin tikintisi və əsaslı təmirinə cəlb olunur, müxtəlif «abadlaşdırma» layihələrinin əsas oyunçusuna çevrilirlər.

Görünür ki, bu şirkətlər ya Sadıqovun yaxın çevrəsinə məxsusdur, ya da yeni icra başçısı rayona «adaptasiya» olmaq məqsədi ilə bəzi şəxslərin «biznes»inə yol açmağa qərar verib.

Ancaq «N-L» MMC (rəhbəri Rafiq Dadaşov) ilə görülür ki, bu da, açıq-aşkar «otkat» əməliyyatından xəbər verir. Mənbə bildirir ki, başqa rayonlardan olan, xüsusilə də, qaçqın və məcburi köçkünlərin rayonda hər hansı biznes fəaliyyəti yaratmasına imkan verilmir. Hətta RİH başçısı özü də dəfələrlə «gəlmələr» ifadəsi işlədərək, qaçqın və məcburi köçkünlərə qarşı ögey yanaşma nümayiş etdirir.

Mahmudova tikdiyi villaya nəzarət

M.Sadıqov maxinasiyalarına görə diqqət mərkəzində olub. Onun fəaliyyəti Eldar Mahmudov şəbəkəsi tərəfindən xüsusi izlənilib.

Özünü sığortalamaq üçün İsmayıllının icra başçısı eks-nazirə bahalı hədiyyələrin bağışlanması ilə vəziyyətdən çıxmaq istəyib.

Keçmiş MTN şefinin hörmətini qazanmaq istəyən İsmayıllının icra başçısı bunun yolunu ona bahalı hədiyyə etməkdə görüb.

Belə ki, Mirdaməd Sadıqov İsmayıllının görməli yerlərinin birində 1.5 hektar ərazidə dəyəri 3 milyon manata yaxın olan villa tikdirib və eks-nazirə hədiyyə edib. Maraqlısı da budur ki, hədiyyə Eldar Mahmudovun doğum gününə təsadüf edib.

Bununla icra başçısı həm özünü sığortalamaq, həm də ölkənin əsas adamlarından hesab olunan nazirinin yanında hörmət qazanmaq istəyib. Bu məlumatı artıq media yayıb və yuxarı dairələrdən icra başçısına xərdarlıq edilib ki həmin villaya nəzarət etsin.

İcra başçısı bunu ona görə edib ki Tağı Əhmədov kimi Çovdarova 3 milyon verməyə məcbur olmasın. Görünür, istəyinə çatıb. Amma məsələdən xəbər tutan mərkəzi dairələr ona töhmət verməsə də, həmin villanın Mahmudovdan alınması mümkündür.

Nazir qardaşı ilə başçının maxinasiyaları

Rayonda sanki hansısa böyük güc sahibi açıqca özbaşınalıq mühiti yaradıb. Rayonun büdcəsindəki maliyyə vəsaitləri lazımsız layihələr üçün sərf edilərək silinir.

Maliyyə idarəsi şişirtmə rəqəmlərlə, idarə-müəssisələrə yumuşaq inventar, bərk inventar adıyla xeyli yeyintiləri həyata keçirir. Rayon mərkəzində və kənd, qəsəbələrdəki uşaq bağçalarına ayrılan maliyyə vəsaitlərində mənimsəmələr və faiz dərəcələri tətbiq edilir.

Rayonun təhsil şöbəsi ilə birlikdə xeyli maliyyə pozuntularına yol verilir.Belə ki,məktəblərə qış mövsümündə ayrılan dizel yanacağı məsələsində xeyli qanun pozuntuları mövcuddur.

Rayon maliyyə idarəsi bir neçə uşaq bağçası və sair tikilini həyata keçirmək,əsaslı təmir və sair işləri özlərinə yaxın şəxslərin adına rəsmiləşdirdikləri MMC-lər vasitəsi ilə həyata keçirir ki,burada da böyük maliyyə maxinasiyaları var.

Rayon ərazisindəki dəftərxanalara ayrılan vəsaitlər məhz maliyyə idarəsindən şəxsi maraqlar üçün ayrılır.

Rayonda gecələr əksər işıqlandırma sistemləri söndürüldüyünə baxmayaraq 3500-4000 arasında elektrik lampası üçün pul silinir. Rayon mərkəzi xəstəxanası ilə yeyintilər birgə həyata keçirilir.

İynə-dərman ləvazimatları,ərzaq məhsulları və sairlər üçün ayrılan vəsaitlərin bir qismi maliyyə nazirliyinin payı adı ilə geri qaytarılaraq mənimsənilir.

Ötən il rayon təhsil şöbəsində böyük yeyinti və qanun pozuntularının üzə çıxmasına baxmayaraq, maliyyə şöbəsinin müdiri Radim Müslümovun və qardaşı əhalinin sosial müdafiəsi və inkişafı naziri Səlim Müslümovun köməkliyi ilə bu fakt ört-basdır olundu.

Bu məsələdə maliyyə nazirliyinin əməkdaşları külli miqdarda rüşvət alaraq rayondan heç nə olmamış kimi getdilər. Bu ilin ortalarında maliyyə nazirliyi yenidən rayon səhiyyəsini yoxladı və burada da külli miqdarda yeyinti faktları aşkarlandı.Yenə ört-basdır olundu.

Hesablama Palatası hara baxır?

İsmayıllıda maliyyə pozuntularının cücərdiyi instansiya maliyyə idarəsidir. Burada əsas fiqur müdir və baş mühasib Rəsul Baxışovu və sairlərini göstərmək olar. Maliyyə idarəsində büdcəni ustalıqla həzm edən bir şəbəkə illərdir ki,formalaşaraq fəaliyyət göstərir.

Heç bir əsas göstərmədən idarələr üçün ayrılmış vəsaitlərdən faiz tələb olunur.Başa düşə bilmirik ki,bu faizlər kimlərin cibinə axır. Maliyyə idarəsində həyata keçirilən qaranlıq məqamlardan rayon rəhbərliyinin xəbəri yoxdur deyimi olduqca gülünc səslənir.

Çünki icra başçısı hörmətli Mirdamət Sadıqov maliyyəçi alimdir.Onun gözündən hansısa mətləblərin yayınması heç bir halda inandırıcı görünə bilməz. Mirdamət Sadıqov və maliyyə idarəsinin müdiri hörmətli Radim Müslümov yaxın qohumdurlar.

Radim müəllimi İsmayıllıya Mirdamət müəllim gətizdirib. Hesablama palatası əgər işində və irəli sürdüyü təkliflərdə səmimidirsə onda nədən İsmayıllı rayonundakı büdcə talançılığına göz yumur? Yaxud palata imkan varsa ictimaiyyət üçün açıqlasın görək İsmayıllı ilə bağlı yoxlamaların həyata keçirilməsinə kim maneçilik edir?

Bütün bu faktlar zavod bağlanan İsmayıllıda baş verib. Maraqlıdır ki heç bir reaksiya da yoxdur. Buna baxmayaraq, iddialar və ittihamlarla bağlı eç bir qərəz olmadan hörmətli M.Sadıqovun mövqeyini dinləməyə hazırıq.

Rafiq Qara
gundemxeber.az