Nazirin sinif yoldaşı Gəncəbasarda “at oynadır”
Əvvəllər "Mars" şokalatı istehsal edən şirkətdə “ekspeditel”, az sonra Gəncədə "Hundau"firmasının satış dükanında satıçı işləyən bu şəxs, çox keçmir ki, Gəncə şəhər 1 saylı Peşə Liseyinə direktor da təyin olunur
Məlum olduğu kimi Azərbaycan Respublikası Təhsil Nazirliyinin ərazi maliyyə hesablaşma mərkəzləri, Azərbaycan Respublikası Prezidentinin “Azərbaycan Respublikasının 2016-cı il dövlət büdcəsi haqqında”, “Azərbaycan Respublikası Qanununun tətbiqi barədə” 07 dekabr 2015-ci il tarixli 698 nömrəli Fərmanının icrasının təmin edilməsi ilə əlaqədar yaradılmışdır. Bundan sonra aidiyyətı olaraq şəhər və rayonlar üzrə təhsil şöbələrinin mərkəzləşdirilmiş mühasibatlıqları və təsərrüfat qrupları, Təhsil Nazirliyinin müvafiq ərazi maliyyə hesablaşma mərkəzlərinin tabeliyinə verilmişdir. O cümlədən də Gəncədə 8 saylı hesablaşma mərkəzi yaradıldığından, Gəncə, Naftalan, Samux, Göygöl, Goranboy, Kəlbəcər və Xocalı rayonlarının təhsil şöbələrinin maliyyə işləri, həmin mərkəz tərəfindən idarə olunur. Mərkəz yaranan kimi həmin mərkəzdəki hesab-kitab işlərini və Gəncəbasarda adı çəkilən rayonların təhsil ocaqlarını demək olar ki, bir şəxs, yəni 8 saylı hesablaşma mərkəzinin rəisi müavini, özünü ictimaiyyətə gah təhsil naziri Mikayıl Cabbarovun sinif yoldaşı, gah qrup yoldaşı, gah da uşaqlıq dostu hesab etdiyi Vüsal Məmmədov idarə edir.
Hal-hazırda Ərazi Maliyyə Hesablaşma Mərkəzində qalmaqal yaşanır. Yəni, Vüsal Məmmədov hesablaşma mərkəzinin rəisini istefaya göndərdiyindən, o, özünü rəis elan edib. “Gündəm Xəbər”ə daxil olan başqa bir məlumatda bildirilir ki, rəisin istefa verməsinə, məhz Vüsal Məmmədovun “işbazlığı”na qol qoymaması səbəb olub.
Mərkəzdə yaşanan qalmaqallarla bağlı Maliyyə Hesablaşma Mərkəzinin rəis müavini Vüsal Məmmədovla görüşdükdə o, bildirdi ki, "biz pul qazanmağı bacaran oğlanlarıq, rəis cox hoppanıb düşdüyünə görə, onu işdən cıxartdım". Xatırladaq ki, maliyyə sektoru yaranandan təhsil naziri Mikayıl Cabbarovun dostu kimi tanınan və rəis müavini işləyən Vüsal Məmmədov bildirir ki, “mən Təfəkkür Universitetini bitirdiyimdən ali təhsilli hüquqşünasam”. Əvvəllər "Mars" şokalatı istehsal edən şirkətdə “ekspeditel”, az sonra Gəncədə "Hundau"firmasının satış dükanında satıçı işləyən bu şəxs, Mikayıl Cabbarovun nazir təyinatından sonra, birbaşa Gəncə şəhər 1 saylı Peşə Liseyinə direktor təyin olunur. Hesablaşma mərkəzi fəaliyyətə başladıqdan sonra rəis müavini təyin olunsa da, hal-hazırda regionun kadr siyasətində onluqdadır . Əldə olunan məlumatlarda o da bildirilir ki, pul qazanmağı bacaran bu şəxs hal-hazırda 1 saylı Peşə Liseyini idarəetməklə bərabər, eyni zamanda regionun yuxarıda adı gedən təchizat məsələlərini də təkbaşına kağız üzərində həyata keçirməkdən belə çəkinmir. Necə deyərlər "kəndxudanı gör, kəndi çap". Daha ətraflı növbəti sayımızda.
Mehriban Əzizqızı