“Gündəm Xəbər” qəzetinin redaksiyasına Zaqatala rayonu Car kənd sakini Hacıbəy İsak oğlu Zaqatalski tərəfindən şikayət ərizəsi daxil olub. O, eyni zamanda üz-üzə qaldığı problemlərin varlığını, Azərbaycan Respublikası yanında Apelliyasiya Şurasının sədri cənab Eldar Nuriyevə də ünvanlayır və bildirir ki, “mən Azərbaycan vətəndaşıyam, 2-ci qrup əliləm, hal-hazırda da 68 yaşım var. Bundan əlavə, YAP-nın üzvüyəm. Ölkəmizdə kooperativ hərəkatına qoşulan və sahibkarlıq fəaliyyəti ilə məşğul olan ilk sahibkarlardanam. İxtisasım tütünçüdür və RF-nın Moskva şəhərində, İtaliyanın Turin şəhərində biznes kurslarını da qutarmışam. Azərbaycan Respublikası Kooperativlər İttifaqının vitse-prezidenti işləmişəm və SSRİ Kooperativlər İttifaqının üzvü də olmuşam. Bu günədək halal zəhmətimlə qazandığım şəxsi vəsaitim hesabına, Zaqatala rayonunda tarixdə əbədi iz qalası bir çox xeyriyyə işləri də həyata keçirmişəm. Görüb-bilən hər kəs buna şahiddir. Gördüyüm xeyriyyə işlərini o böyük Allah-Təalanın yolunda etmişəm. Şöhrət üçün etməmişəm. Məşhur Amerika yazıçısı A.Craig Copetas özünün “Bear Hunting With the Polit buro” kitabının 8-ci fəslini, məhz mənim həyatıma həsr edib. Azərbaycan Respublikasında və bir sıra xarici mətbuatda 30 ildir ki, mənim gördüyüm işlər barədə, həyatım barədə çox maraqlı, diqqəti cəlb edən məqalələr və açıqlamalar dərc olunub.
Mən media qurumlarında, televiziya kanallarında mərhum prezidentimiz Heydər Əliyevin və onun siyasi kursunun layiqli davamçısı İlham Əliyevin sahibkarlara qarşı olan diqqət və qayğısı, sahibkarlığın inkişafı üçün verilən sərəncamlar barədə məlumatlıyam və bütün bunları da ruh yüksəkliyi ilə qarşılayıram.
Bundan əlavə, mən 1987-ci ildə Zaqatala rayonunun füsunkar guşəsi olan Car kəndi yaxınlığında, daha dəqiq desəm Zilban çayının sol sahilində bir hissəsi dövlət su fonduna, digər hissəsi isə meşə ərazisinə aid olan çınqıllı kol-kos basmış seyrək ağaclıq olan 2 hektar ərazidə “Ləzzət” iştimai-iaşə mehmanxana tipli kooperativ yaratdım. Zaqatala rayonu üç respublikanın kəsişdiyi məkanda yerləşdiyi üçün, üç respublikanın dostluq rəmzi olaraq Azərbaycan, Gürcüstan və Dağıstan məxbəxini də inşa etdim. Azərbaycan məxbəxinin üzərinə samovar, Gürcüstan məxbəxinin üzərinə saxsı küp, Dağıstan mətbəxinin üzərinə səhəng yerləşdirdim. Yaratdığım “Ləzzət” kooperativi şəhər mərkəzindən 5km aralı dağ yamacında yerləşdiyindən, kooperativə gələn qonaqların və ziyarətçilərin istirahəti üçün, katec tipli mehmanxana da yaratdım. Çox ağır şəraitdə yaşayan Car kənd sakinlərininin müəyyən hissəsini işlə təmin etdim. Az vaxt ərzində “Ləzzət” kooperativinin sədası bütün respublikamıza, hətta vətənimizin hududlarından çox-çox uzaqlara da yayıldı. Kooperativinin fəaliyyəti üçün, şəxsi qoyunçuluq quşçuluq və arıçılıq təsərrüfatı yaratdım. Günü-gündən inkişaf edən “Ləzzət” kooperativi haqqında Moskva “Kino Evi” rejissorlar qruppasını bizim kooperativə göndərdi. Rejissorlar qrupu kooperativin fəaliyyəti ilə yaxından tanış oldular. Vertolyot vasitəsi ilə “Ləzzət” kooperativinin qoyunçuluq ferması yerləşən yaylaqlarla baş çəkdilər və kooperativin fəaliyyətinə heyran da qaldılar. “Kooperativ necə olmalıdır” adlı film də çəkdilər. Həmin film bütün sovetlər birliyi məkanında adlı-sanlı filmlərdən öncə yayımlandı. Sovet məkanının bütün mətbuatında kooperativin fəaliyyəti xüsusi yer aldı. Məqsədimiz “Ləzzət” kooperativini bütün sahələr üzrə genişləndirmək, xalqımıza yüksək mədəni xidmət göstərmək idi. Respublikamızda Korlar Cəmiyyətinin xətti ilə keçirilən Beynalxalq Dama yarışına “Ləzzət” kooperativi sponsorluq etdi və yarışların bir hissəsi bu kooperativdə keçirildi. Dünyanın hər yerindən gəlmiş qonaqlar “Ləzzət” kooperativinin fəxri kitabına imza atdılar. Yüksək mədəni xidmətə görə, öz razılıqlarını da bildirdilər. Daha sonra kooperativ Respublikamızın müstəqilliyinə həsr olunmuş məhsul cəmiyyətinin xətti ilə keçirilən Beynalxalq Düzüdo yarışına da sponsorluq etdi. Hətta, “Ləzzət” kooperativi Zaqatalada məskunlaşan Şuşa qaçqınlarına da biganə qalmadı. Öz xeyriyyəçiliyi ilə qaçqınlara bayram günlərində hədiyyələr verdi. Kooperativ öz fəaliyyət nizamnaməsini rəhbər tutaraq, Zaqatala rayonunda beynalxalq və daxili turizm inkişafını qarşısına məqsəd qoydu. Moskva, Sank- Peterbur və Türkiyənin şəhərlərinə müqavilə əsasında turist qruppaları da göndərdi.
1991-ci ilin may ayında “Ləzzət” kooperativinə Respublika Turizm sahəsindən təklif olundu. Zaqatala rayonunun Qəbizdərə kəndi yaxınlığında, yəni dağlar əhatəsində yerləşən ərazidə Şəlalə Turizm Kompleksi satılır. Mən kooperativin bir neçə üzvləri ilə birlikdə gedib Şəlalə Turizm Kompleksinə baxış keçirdim. Kompleks olduqca xoşuma gəldi. Çünki, Şəlalə Turizm Kompleksində içərisində hər cür şərait var idi. Həmin vaxt Respublika Birləşmiş Kooperativlər İttifaqının vitse-prezidenti işləyirdim və SSRİ Kooperativlər İttifaqının üzvü idim. SSRİ Kooperativlər İttifaqı “Ləzzət” kooperativinə yaxından çox köməkliklər göstərmişdi. Kooperativin inkişafı üçün bir neçə maddi yardımlar da etmişdi. Məni İtaliyanın Turin şəhərinə biznes kursuna oxumağa göndərmişdilər. Ona görə də SSRİ Kooperativlər İttifaqından görəcəyimiz işlərin saflığı üçün, huquqşünaslar dəvət edirdik. “Ləzzət” kooperativi “Şəlalə” istirahət zonası ilə alqı-satqı müqaviləsi bağlamaq üçün, SSRİ Kooperativlər İttifaqından huquqşünas dəvət etdik. “Şəlalə” istirahət zonasının daşınan və daşınmaz əmlakının dəyərini köçürmə yolu ilə, Azərbaycan Aqrar Sənaye Bankı vasitəsilə Respublika Turizm Sovetinin hesabına köçürdük. İlk növbədə “Ləzzət” kooperativindən “Şəlalə” istirahət zonasına gedən Mazıx kəndinin 8km yolunu bərpa etdik. “Şəlalə” istirahət zonasında xeyli təmir işləri apardıq və bir neçə turist qruppasını da qəbul etdik.
1992-ci ilin yanvar-fevral aylarında “Şəlalə” istirahət zonasında 2 hektar sahəyə gəlirli fındıq növündən fındıq bağları saldıq və istirahət zonasının kənarlarına 40 ədəd şabalıd, kivi və alma ağacları əkdik. “Ləzzət” kooperativinin işçiləri ruh yüksəkliyi ilə “Şəlalə” istirahət zonasına canlanma verdilər. Daha sonra “Ləzzət” kooperativinin köməyi ilə, “Mağara” şəxsi kəndli (fermer) təsərrüfatını da yaratdıq. Ölkəmizdə batıb gedən tütünçülük sahəsini inkişaf etdirməyi qarşımıza məqsəd qoyduq və 600 nəfər işgüzar insanı işə cəlb etdik. Kooperativ 600 nəfərə hər gün təmənnasız nahar verdi və hamı da ruh yüksəkliyi ilə işləyirdi. Royonumuzun idman sahəsinin inkişafına “Ləzzət” kooperativi və “Mağara” şəxsi fermer təsərrüfatı çox böyük köməkliklər göstərdi. Rayondakı mərkəzi futbol meydançasını da təmir etdik. “Mağara” futbol komandasını yaratdıq və komanda ölkəmizdə güclülər qrupunda çıxış etdi. Daha sonra “Ləzzət” kooperativi yaxınlığında dövlət su fonduna aid olan ərazidə boş-boşuna axan bulaq suyunu, respublika mərkəzi labarotoriyasında analiz etdirdik. Tərkibi müəyyənləşdikdən sonra, həmin bulaq yaxınlığında az minerallı “Mağara” bulaq suyunu qablaşdırmaq üçün sex də inşa etdik.
Çox keçmədiki ölkəmizdə icarə haqqında qanun qəbul edildi. Həmin vaxt Zaqatala meşə təsərrüfatının rəhbəri bizə bildirdi ki, “siz “Şalalə” istirahət zonasına və “Ləzzət” kooperativi yerləşən sahəyə görə icarə haqqı ödəməlisiniz”. Biz bu cür tələbdən sonra, düz dörd il Zaqatala meşə təsərrüfatının hesabına icarə haqqı ödədik. Təsərrüfatın rəhbəri bizə məlum olmayan səbəblərə görə, hər il bizimlə icarə müqaviləsi bağlayırdı. Mən yeni icarə müqaviləsi bağlamaq şərtilə meşə təsərrüfatına getdikdə, mənə bildirdilər ki, “meşə təsərrüfatına yeni rəhbər gəlib, müqaviləni o bağlayacaq. Onun huquqşünası gəlib öz təklifini də bildirəcək”. Bu belə də oldu. Malik Rzayev adlı bir nəfər gəlib bildirdi ki, “mən meşə təsərrüfatı deportamentinin huquqşünasıyam və sizə deyəcəyim sözlər, departamentin sədri Rövşən Cəlilova məxsus sözlər olacaq”. Malik Rzayev qarşımda elə şərtlər qoydu ki, mən həmin təklifləri heç məktuba da yazmağı rəva bilmirəm. Onun təkliflərinə razı olmadım və bildirdim ki, Azərbaycan vətəndaşları ilə birgə yaratdığım “Ləzzət” kooperativini siz yenidən mənə satmaq istəyirsiniz? Belə olan halda o, cavabında bildirdi ki, “artıq icarə müqaviləsinin bağlanmasından söhbət gedə bilməz”. O, onu da vurğuladı ki, “Rövşən Cəlilov elə belə adam deyil, o, nə istəsə onu da etməyi bacarır. Yəni, “əli çox uzun adamdır”. Onun yuxarılarda çox böyük “arxa-dayağı” var. Hələ məni tanımırsan, mən də Ali Məhkəmənin sədri Ramiz Rzayev qohumuyam. Sən biz deyənlə razı olmasan, o halda sənə çox pis olacaq. Bu minvalla Malik Rzayev mənə xeyli hədə-qorxu gəldi. Amma, mən heç bir halda reaksiya vermədim.
Bir neçə ay keçdikdən sonra Gəncə İqtisad Məhkəməzsindən mənə çağırış gəldi. Malik Rzayev həqiqətə uyğun olmayan qondarma idialarla “Ləzzət” istirahət zonasını məhkəməyə vermişdi. Guya ki, 18 il öncə ərazini mən zəbt etmişəm. Son anda Gəncə İqtisad Məhkəməsi Malik Rzayevin iddiasını rədd etdi və mən üz-üzə qaldığım problemlərlə bağlı ölkə rəhbəri cənab İlham Əliyevə müraciətlərimi ünvanladım. Müraciətimin cavabını xeyli gözləsəm də, heç bir halda cavab əldə edə bilmədim. Belə olan halda fikirlərimi mətbuat vasitəsilə ölkə rəhbərinə çatdırmağa qərar verdim və bunu da etdim.
Müraciətimin mətbuatda dərcindən az sonra məni Zaqatala rayon Məhkəməsinə çağırdılar və Seyfəli adlı hakim bildirdi ki, “Hacıbəy, səndən meşələrin inkişafı departamentinin sədri Rövşən Cəlilov şikayət edib. Sən ona böhtan atmısan və fikirlərini mətbuatda da dərc etdirmisən”. Cavab olaraq bildirdim ki, cənab hakim mən heç kəsi tənqid etməmişəm, sadəcə olaraq baş verənləri cənab prezidentimiz İlham Əliyevə ünvanlamışam. Mən 40 ildir ki, namaz qılıram, yalan danışıb Allahımı aldada bilmərəm. Mən baş verənləri açıqlasam da, hakim danışdıqlarıma məhəl qoymadı və mənə sifariş əsasında 6 ay icbari iş verdi.
Rövşən Cəlilov bundan sonra da sakitləşmədi. Malik Rzayevi bir daha yanıma göndərdi və bildirdi ki, “biz deyənlə razılaşmasan, səninlə icarə müqaviləsi də bağlanmayacaq. Meşə ərazisinə aid olan bütün əmlakını da əlindən alacağıq”. Cavab olaraq bildirdim ki, “Ləzzət” istirahət zonasını 1987-ci ildə yaratmışam və bununla bağlı lazımi sənədlərim də var.
“Şəlalə” istirahət zonasını da qanuni sənədləşmə yolu ilə almışam. Bu istirahət zonası SSRİ Geologiya Kəşviyyatı Nazirliyinin balansında olub. Sonra qərarla Azərbaycan Sovet Turizim İdarəsinə verilib. Zaqataladakı Gülüstan Turbazasının nəznində fəaliyyət göstərib.
Biz guya “Ləzzət” kooperativi və “Şəlalə” istirahət zonası yerləşən meşəlik əraziləri zəbt etmişik. Onu da bildirim ki, “Ləzzət” kooperativinin əmlakı haqda və “Şəlalə” istirahət zonasının əmlakı barədə, dövlət reyestr xidməti idarəsindən alınan kupçalar var. Bu əmlak Azərbaycan vətəndaşının, bir sahibkarın çox çətin zəhmətinin müqabilində yaratdığı əmlakdır.
Hörmətli Eldar Nuriyev və media nümayəndələri! Bu gün diqqətinizə onu da çatdırım ki, Ekologiya və Təbii Sərvətlər Nazirliyi, meşələrin inkişafı departamentinin rəhbəri Rövşən Cəlilovun göstərişi əsasında, bir neçə vəzifəli şəxs qondarma məhkəmə qərarını rəhbər tutaraq, “Şəlalə” istirahət zonasını bərbad hala salıblar. Mənə qarşı atılan addımlar məmur özbaşınalığı deyilmi? Hal-hazırda “Şəlalə” istirahət zonasında 2 hektar fındıq bağını, kivi bağını, alma bağını kol-kos basıb. İstirahət binalarını xarabalığa döndəriblər, xeyli sayda adam iş yerini itirib. Rövşən Cəlilovun göstərişi ilə, Zaqatala zonasında on il ərzində bir maşın odun 150 manatdan 300 manata qədər dəyərində, yerli sakinlərə pulla satılıbsa, bu törədilmiş cinayət deyilmi? Hər qış fəslində yüz minə yaxın ailənin müəyyən olunmuş qiymətdə odun alıb yandırması, Rövşən Cəlilovun cinayətini subut etmirmi?
Bu gün prezident sahibkarlara ehtibar edib, fındıq sahələrini genişləndirmək, tütünçülüyü, pambıqçılığı, daxili və xarici turizmi inkişaf etdirmək üçün, yeni-yeni sərəncamlar da imzalayır. Mən 30 ilin sahibkarıyam və kənd təsərrüfatı ilə bərabər, turizm sahəsində də kifayət qədər təcrübəyə malikəm. Nə vaxta qədər xalqın var-dövlətini tarmar edən, milyonlar qazanan cinayətkar məmurların əzabına dözməliyəm? Əsası olmayan böhtanlara məruz qalmalıyam? Nə vaxta qədər meşə təsərrüfatında törədilən ağır cinayətlər, ört-basdır olunacaq?
Mən Zaqatalanın meşə təsərrüfatında törədilən cinayətlərin bir hissəsini qeyd etdim. Prezidentimiz bu gün ölkəmiz üçün, xalqımız üçün əsaslı işlər görür. Siz də ölkə rəhbərinin zəhmətinə qiymət verməklə, biz sahibkarların köməyinə çatın. Əgər mənim yazdıqlarım yalandırsa, o halda mənimlə bağlı cinayət işi açdırın, qoy mənə ömürlük həbs cəzası versinlər. Xahiş edirəm ki, mənim gördüyüm işləri, mənə vurulan ziyanın əhatə dairəsini müəyyən etmək üçün, Zaqatalaya komissiya göndərin. Haqq-ədaləti araşdırmaq üçün, ancaq ümid yeri olaraq sizi müraciət edirəm. Əvvəlcədən Sizə minnətdarlığımı da bildirirəm.
Hacıbəy İsak oğlu Zakatalski,
ağsaqqal sahibkar