Tələbələrdən rüşvət dollarla alınır?

Bu yaxınlarda mediada Azərbaycandakı ali təhsil ocaqları ilə bağlı maraqlı bir məlumat dərc olundu.
Belə ki, Azərbaycanın bütün media orqanlarının monitorinqini aparan Media Təqib Mərkəzi 2016-cı ilin dekabr ayı üzrə analiz işinin yekunlarını açıqladı. Mərkəz ölkədə mövcud olan bütün sahələrin analizini aparır. Monitorinq sahəsinə ölkədə dərc olunan 100-ə qədər qəzet və jurnal (o cümlədən, 35 gündəlik qəzet), elektron vasitələrdə yayımlanan 1600 sayt (o cümlədən, 500 gündəlik yenilənən sayt), 12 televiziya kanalı, 12 radio kanalı və sosial şəbəkə daxildir. Universitetlərlə bağlı dekabr ayı üzrə olan məlumatlar maraq doğururdu. Məlumatda bildirilirdi ki, 2016-cı ilin dekabr ayında elektron mətbuatda, yəni sayt və portallarda universitetlərlə əlaqəli 8955 xəbər yerləşdirilib. Bunlardan 68 xəbər mənfi, 109 xəbər müsbət, 8778 xəbər isə neytraldır. Mənfi xəbərlər arasında lider kimi isə Gəncə Dövlət Universiteti (28 xəbər — universitetdə saxtakarlıq, rüşvət, pul yığımı, saxta dekan seçkiləri və s.) idi. Bunu təsadüfən xatırlamadıq. Qəzetimizin oxucuları xatırlamamış deyil ki, tez-tez digər media orqanlarında olduğu kimi, “Gündəm Xəbər” qəzetində də GDU-dakı rüşvət, korrupsiya və digər qanunsuz əməllərlə bağlı tez-tez yazılar dərc olunur.



Bəli, artıq uzun müddətdir ki, mətbuatın gündəmindən düşməyən, təhsil sahəsindəki əyər-əskik cədvəlində "ulduz"a çevrilən Gəncə Dövlət Univeersitetində sular durulmur ki, durulmur. Gəncəbasarda fəaliyyət göstərən ali və orta təhsil ocaqlarında rüşvət cədvəlində Gəncə Musiqi Kolleci ilə bir sırada adı gedən GDU-da rüşvət təhsilin onurğasındakı sağamaz xəstəliyə çevrilib. Buna səbəb nədir?

Rəhbərliyin işinin öhdəsindən lazımı səviyyədə gələ bilməməsi, ya bilərəkdən korrupsiya şəbəkəsinə yol verməsi? Son zamanlar GDU haqqında bir çox mətbu orqanlarda korrupsiya ilə bağlı məlumatlara geniş yer ayrılsa da, bu gün gedişat onu göstərir ki, GDU-nun rektoru Yusif Yusifov tutduğu postda möhkəm oturub. Belə ki, Təhsil Naziri Mikayıl Cabbarovun Yusif Yusifova irad tutması və ya adı gedən universitetdə baş alıb gedən özbaşınalıq, rüşvətxorluğa göz yummasının yalnız bir cavabı var. O da Yusif Yusifovun Maliyyə nazirliyində məsul postlardan birini tutan qardaşı Cavanşir Yusifovun olmasıdır.

Məlumat üçün bildiririk ki, Yusif Yusifovun GDU-dakı rüşvət gəmisini batıra bilməməsinin əsas məqamlarından biri odur ki, universitetdə fəaliyyət göstərən əsas rüşvət şəbəkəsini idarə edənlər necə deyərlər, təcrübəli rüşvətxorlardır. Daha dəqiq desək, 90-cı illərdə Xalq Cəbhəsinin meydanlarda çıxıb etiraz aksiyaları keçirən zaman ziyalı təbəqənin ətəkyindən tutub, indiyə qədər də xeyirlərini güdən bir dəstə işbazlar bu günə kimi GDU-da rəhbər vəzifələrdə fəaliyyət göstərməkdədir. Artıq bu şəbəkə tam olaraq universitetin idarəçiliyini əlinə almağı bacarıb.

Çünki, onlarda illərin "praktikası" var. Hazırda GDU-da payız(qış) imtahan sessiyaları rektoratlıq və dekanatlıqlar arasında bölünüb. Belə ki, tələbələrin bilik səviyyəsi yarı test, yarı yazılı şəkildə aparılır. Test üsulu ilə aparılan imtahan rektoratlıq tərəfindən təşkil olunur. Əsas imtahanlar isə dekanatlıqlarda dekanın sifarışi ilə aparılır. Belə ki, əldə etdiyimiz məlumatlarda deyilir ki, yazılı imtahanlara bi başa dekan nəzarət edir. Yəni bu imtahanların hesabı dekanlıqdır. Qiymətlərə gəlicə, 3 almaq üçün 50 manat, 4 almaq üçün 70 manat tələb olunur. 5 qiymət almaq istəyənlərin işi bir az qəlizlışir. Yalnız maddi baxımdan. Belə ki, əldə etdiyimiz məlumatda deyilir ki, əksər fakultələrdə əla qiymət almaq istəyən tələbə imtahanlara verdiyindən əlavə, üç aylıq tələbə müavinətini öncədən dekanatlıqla yarı bölür. Əksər hallarda tələbənin əlaçı olması onun biliyinin məhsulu ilə deyil, cibi ilə ölçülür. Dekanlıq tərəfindən təşkil olunan imtahanlarda bilikli tələbələr yüksək gərginlik, mübarizə yolu keçərək qiymət ala bilər.

Məlumat üçün onu da bildirək ki, ötən ay plagiat olunan elmi əsərlərlə bağlı pedaqoji fakultədə olarkən rüşvətin açıq-aydın , qorxusuz dekanlıqda yığılmasının tam şahidi olduq. Təəssüflər olsun ki, GDU-dakı hazırkı vəziyyətə aydınlıq gətirəcək qurumlar hələ də susur. Belə çıxır ki, rektor universiteti idarə edə bilmir və ya dekanlar rüşvətxorluq əməllərini davam etdirməkdən çəkinmirlər. Vəziyyət isə pik həddinə çoxdan çatıb. Necə ki, GDU-nun bəzi müəllimlərinin illərdən bəri plagiat elmi titulları hesabına dövlət büdcəsindən ayrılan vəsaitlər mənimsənilir.

Daxildə isə ab-hava belədir: rektordan əlavə universitetdə rektorun yaxın ətrafında toplaşan bir qrup tərəfindən şəbəkə yaradılıb. Hansısa dekan, hansısa kafedra müdiri rektorun ətrafında toplaşıb onun böyür-başına "Çin səddi" çəkənlərin qanadının altında qorunur.
Universitetin bir qrup tələbəsi adından redaksiyamıza verilən xəbərdə isə bildirilir ki, təhsil ocağında tələbələrdən müxtəlif adlarla yığlan rüşvətin dollarla gətirilməsi tələb olunur: “Bu tədris ili başlayandan bütün yığımlar dollarla istənilir. Əvvəllər 50 manat olan rüşvət indi 50 dollar olub. Rüşətin özü bütövlükdə qeyri-qanunidir, cinayətdir, bu aydın məsələdir. Lakin bunu bir də dollarla, yəni demək olar ki, ikiqat artıq tələb etmək bizi daha da çətin duruma salıb”.

Görünən odur ki, adıçəkilən universitetdə rüşvət o səviyyəyə çatıb ki, tələbələr təhsillə məşğul olmaq əvəzinə rüşvətlə mübarizə aparmağa məcbur olurlar. Bu da azmış kimi, universitetin adı haqqında ən çox mənfi yazılar yazılan qurumların siyahısına düşüb. Bütün bu qeyd edilənlər GDU-da yoxlamaların aparılacağı haqda iddianın doğruluğuna dəlalət edir. Bir ayda barəsində 30-a yaxın mənfi yazı yazılan bir qurumda işlərin qaydasında olduğunu demək mümkün deyil.

Qarşı tərəfin mövqeyini işıqlandırmağa hazırıq.

Mehriban Əzizqızı