Bir vaxtlar Xalq artisti Flora Kərimovanın efirə biraxılmadığı hərkəsin yadındadır. Özü də bu uzun müddət davam etdi. Səbəbi isə bəlli idi. Flora Kərimova müxalif siyasi partiyalardan birində təmsil olunurdu. Şübhəsiz ki, o zaman Flora Kərimovanın bədxahları da bu faktdan ona qarşı istifadə edir, onun efirə buraxılmamasına çalışırdılar. Flora Kərimova ilə mərhum müğənni İlhamə Quliyeva ilə arasındakı konflikt də bu məsələdə az rol oynamamışdı. Amma sonradan nə yaxşı ki, bəzi telekanal rəhbərləri Flora Kərimova kimi əvəzsiz bir sənətçini efirə buraxmamağın nə qədər yanlış bir addım olduğunu dəyərləndirə bildilər. Əlbəttə, Flora Kərimovanın efirə buraxılmamasının ən böyük zərbəsi Azərbaycan musiqisinə, eləcə də Flora xanımın pərəstişkarlarına dəyidi.Nəhayət, uzun müddətlik qadağa aradan qaldırıldı, bütün telekanallar Flora Kərimovaya "yaşıl işıq" yandırdı. Bundan isə qazanan hamı oldu: həm həmin televiziyalar, həm də xalqımız. Elə ATV-də Nanə Ağamalıyevanın verlişini xatırlatmaq kifayətdir. Flora xanım orada ekspert qismində iştirak edirdi.
Ancaq artıq xeyli vaxtdır ki, Flora Kərimovaya yenidən efir qadağası qoyulub. İndi Nanənin proqamı da etiraf etmək lazımdır ki, Flora xanımsız o qədər də maraqlı deyil. Təkcə ATV-nin deyil, yenə də bütün telekanalların qapıları Flora Kərmovanın üzünə bağlanıb. Çox təəssüf...


Səbəbinə gəlincə, Xalq artisti Flora Kərimova bunu açıq şəkildə çoxdan bəyan edib. Onun sözlərinə görə, efir qadağasının səbəbi həmkarı Zeynəb Xanlarova haqqında dediyi fikirlər olub: “Hər yerdə mənə qadağa qoyulub, keçmişdəki kimi… Zeynəb Xanlarova unudur ki, mən ona Nisə Qasımova deyiləm ki, Azərbaycandan illərlə didərgin etsin. Mənim bu millətə, torpağa haqqım var. Açıq sözə, fikrimə görə qorxmadan hansısa addım atmağa haqqım var. O haqqımı Zeynəb deyil, Zeynəbin Zeynəbi gəlsin, əlimdən ala bilməz. Mənim dilimdən onun mərhum prezident Heydər Əliyevə qarşı olan etibarsızlığı açıqlanandan sonra televiziya kanalları mənə efir qadağası qoyub. Bu yolla kolda gizlənib, özgənin əli ilə məni susdurmaq istədi. O, həqiqətdən qorxdu. Bir də hər kəsin bildiyi “Şəki əhvalatı”nı açıqlayacağımdan qorxdu.

Məni susdurmağa ordenləri yan-yana düzən Zeynəbin də gücü çatmaz. Nahaq yerə belə etdi, mindirdi məni cin atına… Haralarasa yuxarılara dırmaşıb. Onlar da ya Mətbuat Şurasına dırmaşıb, ya da hansısa bir yuxarılara… Amma dəxli yoxdur, məni susdura bilməz. Oturmuşdum, bir kənarda… Siyasətdən çoxdan gedən bir insanı cin atına mindirməsin”.

Xatırladaq ki, ötən ilin yayında xalq artisti Flora Kərimova həmkarı Zeynəb Xanlarova haqqında ağır ittihamlar səsləndirmişdi. Efir qadağası da məhz bundan sonra tətbiq edilməyə başlanıb.

Flora Kərimova Zeynəb Xanlarovanın telekanal rəhbərlərinə təsir etdiyini düşünür: "Zeynəb Xanlarova məndən uşaq kimi şikayət edib. Cürəti çatmır ki, mənimlə danışsın, suallarıma cavab versin, kişi kimi mənimlə döyüşsün. Amma əlaltı məndən ora bura şikayət edir".

Xalq artisti Zeynəb Xanlarova ilə konfliktin necəyarandığına da aydınlıq gətirib: "Bizimyol saytından zəng gəlmişdi, müsahibə istəyirdilər. Səhhətim yaxşı deyildi deyə, razı olmurdum. Sonra hörmətli bir şəxs zəng elədi, xahiş etdi deyə, mən də razılaşdım. Jurnalistləri gətirib, gəldi bizim bağa ... Söhbətə başladıq. Bu aləmdə olan insanların etibarsızlığından söhbət düşdü. Zeynəb Xanlarovadan danışdıq. Amma mən bunu müsahibə üçün demədim, yəni etibar edib, aramızda söhbətləşdik. Məlumat mətbuata yayılıb, mən dediyimi inkar etmirəm. Zeynəb Xanlarovanın sənəti, səsi yoxdu. Bəli mən indi də təsdiq edirəm, hansı bir konserti izləsəniz görərsiniz ki, Zeynəb Xanlarova "xoruz" buraxırdı, xoruzsuz keçinmirdi. Zeynəb Xanlarova şuxluqdan başqa səhnəyə heç bir şey gətirmədi. Əlavə edirəm o səhnəyə mədəniyyət gətirə bilmədi !

Zeynəb Xanlarovanın çörəyi dizinin üstündə idi. Heydər Əliyev Zeynəb Xanlarovaya çörək verdi, o isə çörəyə naxələflik etdi, çıxıb A. Mütəllimovun səsverməsində ona dəstək istədi. O dəstək üçün də A. Mütəllimov ona H. Əliyevin qardaşının evini hədiyyə verdirdi. Bu etibarsız Heydər Əliyevin zəhmətinə, onun üçün etdiklərinə belə qiymət verdi. Gedib illərdi o evdə yaşadı".

Sonra Ələkbər Tağıyevin mahnılarını oxudu və onunla da zirvəyə qalxdı. Çünki H. Əliyev cənablarının xoşu gəlirdi həmin mahnılardan ... Heydər Əliyev böyük adam idi ki, Zeynəb Xanlarovanı bağışladı. SSRİ xalq artisti adını da ona Heydər Əliyev verdirdi... O da utanmadı, arsız-arsız gedib Əziz Əliyevin evində yaşadı. Mən nə deyirəm haqlı deyirəm, düz deyirəm. Zeynəb Xanlarova ağzını açsa, Şəki məsələsini yadına salaram. Heydər Əliyev sayəsində onu Türkiyədə əl üstündə qarşıladılar. Bir sözlə Z. Xanlarovanın çörəyi dizi üstündədir".

Flora Kərimova iddia edir ki, Zeynəb Xanlarova dəfələrlə onu təhdid edib:

"Məni təhdid etdirirdi. Ərinə ona buna zəng elətdirirdi... Axırda bezdim, dedim ki, mən ər çörəyi yeyirəm. Heç kəs məni qorxuda bilməz bu həyatda ... Bizim onla ədavətimiz onun ikiüzlüyündən sonra başladı. Onun mənə qarşı səhvi bir olmayıb, iki olmayıb, çox olub. Onu nə müğənni, nə də millət vəkili olaraq qəbul etmirəm. O siyasətçi ola bilməz".

Təəssüf ki, Flora Kərimovanın efirə buraxılmamasında jurnalist həmkarlarımızın da rolu var. Onlar etik normaları gözləmədən Flora xanımın geniş publika üçün demədiyi sözləri tirajlayıb, sanki iki sənətkarın arasında bilərəkdən konflikt yaratmaq istəyiblər. Çox təəssüflər olsun ki, buna nail da olublar. Təəssüf doğuran bir də telekanallarımızın bu məsələyə obyektiv yanaşmaması, tərəf tutması, Flora Kərimovanı efirə buraxmamasıdır. İtirən isə yenə də xalq, sənət və həmin telekanllardır... Amma gəlin, ümid edək ki, yaranmış bu münaqişə aradan qaldırılacaq, Flora xanıma efir qadağası aradan qaldırılacaqdır.

Samir