Daxili İşlər Naziri Ramil Usubovun diqqətinə

Daxili İşlər Nazirliyinin mətbuat xidmətinin bu ilin oktyabrın 4-də yaydığı xəbərə görə, Xırdalan şəhərində yaşayan İlham Musayev və qardaşı İntiqam evlərində dəm qazından zəhərlənərək ölüblər.





Dəm qazından dünyasını dəyişənlərin sayının çox olması səbəbindən, bu xəbər az qala adi xəbər kimi qəbul oluna bilər. Amma… Amma ortaya ilk məqamda bir sual çıxır; 45-50 yaşlarında iki kişinin evdə 2 metrlik hamamda eyni vaxtda çimməsi nə qədər inandırıcıdır və ümumiyyətlə buna inananlar varmı? Buna ilk növbədə inanmayan elə dünyasını dəyişən qardaşların bacısı Musayeva Tamella Gümüş qızıdır. Nərimanov rayon Koroğlu Rəhimov 2a ev 72 ünvanda yaşayan Tamella Musayeva redaksiyamıza müraciət edərək kifayət qədər suallar yaradacaq açıqlamalar verdi. Bəri başdan deyək ki, Tamella xanım hesab edir ki, baş verən olay qətl hadisəsidir və bu qətllərdə bir çox adamlar iştirak edib. Gəlin ardıcıllıqla söylənilənlərə diqqət yetirək.Tamella Musayeva “Gündəm Xəbər”ə bildirir ki, ölən qardaşlardan biri olan İlham Musayevin ailəsində ciddi problemlər yaşanır və O, mənzili həyat yoldaşı Təhminə xanıma və iki övladına verərək evi tərk edir. Amma bundan öncə dəfələrlə həyat yoldaşı ilə arasında yaranan problemlərə görə polisdə işə cəlb olunur. Bacısının deməsinə görə Təhminə xanımın polislərlə normal münasibətləri olduğu üçün hər dəfə İlham Musayev səbəbsiz yerə günahkar elan edilir və bir dəfə hətta polisə müqavimət adıyla həbs olunur. Amma bir müddətdən sonra cütlüklərin münasibətləri qaydasına düşür və İlham Musayev digər mənzilini sataraq ailəsinin yanına qayıdır. Yaşadıqları mənzili tam təmir edəndən sonra isə məcaranın ən maraqlı məqamı başlayır. Belə ki, mənzilə xidmətçi kimi Rəhimə adlı qadın gəlir. Tamella Musayevanın deməsinə görə Rəhimə ilə Təhminə eyni bölgədən olublar və hətta belə bir şübhə də var ki, onlar öncədən də bir-birilərini tanıyıblar. Qayıdaq hadisənin davamına. Rəhimə adlı qadın ev təmir olunub qurtaran kimi ev sahibi İlham Musayevə hədə-qorxu gəlməyə başlayır. Qısa araşdırmadan sonra aydın olur ki, Rəhimə deyilən qadın öncələr həbsxanada olub və hazırda da narkotik istifadəçisidir və qardaşların ölümündən bir ay öncəyə qədər bir neçə dəfə çalışıb ki, hətta onları narkotiklə şantaj etsin. Beləliklə kifayət qədər ziddiyətli bir məqam yaranır. İndi isə gəlin hadisənin baş verdiyi günə qayıdaq. Tamella Musayevanın deməsinə görə qardaşlar oktyabrın 3-də Abşeronun Xırdalan şəhərindən evdən saat 11-də çıxıb və saat 5-ə qədər ailələri ilə telefon əlaqəsində olublar. Amma saat 5-dən sonra əlaqə kəsilir. Qardaşlar haqqında isə bacısı İctimai Televiziyada yayımlanan xəbərdən xəbər tutub, o biri qardaşına isə polis zəng edərək morqa gəlməyi istəyib. Aydın olub ki, qardaşlar artıq həyat da yoxdurlar. İndi isə gəlin növbəti müammalı məqama baxaq. Mərhumların bacısının təqdim etdiyi şəkillərdən göründüyü kimi ölənlərin cəsədlərində zorakılıq izləri var. Bacısı bildirir ki, qardaşlarının cəsədlərinin üzərində kifayət qədər zorakılıq izləri olub. Qardaşların dizlərində dubinka izləri, kürəklərində küt alətin izləri, həmçinin gözlərinin altında şiş, birinin isə başında çapıq olub. Həmçinin hər ikisinin bədənlərində cırmaq izləri olub. Maraqlıdır, dəm qazından boğulma olubsa onda bu zorakılıq izləri nədən yaranıb? Tamella Musayevanı maraqlandıran sullarda məhz bunlardır. Tamella Musayeva başqa bir müammalı məqam haqqında da danışır. Onun sözlərinə görə cəsədləri morqdan götürəndən sonra ekspert və polislər bildiriblər ki, cəsədləri dərhal dəfn edin. Bundan başqa Abşeron rayon prokurarunun köməkçisi Elçin Mahmudov və pols-tədqiqatçısı bildirdilər ki, heç bir yerə şikayət etməyin və məsələ artıq bağlanıb.Tamella Musayeva deyir ki, Elçin Mahmudov qardaşlarının hamamda olan cəsədlərinin şəkillərini ona göstərib və deyib ki, buna görə əlavə problemə ehtiyac yoxdur. Amma bacı düşünür ki, qardaşlar öldürüləndən sonra hamama gətiriliblər. Çünki bacının çəkdiyi şəkillərlə prokuror köməkçisinin göstərdiyi şəkillər arasında da fərq var. Buna görə də Tamella Musayeva məsələnin sona qədər araşdırılmasını tələb edir. Sonda bir məqamı da Tamella Musayeva dilə gətirdi. Onun sözlərinə görə dünyasını dəyişən qardaşlardan biri İlham Musayevlə ölümündən 2 ay qabaq Sabirabad rayon sakini Cəfərov Qadir və onun sürücüsü Əmanət arasında da problemlər yaşanıb. Belə ki, İlham Musayevin Perəküşkül qəsəbəsində torpaq sahəsi olub və Qadir Cəfərov torpaq sahəsini almaq istəyib. Amma sonra İlham Musayev başa düşüb ki, qarşısındakı dələduzluqla məşğuldur və bununla da gərginlik yaranıb. Bacısı bildirir ki, bununla bağlı vido çəkiliş də var. Qeyd edək ki, Qadir Cəfərov hazırda həbsdədir. Beləliklə gördüyünüz kimi Hollivud filmini xatırladan olayda kifayət qədər ciddi düyünlər var və yəqin ki, əlaqədar təşkilatlar məsələyə daha həssas yanaşacaqlar. Hələliksə Tamella Musayeva hesab edir ki, qardaşları qətlə yetirilib və bu olayda Rəhimə adlı qadın başda olmaqla bir neçə şəxs iştirakçı olub.Yazıda adı hallanan şəxslərin və orqanların mövqeyini dərc etməyə hazırıq.






















Mirzə
gundemxeber.az