İlham Əliyev hakimiyyətdəki vəzifəli şəxslərin qudurğan uşaqlarına qarşı amansız mövqedədir - onlar həbsə, valideynləri kreslodan evə gedir...

İsmayıllı hadisələrini təkrarladacaq general Novruzəli Orucovun xuliqan oğlunun həbsi və özünün işdən qovulması ilə məsələ bağlanmadı, əməlləri araşdırılır - Detallar

General Novruzəli Orucovun oğlu Rüstəmin xuliqanlığa görə həbs edilməsi və atasının işdən qovulması hakimiyyətdəki bir sıra məmurlara növbəti dərs oldu desək yanılmarıq. Çünki beləsi olmamışdı və ölkə başçısı çox ciddi bir cəza verdi.
“Gündəm-Xəbər”in əldə etdiyi məlumata görə, prezidentin son müşavirədə icra başçılarına xəbərdarlıq etməsi və məmurlara sərt mesajlar verməsinin ardınca qeyri-rəsmi təlimatlar olub.

Ölkənin məmur korpusunun nəzərinə çatdırılıb ki, sentyabrdan iqtidarın daxili siyasətində yeni strategiya yürüdüləcək.

Bu siyasi kursa zidd fəaliyyət göstərən qüvvələr komandadan qovulacaq və onlara amansız münasibət nümayiş etdiriləcək.

Necə ki, bu günə qədər neçəsi ağır şəkildə cəzalandırılıb və prezident gözünü qırpmadan onlara lazımi yerini göstərib.

General N.Orucovun da oğluna görə vəzifədən çıxarılması başqalarına bir görk idi: kim avtoxuliqanlıq edəcəksə, kim əhalini aşağılayacaqsa, kim nizam-intizamlı olmayacaqsa, harınlıq, qudurğanlıq, lovğalıq, dikbaşlıq edəcəksə özü həbsə gedəcək, atası da vəzifəsindən evinə...

Odur ki, indi general evdə televizora baxır, oğlu dörd divar arasında cəza çəkir – avtobus şoferinə qarşı etdiyi qudurğanlığın ucbatından.


Hakimiyyət kluarlarında gedən müzakirələrə görə, general Orucovun fəaliyyəti araşdırıla bilər. Onun Səfərbərlik və Hərbi Xidmətə Çağırış üzrə Dövlət Xidməti rəisinin müavini vəzifəsində hansı korrupsiyaya yol verdiyi təftiş edilə bilər.

General oğlunun özbaşınalığının güdazına gedib və eynilə İsmayıllı hadisələrinə bənzər olay yaşanıb.

Xatırladaq ki, İsmayıllıda keçmiş əmək naziri Füzuli Ələkbərovun oğlu Vüqarın içkili halda qəza törətməsi, vurduğu maşının sürücüsünü dostları ilə birlikdə döyməsi və rayon camaatını təhqir etməsi bölgəni ayağa qaldırmışdı.

Ondan sonra məlumdur ki, rayonda icra başçısı olan əmisi Nizami Ələkbərov və nazir atası vəzifəsindən qovuldular.

Generalın oğlu da demək olar ki, eyni qanunsuzluğa yol verib. Sadəcə, bu dəfə əhalinin ayağa qalxmasına ehtiyac qalmayıb. Ölkə rəhbərliyi dərhal qudurğan məmur övladını cəzalandırıb.
Bu arada, generalın fəaliyyətinin təftiş edilə bilməsi xəbəri də yayılmaqdadır. Bildirilir ki, bir qrup Qarabağ müharibəsi iştirakçısının iddia etdiyi – “Orucov Füzulidəki döyüşlərdə iştirak etməyib” məsələsi araşdırıla bilər.

Qazilərin adından mətbuatda yayılmış və zamanında Orucov tərəfindən bir çox saytlardan sildirilmiş həmin materialda deyilirdi:

“Biz özümüz Füzulidə döyüşmüşük və bilirik ki, orada elə bir adam döyüşlərdə iştirak etməyib.

Onun bu saxtakarlığa niyə getdiyini bilmirik, bəlkə aldığı general rütbəsini qanuniləşdirmək üçün edib, amma gördüyümüz odur ki, bu saxtakarlıq haqda mediada yazılmır, yazılanlara isə reaksiya verilmir”.

Bundan başqa, A.Rəhimov və müavini olmuş Novruzəli Orucov rəhbərlik etdikləri qurumu korrupsiya yuvasına çeviriblər. Bu gün də həmin qurum “niqdonı” bilet alveri ilə məşğul olmaqda ittiham edilir.

Buna qədər yazılanlar arasında dövlət xidmətinin yarandığı gündən bu yana yarıtmaz fəaliyyəti, bu yarıtmazlığın birbaşa olaraq rəhbərlikdən qaynaqlanması, SHXÇDX-də baş verən rüşvət və korrupsiya halları, habelə digər bu kimi faktlar ictimailəşdirilirdi.

Arzu Rəhimovun rəhbərlik etdiyi qurumun xidmət rəisi müharibə şəraitində yaşamağımıza baxmayaraq, saxta hərbi bilet sataraq milyoner “iş adamına” çevrilib.

Hərbi bileti təxminən 4500 - 5000 manat arasında satan İlqar Əlimirzəyevin həmçinin Qəbələdə villa biznesi ilə də məşğul olduğu bildirilir.

Səfərbərlik və Hərbi Xidmətə Çağırış üzrə Dövlət Xidmətində çalışanların övladlarının böyük hissəsi ya hərbi xidmətdən yayınır, ya da cəbhə bölgəsindən kənarda xidmət edirlər.
“Gündəm-Xəbər”in məlumatına görə, N.Orucov A.RəHimovun postuna göz dikmişdi. Generallar arasında bu vəzifə uğrunda mübarizə gedirdi.

Ancaq müavin rəisə bata bilmədi. Onu himayə edən Vahid Əliyev isə PA-dakı vəzifəsini itirdi. Bir tərəfdən də oğluilə bağlı məsələ onun ümidlərini yerə vurdu.

Bundan sonra Orucova vəzifə veriləcəyi inandırıcı deyil. Deyilənlərə görə SHXDÇDX-də bəzi şöbə və rayon idarə rəisləri Orucəli Novruzova “rəis” deyə müraciət edirlər.

Bu müraciətləri ilə onlar Arzu Rəhimovu rəis kimi görmək istəmədiklərinə eyham vurmaqla yanaşı, Orucəli Novruzovu bu postda görmək istədiklərini bildirmiş olurlar. Düzdür, iddia olunan bu məlumatın nə dərəcədə gerçək olduğunu bilmirik.

Ancaq bununla belə Arzu Rəhimovla Orucəli Novruzovun arasının soyuq olduğu strukturda hamıya aydırdır.

Orucəli Novruzov zaman-zaman SHXDÇDX-nin rəis olmaq üçün mümkün olan bütün əlaqələrindən istifadə edib.

Məlumatlara görə, bir zamanlar qılıncının dalı da, qabağı da kəsən sabiq Nəqliyyat naziri Ziya Məmmədovun qrupunda yer alan Novruzəli Orucov rəis olmaqdan ötrü Ziya Məmmədovdan da kömək istəyib.

Ziya Məmmədov isə bu məsələdə Novruzəli Orucova lazımi dəstəyi verəcəyini deyib. Lakin indi hər iki məmur vəzifəsindən uzaqlaşdırılıb.

Novruzəli Orucov bir zamanlar xidmət rəisi olmaq üçün Ziya Məmmədovdan olduğu kimi, Prezidentin Müdafiə məsələləri üzrə köməkçisi, Prezident Administrasiyasınıı rəhbərinin müavini, general-leytenant Vahid Əliyevin də dəstəyini ala bilmişdi.

Həmin dövrdə KHVTİC Respublika Şurasının sədri vəzifəsində çalışan Novruzəli Orucovun yeni yaradılan quruma rəis təyin olunması demək olar ki, an məsələsi idi.

Ziya Məmmədovla Vahid Əliyevin hakimiyyətin yuxarı instansiyalarında N. Orucov barəsində formalaşdırdıqları müsbət rəy və bəzi media orqanlarında Arzu Rəhimova qarşı geniş miqyaslı hücum öz işini görməkdə idi. İndi heç biri vəzifədə deyillər.
Məsələnin mahiyyəti başqadır və söhbət qudurğan məmur balalarının yüz minlərlə dollarlıq maşınlarda heç bir qaydalara məhəl qoymadan şütüyərək sözün əsl mənasında terror əsdirməsindən gedir.

Belələrinin şəhərin mərkəzində saatda 180-220 kilometr sürətlə şütüyərək sfetoforun qırmızı işığında keçməsi və qəza törətməsi, yaxud hansısa mağazaya, kafeyə girməsi barədə çoxsaylı insidentlər qeydə alınıb.

Qudurğan məmur balaları təkcə yüksək sürətlə şütüyüb qarşısına keçənləri tapdalamır, onlar elə-belə, kefləri yaxşı olanda qarşılarına keçənləri gülləyə də tuta bilirlər.

Prezident İlham Əliyev çıxışlarında bir neçə dəfə bu cür qudurğan məmur övladları haqda danışıb və onlara qəti xəbərdarlıq edib. Prezident belələrinə görə məsuliyyəti atalarının daşıyacağını və onların işdən çıxarılacaqlarını, sərt cəzalanacaqlarını demişdi.

Belə görünür ki, qudurğan balalar ataları işdən çıxarılandan sonra da puldan korluq çəkmirlər və əvvəlki kimi arxayındırlar.

Prezidentin öz ailə üzvlərini idarə edə bilməyən dövlət məmurlarının vəzifədən çıxarılacağı ilə bağlı bəyanatı xalq tərəfindən dəstəklənir və biz də bu çağırışa qoşuluruq

Son vaxtlar bəzi məmur balalarının atalarına vurduğu zərbələrin şahidi oluruq. Məmur balaları millətin, xalqın taleyindən çox, öz valideynlərinin taleyini düşünməlidir. Ən dəhşətlisi odur ki, bəzi məmurlar övladlarını ərköyün böyüdür.



Əslində isə onların övladları vətənpərvər olmalıdır. Bu gün baş verənlərin hamısı əvvəldən qoyulan yanlış tərbiyənin nəticəsidir.

Eyni zamanda vaxtından qabaq yaşına uyğun olmayan təminatla bağlı olan məsələlərdir. Biz prezidentin bu çağırışına qoşuluruq. Bu çağırış bütün millətin və xalqın ürəyindəndir.

Hətta bəzi məmurların da özlərinin də ürəyindəndir. Yerdə qalanlar işdən çıxarılan hər bir məmurdan öyrənməlidir, onlandan ibrət götürməlidir. Birinin oğlu sürətlə maşın sürür, bir ailəni öldürür, o biri ictimai nəqliyyatda sürücünü döyür və s.

Bunlardan bir nəticə çıxarılmalıdr. Məmur düşünməlidir ki, bu məsələ böyüyüb prezidentə çatar və onu cəzalandırarlar. Çox təəssüf ki, bəziləri gözü çıxan qardaşlarından, "podval"a düşənlərdən, vəzifədən qovulanlardan dərs götürmür

Dövlət bu insanlara tapşırılır, prezident onlara etimad edib vəzifəyə təyin edir. Bizim kifayət qədər övladı əxlaqlı olan məmurlarımız var. Elə məmurlar var ki, onlar Azərbaycanın ictimai-siyası həyatında mühim rol oynayır.

Övladları dövlətin inkişafına təkan verən beynəlxalq təşkilatlarda fəaliyyət göstətir. Bir dəfə də olsun adları hallanmır.

Tərbiyəsiz böyüyən məmur övladlarının hamısı valideynlərinin başını yeyəcək. Buna görə də diqqətli olmaq və əxlaq normalarına əməl etmək lazımdır.

Ümid olunur ki, məmurlar uşaqlarına çəki-düzən verəcəklər. Əks halda daha ağır fəsadlar verə bilər. Generalın oğlu az qala İsmayıllı hadisələrinə oxşar olay yaradacaqdı.

Prezident İlham Əliyev Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasdakı çıxışında bildirib ki, öz ailə üzvlərini idarə edə bilməyən dövlət məmuru vəzifədən çıxarılacaq. Hər halda bu dəfə prezident daha böyük bir dərs vermiş oldu.

Aslan Nəsirov
"Gündəm Xəbər"