Kollec sistemi təhsil sahəsinin ayrılmaz və çox önəmli bir hissəsidir. Məhz elə bu səbəbdən də bu gün ölkəmizdə təhsil sahəsində həyata keçirilən islahatlar orta-ümumtəhsil məktəbləri və universitetlər kimi kolleclər sistemində də mütərəqqi reformaları nəzərdə tutur. Bununla belə hələ də bu tədris müəssisələrinə rəhbərlik edən şəxslər arasında istər ölkənin təhsil sistemi üçün, istərsə də cəmiyyətimizin maddi-sosial rifahı üçün kolleclərin necə böyük əhəmiyyət kəsb etdiyini tam dərk etməyən kadrlara tez-tez rast gəlmək olur. Bu səbəbdəndir ki, təhsil kimi ümummilli əhəmiyyət kəsb edən bir sahəni özəl müəssisəsinə çevirən, şəxsi maraqları naminə bazar qanunları tətbiq edən kadrların “əməyi” nəticəsində bir çox təhsil müəssisələri rüşvət və korrupsiya yuvasına çevrilib. Bu siyahıda Şamaxı Dövlət Regional Kolleci ön sıralarda gəlir desək yanılmarıq.

“Gündəm Xəbər”ə verilən məlumatlara əsasən Kollecdə hökm sürən ab-hava tədrisin demək olar ki, məhvinə səbəb olub. Tələbələr Kollecə daxil olan gündən rüşvətxorluqla üz-üzə qalırlar. Bu “möhtəşəm qarşılaşma” qeydiyyat prosesindən başlanır və sonrakı pillələrdə artan xətt üzrə davam edir. Kollecdə tələbələrdən oxuduqları üçün yox, oxumadıqları üçün pul alırlar. Semestr imtahanlarında isə əsl həngamə başlanır. Bildirirlir ki, imtahanlar zamanı Kollecdə əsl bazar açılır. Müəllimlər isə qiymətlərin baha olduğuna etiraz edən tələbələrə “ direktorun faizi çoxdur, bizə bir şey qalmır” deyərək cavab verirlər.

Aldığımız məlumatlara görə kollecin direktoru İlham müəllim idarəetmə prinsipində pul əsas meyardır. Hətta vəziyyət elə acınacaqlı hal alıb ki, nəinki tələbələr, hətta müəllimlər də narazılıq edirlər. Adlarının çəkilməsini istəməyən müəllimlər bildirir ki, artıq pedaqoji kollektiv İlham müəllimin rüşvət mexanizminin bir hissəsi olmaq istəmirlər. Kollecdə baş verənlər müəllim adına heç də baş ucalığı gətirmir.

Kollecdə tələbələrin aylığa buraxılması adi hal alıb. “Qayıb bazarı” da şıdırğı davam edir. Dərsə gəlməyən tələbələr bunun müqabilində müəyyən haqq ödəməli olurlar.

“Gündəm Xəbər”ə daxil olan məlumatlardan belə məlum olur ki, kollecdə təhsildən başqa hər şey inkişaf edir. Bu isə təhsilimizə vurulan ağır zərbədir. Təhsil Nazirliyi və digər aidiyyatlı qurumlar isə nədənsə hələ də bu acınacaqlı duruma seyrçi mövqedə dururlar.

Yəqin ki, ölməz Sabir Şamaxı Dövlət Regional Kollecində baş verənləri görsəydi yenə də deyərdi :

“Vah, bu imiş dərsi-üsuli-cədid,

Yoxx! Yox! oğul, məktəbi-üsyandı bu!

Dur qaçaq, oğlum, baş-ayaq qandı bu!.. “

Rahib
gundemxeber.az