Çərşənbə axşamı cənab Prezident "Regionların 2014-2018-ci illərdə sosial-iqtisadi inkişafı Dövlət Proqramı"nın icrasının yekunlarına həsr olunmuş konfransda vurğulayıb ki, “bölgələrdə bir çox iş yerləri açılıb, qeyri-neft sektorunun inkişafına dəstək verilib.

Dövlət strukturlarında aparılan islahatlar sadəcə olaraq idarəetmə mexanizminin təkmilləşməsinə yönəlib. Əlbəttə, dövlət müəssisələrində işləyən vətəndaşlar öz işlərində qalacaqlar. Özəl sektor da heç bir ixtisar aparmamalıdır, əksinə, dövlətin bu qədər dəstəyi müqabilində daha çox iş yerləri açmalıdır" deyib.

Bir neçə gün bundan öncə qədim Gəncədə xalçaçılıq sənətinin hansı qaydada inkişaf etməsi ilə bağlı apardığımız araşdırmalar zamanı, mərhum prezidentimiz Heydər Əliyevin və Türkiyənin sabiq prezidenti, mərhum Süleyman Dəmirəlin xalça üzərinə həkk olunmuş portretini ərsəyə gətirən sənətkar Kifayət Babayeva ilə görüşdük. Görüş zamanı bəlli oldu ki, 1996-cı ilin mart ayında Kifayət Babayeva tərəfindən toxunulmuş xalça, Azərbaycan və Türkiyə cəmiyyətləri tərəfindən yüksək sənət əsəri kimi qəbul olunur. Bəlkə də bu günə kimi həmin xalçanın kim tərəfindən ərsəyə gətirilməsi ilə bağlı bir kimsənin xəbəri olmayıb. Yəqin ki, bu möhtəşəm sənət əsərini ərsəyə gətirən Göyçə mahalının Basarkeçər rayonunun Zərkənd kəndində dünyaya göz açan Babayeva Kifayət Ismayıl qızının qohumlarından biri Prezidentin ətrafında olsayıdı, o halda o, böyük reklamlarla ictimailəşdirilmiş olardı. Təəssüf hissi ilə qeyd edək ki, bu gün Kifayət Babayevanın maddi durumu heç də ürəkaçan deyil. O, cənab Ilham Əliyevin və mərhum Heydər Əliyevin əksini yan-yana xalça üzərinə yüksək ustalıqla həkk edib. Belə bir sənət əsərini ərsəyə gətirən bu xanımın Prezidentin diqqətindən kənarda qalmasında, məhz Gəncə şəhər Icra Hakimiyyəti başçılarının məhsuliyyətsizliyi olub desək, heç də yanılmarıq. İnanırıq ki, Prezident belə bir sənət əsərini ortalığa çıxaran şəxsin kimliyi haqda məlumatlı olarsa, o halda Kifayət Babayevanı diqqətdən kənarda saxlamaz.

Yeni xalça fabrikləri tikiləcək Prezident çıxışında onu da vurğulayıb ki, indiyə qədər 20 xalça fabriki işə salınıb və hər fabrikdə xüsusilə qadınlar üçün orta hesabla 100, yaxud 150 iş yeri yaradılıb. Mən fabriklərin əksəriyyətinin açılışlarında iştirak etmişəm və görmüşəm ki, buna nə qədər böyük ehtiyac var. Bu qadınları işlə təmin etmək, qədim milli sənətimizi yaşatmaq üçün çox düşünülmüş bir addımdır. Bütövlükdə isə bizdə 31 xalça fabrikinin tikilməsi nəzərdə tutulur və burada təqribən 5 minə yaxın iş yeri açılacaq".
İlham Əliyev onu da əlavə edib ki, “bu il Sumqayıt şəhərində əyirici-boyaq fabrikinin açılışı gözlənilir və bundan sonra xalça istehsalında xarici xammaldan asılılıq aradan götürüləcək. Bundan başqa iplik və hazır tekstil fabriklərinin tikilməsinə də ehtiyac var. Bizdə iplik fabriklər var. Verilən məlumata görə, tədarük edilən pambığın təxminən 50 faizi artıq Azərbaycanda emal olunur və bu, əlavə dəyər yaradır". Ancaq potensialın daha böyük olduğunu vurğulayan prezident, ölkədə pambıq istehsalının artdığını deyib və sahibkarların iplik fabriklərinin tikilməsinə ciddi yanaşmasını tövsiyə edib.

GundemXeber.Az