“Yeni Həyat Şirkətlər Qrupu”nun rəhbəri Babək Babayev öz qanunsuz fəaliyyətində Prezident ailəsinin adından istifadə edir”.

Gudnemxeber.Az hurriyyet.org-a istinadla bildirir ki, bu iddialar vətəndaş Sübhan Zayıdovun ölkə başçısına ünvanladığı teleqramdandır.

Surətləri I Vitse-prezident Mehriban Əliyevaya, Prezident köməkçisi Fuad Ələsgərova, Ədliyə naziri Fikrət Məmmədova, Ali Məhkəmənin sədri Ramiz Rzayevə və digər yetkililərə göndərilən teleqramda sözügedən şirkətlər qrupunun onun mülkiyyətində olan 5 hektar ərazini necə ələ keçirdiyindən bəhs edən S. Zayıdov, bunu dövlət imicimizə, ölkə rəhbərinin fəaliyyətinə kölgə saldığına inanır və üz tutduğu ünvanlardan üzləşdiyi haqsızlığın qarşısının alınamasını xahiş edir.

Teleqramda deyilir:

“Azərbaycan Respublikasının Prezidenti İlham Əliyev Cənablarına

Azərbaycan Respublikasının I Vitse-Prezidenti Mehriban Xanım Əliyevaya

Azərbaycan Respublikasının Prezident Administrasiyasinin Hüquq Mühafizə Orqanları İlə İş Və Hərbi Məsələlər Üzrə Şöbə Müdiri, Prezident Köməkçisi Fuad Ələsgərova

Məhkəmə Hüquq Şurasinin Sədri, Ədliyyə Naziri Fikrət Məmmədova

Azərbaycan Respublikasının Ali Məhkəmənin Sədri Ramiz Rzayevə

Azərbaycan Respublikasının Baş Prokuroru Cənab Zakir Qaralova

Azərbaycan Respublikasının Daxili İşlər Naziri Cənab Ramil Usubova

Azərbaycan Respublikasının İqtisadi İnkişaf Naziri Cənab Şahin Mustafayevə

Prezident Yanında Apellyasiya Şurasının Sədri Cənab Eldar Nuriyevə


Cənab prezident,

Dəyərli zamanınızı almağımın səbəbi ən elementar insan haqlarından sayılan mülkiyyət hüququmun pozulmasıdır. Hüquq mühafizə orqanlarindan tutmuş ən müxtəlif instansiya məhkəmələrinə qədər etdiyim müraciətlərim heç bir nəticə vermir. Məcbur olub son ümid yeri kimi sizə üz tuturam. Ümidvaram ki, mənim haqq səsimə səs verəcək, pozulan hüququmun bərpasina çalişacaqsiniz.

Qarşılaşdığım problemin qisa məzmunu belədir: 2004-cü ildə “mərmər” acs-dən aldiğim 5 ha. Ərazi 10 ildən sonra məndən xəbərsiz “yeni həyat şirkətlər qrupu” mmc-yə aid bir törəmə şirkətə satilmişdir. Əmlak məsələləri üzrə dövlət komitəsi və digər özbaşina məmurlar tərəfindən kobud şəkildə pozulan hüquqlarim hələ də öz ədalətli həllini gözləyir. Ən pis cəhət isə ondan ibarətdir ki, “yeni həyat şirkətlər qrupu”-nun rəhbəri babək babayev öz qanunsuz fəaliyyətində prezident ailəsinin adindan istifadə edir. Bütün bu məkrli məqsədin sizin fəaliyyətinizə və dövlətimizin imicinə kölgə saldiğini nəzərə alib mülkiyyət hüququmun aqibətilə maraqlanacağiniza inaniram.

Hörmətlə: Sübhan Zayidov”



Problemin kökü: Rafiq Cəlilovun dövlətdən 10 qat artıq qazanmaq istəyi

Qeyd edək ki, S.Zayıdovun 15 il əvvəl “Mərmər” ASC-dən aldığı, Bakı şəhəri, Xətai royanu, Əhmədli yaşayış sahəsi, Zığ şosesi 5/1 ünvanında yerləşən sözügedən 5 hektarlıq ərazi bütün hüquqi prosedurlardan keçməsinə baxmayaraq, Əmlak Məsələləri üzrə Dövlət Komitəsində əngəllə üzləşmiş, iddiaçının bildirdiyinə görə, özəlləşdirilməsi Komitənin sədr müavini Rafiq Cəlilovun dövlət rüsumundan 10 qat artıq rüşvət istəməsi nəticəsində baş tutmamışdır. Üzərindən 10 keçəndən sonra həmin ərazi mülkiyyətçinin razılığı alınmadan “Yeni Həyat Şirkətlər Qrupu”nun törəmə şirkəti “Baxçasaray” MTK-nın adına rəsmiləşdirilmişdir. Araşdırmalarımız nəticəsində məlum olmuşdur ki, adı “Baxçasaray” MTK-nın rəhbəri kimi rəsmiləşdirilən Baxşıyev Akif Barat oğlu Babək Babayevə yad biri deyil, onun yeznəsi imiş. Yeznə-qayının birlikdə özgə əmlakını özününküləşdirmə əməliyyatlardan “Yeni Həyat Şirkətlət Qrupu”nun ərazidə tikinti işinə başlamasından sonra xəbər tutan S.Zayıdov dəfələrlə Babək Babayevlə görüşsə də, onu öz mülkiyyət hüququna hörmətlə yanaşmağa dəvət edə bilməmişdir. Mülkiyyətin əsl sahibinin tələblərinə saymazyanalıqla cavab verən Babək Babayev nəyin bahasına olursa olsun, haqsız mövqeyindən geri çəkilməyəcəyini şikayətçinin nəzərinə çatdırmış, “kimə şikayət edirsən et” deyərək, özünü ölkənin əsl sahibi kimi aparmışdır.

“Əmlak Komitəsi”nin səhlənkarlığı nəticəsində əmlakı qanunsuz yolla əlindən alınan S.Zayıdovla B.Babayev arasında böyüyən mübahisə məhkəmə salonlarına daşınmışdır. Maraqlıdır ki, mülkiyyətin ilk sahibinin əlindəki bütün hüquqi sənədlər də məhkəmlərdə işə yaramamış, həm Xətai rayon, həm də Bakı Apellyasiya Məhkəkəmələrinin qərarı əsl mülkiyyətçinin əleyhinə verilmişdir.

“Yeni Həyat”ın əsrarəngiz gücü

“Yeni Həyat Şirkətlər Qrupu”nun bu qəti qələbəsində Babək Babayevin arxasındakı qüvvələrin mühüm rolu olduğu bildirilir. Bəs, “Yeni Həyat” hüququ elə zəlil gününə salan bu gücünü hardan alır?

İnformasiya qaynağımızın iddiasına görə, Babək Babayev hər kəsə özünü Prezidentin qızı Arzu Əliyevanın adamı, “Yeni Həyat”ı isə “ailənin şirkəti” kimi təqdim etsə də, əslində onun arxasında sabiq Vergilər naziri Fazil Məmmədov dayanırmış: “Fazil Məmmədovun himayəsindən istifadə edən “Yeni Həyat” indiyə qədər xeyli insana fırıldaq gəlib və bu özbaşınalıqda həmişə Prezident ailəsinin adından istifadə edib. Məhz bu səbəbdən bir çox iş adamları Babək Babayevin qanunsuz fəaliyyətinə susmaq məcburiyyətində qalıb. Görünür, Azərbaycan məhkəmələrini də ədalətsiz qərar verməyə vadar edən də məhz sabiq Vergilər nazirinin əsrarəngiz gücü olmuşdur”.

Məsələylə bağlı mövqeyini soruşduğumuz bəzi ekspertlər də vətəndaşın başına gətirilmiş bu oyunlarda Prezident ailəsinin əli olacağı fikrini yaxına buraxmırlar. Onların fikrincə, Prezident ailəsinə məxsus şirkətlər iqtisadi münasibətdə olduqları tərəflərin razılığını mütləq alır və halallaşırlar. “Yeni Həyat”-ın mülkiyyət sahibləriylə hesablaşmayaraq, işi “Əmlak Komitəsi”ndə qanuna zidd üsullarla həll etməsi, tərz etibarilə bu kriteriyalara uyğun gəlmədiyindən məlum ailənin adından mərkli niyyətlə istifadə edildiyi ortadadır.

“El bizim, sirr bizim” çərçivəsi

Tərəflər arasındakı mülkiyyət çəkişmələri hazırda Ali Məhkəmənin icraatındadır. Aprel ayının 2-də son məhkəmə instansiyasında müzakirəyə çıxarılması gözlənilən məsələnin necə həll ediləcəyi bilinmir. Bu instansiyadan da rədd cavabı alan şikayətçinin Avropa İnsan Hüquqları Məhkəməsinə müraciət etməkdən başa çarəsi qalmır. Bəs, şikayətçi bu hüququndan istifadə edəcəkmi?

Əməkdaşımızın suallarını cavablandıran şikayətçi problemin bu həddədək uzanacağına inanmır, Azərbaycan məhkəmə sisteminin, o cümlədən Ali Məhkəmənin sədri Ramiz Rzayevin işə ədalətli baxıb obyektiv hüquqi qiymət verəcəyini, beləcə, mülkiyyət hüququnun bərpa ediləcəyini düşünür. Onda bu inamı yaranmasının əsas səbəbi isə ölkə başçısının Novruz bayramı təbrikində Azərbaycan xalqına hüquq-məhkəmə sistemində islahatlara başlayacağı vədiylə bağlıdır. Zayıdovun fikrincə, islahatlar ərəfəsində Ali Məhkəmə açıq-aşkar insan hüquqları pozuntusuna gedə bilməz, əks halda Prezidentin qəzəbiylə üzləşər:

“Biz də məsələnin böyüməsində və ölkə sərhədlərimizdən kənara çıxmasında maraqlı deyilik. Xüsusilə, Azərbaycanın döst və düşmənlərinin marıqda gözlədiyi indiki şəraitdə dövlətimizin üzərində toz qondurmaq istəmirik. Buna görə də məsələnin “el bizim, sirr bizim” çərçivəsində həll olunacağına inanırıq. Ümidvarıq ki, Azərbaycan rəhbərliyi, o cümlədən Ali Məhkəmə də bu məsələdə ən azı bizim qədər maraqlıdır. Azərbaycanda bir sıra islahatlara start verəcəyini elan edən rəsmi iradənin də ən elemantar insan haqlarından sayılan mülkiyyət hüququmuzun bərpasına çalışacağına inanırıq. Ən azı ona görə ki, xarici və yerli investisiyalara qapılarını açan Azərbaycan iqtisadiyyatı ilk işə mülkiyyət hüququna hörmətlə başlamalıdır. Yalnız bu zaman qeyri-neft sektorumuza ciddi yatırımlar qoyuluşuna ümid edə bilərik”.

Vətəndaşın bu ümidlərinin nə dərəcədə doğrulub-doğrulmayacağı bir neçə gündən sonra bəlli olacaq. Necə deyərlər, yaşayarıq, görərik.