Moskvada yaşayan azərbaycanlı jurnalist, diaspor fəalı Fuad Abbasovun saxlanılmasına münasibət birmənalı deyil.

Azərbaycanda, Rusiyada, Türkiyədə, Avropada və dünyanın müxtəlif ölkələrində yaşayan soydaşlarımızın, ictimai-siyasi fəalların, jurnalistlərin əksəriyyəti hesab edir ki, Fuad Abbasova qarşı haqsızlıq olub.

Həqiqətən də Rusiya hüquq-mühafizə orqanlarının ona qarşı davranışı, onun saxlanılıb polis avtomobilinə əyləşdirilməsi epizodu insan hüquq və azadlıqlarına ziddir. Rusiya polisi işi televiziya debatlarında iştirak etmək, araşdırma aparmaq və videobloqqerlik olan Fuad Abbasova qarşı terrorçuya olan münasibəti göstərib. Sanki tutulan jurnalist deyil, terrorda əli olan hansısa mücahiddir. Məlumdur ki, Fuad Abbasovun jurnalist fəaliyyəti Rusiyada müxtəlif dairələri narazı salmışdı.

Müəyyən informasiyaya malik olan Fuad Abbasov televiziya verilişlərində daim Azərbaycanın, Türkiyənin mövqeyindən çıxış edir, milli maraqlarımızı qoruyur, ermənilərin təbliğat şəbəkəsində qarşı cəsarətlə çıxırdı. Onun həbsində erməni izinin olması artıq heç kimə sirr deyil. Fuad Abbasovun saxlanılmasında onun fəaliyyətinə qısqanc yanaşan milli satqınların rolu da şübhəsiz ki, yox deyil. Aydın görünür ki, Fuad Abbasovun saxlanılmasında 3 tərəfin kəsişən maraqları olub: Azərbaycanlıların toparlanmasını istəməyən Rusiya hakimiyyət orqanları, erməni diasporu və jurnalisti sevməyən bəzi azərbaycanlı diaspor fəalları. İndiki durumda F.Abbasovu müdafiə etmək hər bir azərbaycanlının borcu olmalıdır. Ən azı, adamın fəaliyyəti ortadadır. O, iştirak etdiyi tədbirlərdə bacardığı qədər Azərbaycanın maraqlarını qoruyub, diasporumuzun birləşməsinə çalışıb. Lakin Fuad Abbasovun fəaliyyətinə barmaqarası yanaşanlar da var. Başda Milli Şura olmaqla özünü “ana müxalifət” adlandıran qüvvələr Fuad Abbasovun saxlanılmasına adekvat reaksiya göstərmədilər. Hər halda bu qurumların baş vermiş hadisə ilə bağlı bəyanatı olmadı. Əksinə, Milli Şuraya yaxınlığı ilə seçilən, Əli Kərimli ilə eyni mövqedən çıxış edən, Avropada yaşayan sabiq səfir Arif Məmmədov Fuadla bağlı məsələyə əcayib yanaşması ilə yadda qaldı. Arif Məmmədov öz Facebook səhifəsində Fuad Abbasovun həbsini qurama iş kimi qiymətləndirib, jurnalisti dəstəkləyənləri təhqir edib:

“Maraqlıdır, ölkədə nə qədər səfeh böyük və kiçik teatrın artistinin ifasında bu ucuz tamaşaya inanan var. İnananlar mənim dostluğumdan çıxsın, xahiş edirəm. Səfehlərdən zəhləm gedir”.

Azərbaycana demokratiya, hüquqi dövlət, qanunçuluq, sosial rifah gətirəcəyini iddia edənlərdən biri olan Arif Məmmədov haqqı tapdanılan soydaşımıza qarşı bu cür laqeyd, etinasız, qəddar münasibəti anlaşılan deyil. Bu düşüncədə olan adam iqtidarda təmsil olunsa, Azərbaycana, dünyaya səpələnmiş soydaşlarımıza necə xidmət edəcək? Hansı ölkədə yaşamasından asılı olmayaraq Azərbaycanı təmsil edən, azərbaycanlıları qoruyan, milli maraqlarımızı müdafiə edən hər bir soydaşımız bizim üçün dəyərdir. Arif Məmmədovun dəyərlərimizə münasibəti budurmu? Azərbaycan dilini belə pis bilən rusdilli Arif Məmmədov bu statusu da rus dilində yazıb. Yəqin ki, Rusiyada yaşayan azərbaycanlılara təsir etmək üçün fikrini bu dildə ifadə edib. Fuad Abbasovun o şəkildə saxlanılması və Azərbaycana deportasiya olunacağı ilə bağlı xəbərlərin yayılması göstərir ki, soydaşımız Rusiya tərəfi üçün arzuolunmaz şəxsdir. Rusiya hakimiyyət dairələrinə diasporu birləşdirməyə, fəallaşdırmağa çalışan, azərbaycanlılar haqqında formalaşdırılmış “bazar adamı”, “gülsatan” obrazlarını dağıdan intellektual jurnalist, düşüncə adamı lazım deyil.

Maraqlıdır ki, sabiq səfir Arif Məmmədov da bu məsələdə Rusiyanın maraqlarından çıxış edir. Hadisələrin indiyəqədərki gedişatı belə düşünməyə əsas verir. Məlumatlara görə, Moskvada yaşayan bəzi azərbaycanlılar, xüsusilə Azərbaycan üçün müəyyən fəaliyyəti olanlar Fuaddan ötrü onun saxlandığı yerə, Moskva vilayətinin Korolyov şəhərinə gediblər. Hətta həmin gün polis idarəsində olan növbə rəisinin onlara Fuadın sifariş əsasında saxlandığını deydiyinə dair də xəbərlər gəlib. Söhbətin məhz hansı dairələrin sifarişindən getdiyinə dair müzakirələr var. Ortaq rəy belədir ki, Fuad Abbasova qarşı bu münasibət Rusiya xüsusi xidmət orqanları ilə hansısa əlaqəsi olanların mövqeyidir. Görünür, Arif Məmmədov da bu yanaşması ilə Fuad Abbasovu aşağılayan Rusiya hakimiyyət dairələrinin əlinə oynayır. //Cebhe.info