Gəncə məhbusu Elvin Nəzərovun səhhətində çox ciddi problemlər yaranıb. GundemXeber.Az çoxsaylı oxucularına bildirir ki, bu barədə vetenugrunda.az-a onun xanımı Şəbnəm Nəzərova məlumat verərək bildirib:

"Elvin hər gün qusur, şiddətli baş ağrılarından bayılmaq həddinə çatır. Belə olanda ona sadəcə ağrıkəsici verirlər.
Dəfələrlə rəhbərliyə müraciət etsə də onun müayinəsini təşkil etmirlər. Əslində Elvin MRT (Maqnit rezonans tomoqrafiyası) müayinəsindən keçməlidir. Ən azından bu vəziyyəti yaxşılaşana qədər Müalicə Müəssisəinə köçürülməlidir".

Şəbnəm Nəzərova 2 saylı Cəzaçəkmə müəssisəsində saxlanan həyat yoldaşının görmə qabiliyyətinin zəiflədiyini bildirib: "Sağ gözündə görmə qabiliyyəti zəifləyib. Demək olar ki, görmür. Heç bir soyuqlaması olmadığı halda tez-tez qusur. Elvin istintaq zamanı dəhşətli işgəncələrə məruz qalıb. O, bütün bunların o işgəncələrin təsirindən yarandığını deyir".

Tətil günü olduğu üçün Pentensiar Xidmətlə əlaqə saxlamaq imkanımız olmadı.
Qeyd edək ki, vetenugrunda.az məhkəmə prosesi zamanı məktub ünvanlayan Elvin Nəzərov ona verilən işgəncə faktlarına da toxunmuşdu: "Məni şöbəyə gətirdikləri andan döyməyə başladılar. İlk dəfə döyməyə başlayanda qollarımı qandalladılar, gözümə də qara dəsmal bağladılar ki, döyənlərin üzünü görməyim. Ağzımı "skoçla" bağlamaq istəyəndə dedim ki, burnumdan nəfəs ala bilmirəm, ancaq ağzımdan nəfəs alıram. Əgər ağzımı da bağlasanız boğulub öləcəm. Mən qışqırmayacam, səsimi çıxarmayacam, dözəcəm ağzımı bağlamayın.
Birinci gün qollarımı qandallayıb, ayaqlarımın altına dubinka ilə var gücləri ilə döydülər. Böyrəklərim və ciyərlərim dağılsın deyə, dubinkanı o qədər möhkəm vururdular ki, huşumu itirirdim. Sonrakı günlərdə də hər gün səhərdən-axşama qədər məni döyürdülər. Huşumu itirəndə su tökürdülər üstümə, ayılırdım və yenidən döyürdülər.
Bir gün məni rütbəli birinin otağına apardılar. O, özünü təqdim etmədi və kobudluqla soruşdu ki sənin uşağın var. Məndə dedim ki, bəli, var. Mənə "sən nəsənki, sənin uşağın da nə olsun" deyəndə, ona layiq olduğu cavabı verdim. O, çox qəzəbləndi, yanındakılara "aparın bunu, ölüncə döyün, o kimdi axı mənə cavab qaytarmağa cəsarət edir" dedi. Bu olaydan sonra məni daha dəhşətli döyürdülər. Yorulanda isə pol ağacının sapı ilə döyürdülər. Hər yerimə vururudlar. Bütün bədənim qanın içində və gömgöy idi.
Bir dəfə iri əlləri olan adamdöyənlər qulağımın pərdəsini partlatmaq üçün var qüvvələri ilə başıma və qulağıma zərbələr endirirdilər. Ağzım burnum qanla dolmuşdu. Qulağımın pərdəsinin hələ də partlamadığını görəndə iri kitabları götürüb başıma və qulaqlarıma yenidən zərbələr endirdilər. Mən huşumu itirdim, su töküb ayıltdılar və yenidən döyməyə başladılar.
Bu zaman adamdöyənlərdən bir nəfər dedi k, mən daha yaxşı "metod" bilirəm. Bu "metodla" döysək, o, huşunu itirəcək, biz də belə yorulub, əldən düşməyəcəyik. Beləliklə, boğazımın altındakı, sinə sümüyünün yuxarı hissəsindəki yerlərə vurmağa başladılar. Bu çox dəhşətli ağrı verirdi və mən bayılırdım.
Sonra qollarımı arxadan qandallayıb çox iriçəkili bir nəfəri belimin üstündə oturdub məni dəhşətli şəkildə döyməyə başladılar. Alışqanı yandırıb belimə tuturdular və saxlayırdılar. Belim yandıqca ağrının şiddətindən bayılırdım.
O qədər döydülər ki, bütün bədənim göyərmişdi, mən qan içində idim, ağrıdan ayaqüstə dayana bilmirdim, oturmağa da qoymurdular. Kimsə dedi ki, bu adamı niyə ayaq üstə saxlamısız, qoyun otursun. Oturmaq istəyəndə otura bilmədim. Ayaqlarımın altına dubinka ilə o qədər döymüşdülər ki, ayağımı yerə basa və ayaqqabı geyinə bilmirdim.
Hər gün səhərdən-axşama qədər dayanmadan döyürdülər. Başımı iki nəfər möhkəm tuturdu, başımı tərpədə bilmirdim, digərləri üzümün tüklərini bir-bir dartıb çıxarırdı.
Məni yerə uzadıb 5-6 nəfər başıma təpiklə döyürdülər. 7 ay keçməsinə baxmayaraq, hələ də üzümdə o təpikləmənin izi qalıb.
Bir dəfə xahş etdm ki, qollarımı açın namazımı qılım, icazə vermədilər".
Elvin Nəzərova işgəncə verənlər ondan etmədiyi əməlləri haqqında ifadə verməsini tələb ediblər.
Ona Nizami polis İdarəsində və Kəpəz Polis İdarəsində işgəncə verilib. 2018-ci il 11 iyulda həbs edilən Elvin Nəzərova 9 gün ağlasığmaz işgəncə verildiyini və bu 9 günün məhkəmə işinə əlavə edilmədiyini bildirib.
Bu məhkəmədə 7 il həbs cəzası verilən digər Mingəçevir sakini Elvin Allahverdyev də Elvin Nəzərovla birgə saxalnıb. Elvin Nəzərov və Elvin Allahverdiyev dostları Renat Məmmədovun maşını ilə digər dostları, Mingəçevir sakini Vüqar Xudiyevin polis idarəsində saxlandığını eşidib onun yanına yemək gətiriblər. Bu üç dost heç bir səbəb göstərilmədən saxlanıb, telefonları əllərindən alınıb və olmazın işgəncələr verilib ki, onlara təqdim olunan ifadələrə imza atsınlar.

GundemXeber.Az