Jurnalist Tunay Əliyeva hüquq müdafiəçisi Oqtay Gülalıyevin koma vəziyyətində yatdığı Türkiyənin ''Amerikan'' xəstəxanasında olub. Xanım jurnalist Oqtay bəyin həyat yoldaşı Firuzə xanımdan geniş video müsahibə götürüb. Bu haqda Gülalıyevin oğlu Təbriz bəy məlumat yayıb. Həmin məlumatı olduğu kimi oxucuların diqqətinə təqdim edirik:

''Bu gün jurnalist Tunay Aliyeva xanım atam Oktay Gülalıyev i ziyarət edib. Həmçinin anamnan müsahibə götürüb.

Anamın da dediyi kimi, atamın bu durumda olmasının tək səbəbi CİTY Hospitalında əməliyyatının gecikdirilməsidir. Bildiyiniz kimi Semoşka adlanan xəstəxanadan qəza günü oktyabrın 29-u axşam 21:00 radələrində atam CİTY Hospitalına köçürülüb. Xəstəxanada dərhal müdaxilə etmək əvəzinə yalnız sistem və ağrı kəsici verərək gözlədiblər. Adı çəkilən xəstəxananın baş "həkimi" Toğrul Adıgözəlov tezdən 6:00 radələrində anam ilə birlikdə atamın yanına otağa keçiblər. Toğrul Adıgözəlov ağzında saqqız, əlinde fənərlə atamın bərəlmiş gözünə tutaraq bildirib ki: "Baxın görün sizin yoldaşınız nə durumdadı. Komaya düşüb, bir gözü bərəlib, əli ayağı qıc olub" ?! Bu cür qeyri insani formada danışaraq anama psixoloji əzab verib. Bu o deməkdir ki, xəstexananın baş həkimi atamın bu durumda olduğunu bilərək, yenə də heç bir tədbir görülməsini tələb etməyib. Atamı saat 12 de müayinəyə aparıb, 13:00 radələrində son nəfəsində əməliyyat ediblər. Hansi ki, əməliyyatı da bizim kənardan dəvət etdiyimiz həkim edib. Və onlar bildiriblər ki, əməliyyat bir az da gecikdirilsə idi xəstəni itirə bilərdik..
Atam ilk öncə şübhələrlə dolu qəza keçirdir. Sonra isə CİTY hospitalında ona qarşı belə qəsd olunur. Qəza ilə bağlı heç bir açıqlama verilmir. Hətta qəzanı edən Kənan Abdullayev adlı sürücü sərbəst buraxılıb. Bəs xəstexanada bilərəkdən əməliyyatın gecikdirilməsinə nə cavab verəcəksiniz? Bu heç də Azərbaycanda səhiyyə səviyyəsinin aşagı olmasınnan irəli gəlməyib. Tam olaraq sifarişli şəkildə, bilərəkdən əməliyyatı 18 saat gecikdiriblər. Atam Oqtay Gülalıyevin indiki duruma düşməsinə səbəb olan hər kəsin cinayətə cəlb edilməsini tələb edirik. Bütün etdiklərinizə görə mütləq bir gün cavab verəcəksiniz!''



Gundemxeber.Az