Bir müddət əvvəl bəzi KİV-lərdə Dövlət Sərhəd Xidmətinin ( DSX ) polkovniki Nemət Pənahovun həbsi və istintaqı ilə bağlı ehtimal xarakterli məqalə dərc olunmuşdu.

Məqalədə qeyd olunurdu ki, Nemet Pənahovun vəzifə pillələrində irəliləməsində onun qaynı Azərbaycan Güləş Federasiyasının birinci vitse-prezidenti, həmçinin DSX-nin zabiti, “Sərhədçi” İdman Klubunun rəis müavini Firdovsi Umudovun böyük rolu olub.
Loru dildə desək Firdovsi Umudov bacısının yoldaşı Nemət Pənahova dəstək olub, ağsaqqallıq edib. Yəni yazının qısa məzmunu bu qədər.

Gundemxeber.Az nuh.az-a istinadla bildirir ki, yazının rəngi qurumamış Firdovsi Umudovun ölkənin böyük xəbər portallarına açıqlama verməsi, geniş müsahibəsi istər-istəməz suallar doğurur. Görəsən xırda bir yazı cənab Umudovda niyə bu qədər aqressiya doğurub? Axı yuxarıda qeyd etdiyimiz kimi söhbət böyük bir ittihamdan, cinayətdən getmir. Sadəcə, Azərbaycan reallığında adi olan bir şeydən -qohumların bir-birinə dəstəyindən gedir. Bu gün Azərbaycanda vəzifədə olan qudalar, bacanaqlar, yeznə-qayınlar N qədərdir. Bəs Firdovsi müəllim bu xırda yazını niyə top-tüfənglə qarşılayıb? Zəng edib öz mövqeyni bildirə, təkzib tələb edə, Mətbuat Şurasına müraciət edə və s bilərdi.
Əlbəttə hər kəsin, o cümlədən Firdovsi müəllimin hüququdur ki, öz mövqeyni əsaslandırmaq üçün müsahibə də verə bilər, açıqlama da. Ancaq cənab Umudov öz müsahibəsində guya ona hucum eden ölkəmizi istəməyən "5-ci kolondan", trollar ordusundan və daha nələrdən bəhs etmir ?

Möhtərəm Umudov!

Siz ictimai-siyasi xadim, partiya sədri, yaxdu siyasi təşkilat rəhbəri və s deyilsiniz axı, sizə qarşı dediyiniz hücumlar olsun. Siz idmançısınız, hansısa siyasi tərəfi təmsil etmirsiniz ki, sizə qarşı dediyiniz total hücumlar olsun. Vallah, görünür sizi narahat edən başqa məsələdir. Siz nə üçün dəvət olunduğunuz verilişlərdə guya sizə qarşı qərəzli kampaniyalar aparıldığından danışırsınız? Axı siz müxalifət lideri, yaxud iqtidar mənsubu deyilsiniz ki, sizə qarşı qərəz olsun. Siz hər vəchlə məsələni siyasiləşdirmək, belə demək mümkünsə, qan çıxmayan yerdən qan çıxartmaq istəyirsiniz. Bu bəlkə də sizin idmançı xarakterinizdən əmələ gəlir. Düzü, müəyyən etmək çətindir.

Siz deyirsiniz ki, guya bu xırda yazıdan sonra Qazax camaatı qəzəblənib, minlərlər insan, idmançılar ordusu, rayon ictimaiyyəti sizə dəstək verir. Bəlkə bununla siz kimlərəsə, bəlkə istintaqa təsir etmək istəyirsiniz. Əgər belə niyyətiniz varsa, cənab Umudov, biləsiniz ki, elə şeylər ötən əsrin 90-cı illərində qaldı.

Digər tərəfdən siz iki yaxın qohumun eyni qurumda çalışması da haqlı suallar doğurur. Siz özünüz bilirsiniz ki, yaxın qohumların eyni qurumda çalışması korrupsiyanın səbəblərindən biridir.
DSX-da baş verənlər isə o dərəcədə korrupsiya şəbəkəsidir ki, artıq DSX-nın generalı ittiham olunur. Deyirsiniz bu barədə yazmayaq ?
Axı, cəmiyyətin də haqlı sualları var. Biz demirik ki, deyilənlər hamısı Quran ayəsidir. Ancaq ehtimal olunan bütün variantlar cəmiyyətin diqqətində olmalı və istintaqın nəzarətindən qaçmamalıdır.
Biz kimisə cinayətkar elan edə bilmərik, bu məhkəmənin səlahiyyətində olan məsələdir.
Sizin narahatçılığızın səbəbini tam dəqiqliklə bilmirik. Amma bizi narahat edən məsələləri açıq yazırıq. Bu medianın əsas funksiyasıdır. Ölkə başçısı hörmətli İlham Əliyev cənabları da dəfələrlə mediaya üz tutaraq deyib ki, yazın, məni məlumatlandırın. Bu qədər sadə.
Növbəti yazıda Firdovsi Umudova suallarımız olacaq:

- Xaricə aparılan qara kürünün trafikində idmançılardan istifadə edilirmi ?

-Kürü məsələsində Güləş Federasiyasının vitse prezidenti hansı zavoda “krışa”lıq edir ?

- Brokonyerlerlə Xəzərin kürüsünü talan edən və beynəlxalq yarışlar adı ilə xaricə daşıyan Nemət Pənahov ilə cənab Firdovsi Umudovun işbirliyi olubmu ?

GundemXeber.Az