İyul ayının 24-dən sosial şəbəkələrdə, əsasəndə, Az.TV-nin efirindən eşitdiyim bir xəbər məni bir xeyli düşünməyə məcbur etdi. Aparıcıların tövşüyə-tövşüyə, tələm-tələsik oxuduqları bu xəbərin əsasını bir qrup jurnalistin Azərbaycan Respublikasının Prezidenti cənab İlham Əliyevə etdiyi müraciət təşkil edirdi. Müraciətdə bu jurnalistlər Prezidentdən xahiş edirlər ki, onlar üçün tikilən 3-cü binanın mənzillərini şəhid ailələrinə, qazilərə versin. Çox maraqlı bir tendensiyadır, elə deyilmi? Məhz, bu nöqteyi-nəzərdən məsələyə ardıcıl və düşünülmüş formada yanaşmaq lazımdır.
1.Jurnalistlərin bu müraciəti AR-nın Prezident İlham Əliyevi öz Sərəncamını geri götürməyə təhrik edir. Görəsən Prezident buna gedəcəkmi?
2.Azərbaycanda yüzlərlə tikintisi başa çatmış binalar, on minlərlə hazır mənzilər var. Bəyəm büdcə ehtiyyatı 52 milyard dolları ötən dövlət jurnalistlər üçün tikilən keyfiyyətsiz binaya möhtac qalıbdır?
3.Görəsən müraciətə imzalarını atan jurnalistlər bir günün içində hardan peyda oldular, harda yığışdılar, harda belə bir müraciəti imzaladılar? Bu proses mənə Ramiz Mehdiyevin dönəmində “Ağ bina”dan gələn tapşırıqları xatırlatdı. Bəlkə Ramiz Mehdiyev-II peyda olubdur, xalqın bundan xəbəri yoxdur...
4.Təxminən bir həftə bundan öncə bir “deputat”ın səsləndirdiyi bu ideya haranın “mətbəx”ində və hansı “aşpaz” tərəfində hazırlanıb və ictimaiyyəti “zəhər”ləmək üçün masaya ötrülübdür? Sizcə 5-ci kalonun izləri burda görünmürmü?
5.Nə üçün Prezident Aparatının, Nazirlər Kabinetinin, Milli məclisin işçiləri və deputatları üçün “Ağ şəhər”də tikilən keyfiyyətli, iki mərtəbəli mənzilər şəhid ailələrinə, qazilərə təklif olunmur?
6.Bayıl çökəkliyində jurnalistlər üçün tikilən, vəsaitinin yarıdan çoxu Əli Həsənov və onun quldur dəstəsi tərəfindən mənimsənilən keyfiyyətsiz evlərin Vətən uğrunda, həyatda ən qiymətli hesab olunan canını qurban verən şəhid ailələrinə və qazilərə verilməsi, ən azından, təhqirdən başqa bir şey deyil.
7.Şəxsən mənim bu binada nə gözüm var, nə də ki, bu məzillərə ehtiyacım, sənədlərimi də təqdim etməmişəm və etməyəcəmd ə, ancaq mənə təsir edən odur ki, yüzlərlə jurnalist kirayələrdə, uçuq daxmalarda, rütubətli zirzəmilərdə yaşayır, Azərbaycanın gələcəyi üçün övlad böyüdürlər, onların da normal şəraitdə yaşamağa haqqı çatır. Əminəm ki, müraciətə imza atanların 98 %-nin mənzili var.
8.Heç kimə sirr deyil ki, bir neçə, hətta, onlarla mənzilləri olan nazirlər, deputatlar, icra başçıları, məmurlar var. Niyə onlar Vətən uğurunda şəhid və qazi olanlara bir mənzilini bağışlamır, hədiyyə etmir? Əgər onlar bunu könüllü etmirlərsə, sözsüz ki, onların dosyesi aidiyyatı orqanlarda var, onda məcburiyyət mexanizminə, əlahəzrət hüquqa, inzibati qaydalara müraciət etmək lazımdır.
Allahdan şəhidlərimizə rəhmət, qazilərimizə can sağğlığı arzulayıram. Bütün Azərbaycan müzəffər, şərəfli qələbəyə görə onlara minnətdardı. Məhz buna görə də, onlar və ya onların ailələri ən yaxşı yerlərdə, ən keyfiyyətli binalarda yaşamalıdırlar! Bunu AR-nın Prezidenti cənab İlham Əliyev ən yüksək tribunalardan dəfələrlə deyibdir.
Biz, həmişə haqqın və ədalətin tərəfindəyik...

Veydəddin Pirəliyev