Şəmkir Regional Meşə Təsərrüfatı Mərkəzinin direktoru İqbal Əliyevin Samux rayonu ərazisində dəyərli 100 minlərlə ölçülən mal-qoyun ferması üzə çıxıb. Füzuli kəndi yaxınlığındakı böyük ferma 10 hektarlarla torpaq sahəsinə sahibdir, eləcə də ferma Qarasaqqal meşəsilə əhatə olunub.

Gundemxeber.az bildirir ki, “Demokratik.Az” saytına verilən bilgiyə görə, fermada heyvandarlıq təsərrüfatı üçün hər cür müasir şərait yaradılıb. Fermaya şəxsi artezian vurulub və elektrik transformatoru çəkilib. Eləcə də irihəcmli su çənləri qoyulub, fermada çobanların bütün fəsillərdə orada qalması üçün evlər və ayrıca istirahət otaqları da tikilib. Fermada 500-dən artıq qoyun, eləcə də 50-yə yaxın iribuynuzlu malın saxlandığı iddia edilir. Aylıq maaşı 600 manatı ötməyən bir direktorun özünə belə bir güzəran qura bilməsi bir yana, fermanın yerləşdiyi yerin əslində Ekologiya və Təbii Sərvətlər Nazirliyi üçün qorunma zolağı sayıldığını, fermanın qanunsuz əsaslarla mövcud olduğunu bilmək təəssüf doğurur. Videokadrlardan aydın olur ki, İqbal Əliyev öz vəzifə səlahiyyətlərindən sui-istifadə edərək məhz Şəmkir Regional Meşə Təsərrüfatı Mərkəzinin nəzarət zonası sayılan ərazidə özünə ferma qurub.

Qeyd edək ki, İqbal Əliyev bir az da irəli gedərək fermada saxlatdırdığı mal-qaranı Qarasaqqal meşələrinə də salır, bilə-bilə təbiətin fauna-florasını öz maddi maraqlarının əsiri edir. İqbal Əliyev cari və ötən illər ərzində həmin ərazini əhatə edən 100 hektardan artıq meşə fond torpağında arpa-buğda da əkdirib. Məlumatlı mənbənin sözlərinə görə, sözügedən fermadakı yem çənlərindəki tonlarla arpa həmin əkin-biçindən tədarük edilib. Ferma ərazisində çoxlu sayda meşə ağaclarına, kötüklərə də rast gəlinir.
Adi vətəndaşlara qarşı sərt mövqe nümayiş etdirən Ekologiya və Təbii Sərvətlər Nazirliyinin və şəxsən nazir Muxtar Babayevin bu faktlardan xəbərsiz olduğunu düşünsək, vəzifə verdikləri İqbal Əliyevin fəaliyyətinə qarşı xüsusi araşdırma aparılacağına ümid edirik. Yoxsa, dəfələrlə həmin ərazilərdə “araşdırmalar aparan” 10 saylı Gəncə Regional Ekologiya şöbəsinin əməkdaşları durumu görməzlikdən gəlib acı reallıqları ekoloji xəyanətə sürükləyirlər. Nəticədə qazanan İqbal Əliyev, itirən isə zavallı təbiət olur.

Bugünlərdə 10 saylı Ərazi Ekologiya Şöbəsi vətəndaş şikayəti əsasında sözügedən əraziyə baxış keçirib və vətəndaş Kamil Zeynalovun təqdim etdiyi faktlara münasibət bildirib. Təəssüf ki, qurum İqbal Əliyevin fəaliyyətindəki nöqsanlara səthi yanaşaraq araşdırma zamanı qaldırılan faktların məsuliyyət yükünü xeyli azaldaraq yalnız tövsiyəedici məktubla işini bitmiş hesab edib.
Bir daha xatırladaq ki, İqbal Əliyev vəzifəsindən sui-istifadə edərək rəsmi müqavilə əsasında “Aqro Dairy” MMC üçün ayrılmış Qarasaqqal və Kürqırağı digər meşə fond torpaqlarından şəxsi mənfəəti üçün istifadə edib. Boş qalan meşə ərazilərində meyvə bağı (Aqropark) salınmalı olduğu halda, Samux aqroparkın inkişafı üçün nəzərdə tutulan ərazilərdə özbaşına işlər görülüb. Azından bu hallara görə Ekologiya Nazirliyi İqbal Əliyevi dərhal vəzifəsindən azad etməli idi, görünür yuxarılar üçün də bəzi özbaşınalıqlar qanun aliliyindən yüksəkdə dayanır... //“Demokratik.Az”//



Gundemxeber.Az