Bakının Xətai rayonunda Sabit Orucov küçəsində köhnə problem yenidən baş qaldırıb.

Məhəllədə obyekt tikilir. Sakinlər isə obyekt tikiləcəyi təqdirdə ağacların kəsiləcəyindən narahatdır. Musavat.com-a müraciət edən sakinlər tikintinin qarşısının alınmasını tələb edirlər.

12-12A saylı binanın sakinləri bildirir ki,3 il əvvəl budama adı altında səhər saatlarında 6 ədəd şam ağacı kəsilib. Planda ağacların yerinə beton töküb, yerində maşın yuma məntəqəsi tikmək nəzərdə tutulurmuş. O zaman Xətai Rayon İcra Hakimiyyətinin müdaxiləsindən sonra tikinti dayandırılıb. Həmin ilin may ayında bina sakinləri ümummilli lider Heydər Əliyevin “95 illik yubileyinə xatirə olaraq öz vəsaiti hesabına 12 ədəd şam ağacı əkib.

Lakin 16 iyul 2018- ci il tarixində bu dəfə gecə saatlarında həmin ağaclar da kəsilib. O zaman media da sakinlərə dəstək olub deyə tikinti dayandırılıb.

Bu gün isə məhəllədəki bu kiçicik ərazidə dükan tikilir. Ərazinin əvvəlki sahibi buranı Qarabağ qazilərinə etibarnamə ilə verib. Bina sakinləri isə buna inanmır və qəti qarşıdır:

Əzizə Zeynalova: "Bu obyekti Qarabağ əlili tikmir. Buranı başqa adam tikir,amma əlilləri qabağa verib. O ağacları özümüz əkmişik,sulamışıq.Həm də burada tikinti aparılsa,yanğınsöndürən maşın girə bilməyəcək".

Qazilər isə iddiaların əsassız olduğunu deyir: Rövşən Ağakişiyev:
"Sakinlər düz demir. Sənədlər mənim adımadır. Mən dolanmalı deyiləm?".

Şakir Hüseynzadə: "Sakinlər şikayət edəndə araşdırma aparılıb. Sənədlər qaydasındadır".

Dönməz Həsənov: "Çox adam fikirləşə bilər ki,maddi sıxıntısı olan adam tikintini necə edə bilər? Ona dəstək olanlar var. Sakinlər haqsız narazılıq edirlər. Ağaclar kəsilməyəcək. Ola bilsin başqa yerə köçürüləcək".

Musavat.com-un müdaxiləsindən sonra əraziyə Xətai Rayon İcra Hakimiyyəti başçısının müavini Etibar Əhmədov və digər məsul şəxslər gəldilər. Məlum oldu ki, tikinti üçün yalnız Dövlət Şəhərsalma və Arxitektura Komitəsinin rəyi alınıb.

İcra orqanın icazəsi isə etibarsızdır, çünki möhür əvvəlki başçı Razim Məmmədova məxsusdur.

Xətai Rayon İcra Hakimiyyətinin İctimai-siyasi və humanitar məsələlər şöbəsinin müdiri Pənah İmanov da Musavat.com-a məsələ ilə açıqlama verib: "Həmin ərazidə səlahiyyətli orqan tərəfindən hər hansı tikilinin aparılmasına icazə verilməyib. O ərazi iki illiyə sahibkara icarəyə verilib. Tikinti üçün isə icazə yoxdur. Sakinlər narazıdır. Buna görə də əvvəl də bu tikintinin qarşısını almışdıq. Qanunlar hamıya aiddir".

Bir neçə saat davam edən müzakirələr zamanı asayişi qorumaq üçün əraziyə Xətai RPİ-nin 37-ci polis şöbəsinin əməkdaşları cəlb olundu. Hüquq-mühafizə orqanlarının əməkdaşları tərəfindən əraziyə girişi məhdudlaşdırıldı. Və tikinti dayandırıldı. Yekun qərar belə oldu ki, yeni başçının möhürü ilə sənədlər tam qaydasında olarsa, tikintiyə icazə veriləcək. Ağaclar isə başqa əraziyə köçürüləcək.

GUNDEMXEBER.AZ