Xanəhməd Əsgərov: “  Əgər yazdıqlarımda yalan varsa, mənə cinayət işi açsınlar, yoxsa, Həsrət Əmrahova..”

Bakı ŞİH-nin Yaşıllaşdırma Təsərrüfatı Birliyində  ( YTB ) baş verən qanunsuzluqlardan, dövət  vəsaitinin mənimsənilməsindən, peşəkar-təcrübəli kadrları işdən uzaqlaşdırıb  yerinə savadsız  şəxslərin  götürülməsindən bəhs  edən silsilə yazılar dərc edilir.
Gundemxeber.az gundelik-baku.com-a istinadla  məlumat verir ki, YTB  Bakı şəhər İcra Hakimiyyəti Başçısının 17 oktyabr 2005-ci il tarixli 272 saylı Sərəncamı əsasında ləğv edilmiş Abadlaşdırma və Park-Bağ Təsərrüfatının İnkişafı Departamentinin hüquqi varisidir. Bakı şəhər İcra Hakimiyyəti tərəfindən maliyyələşən hüquqi şəxsdir, müstəqil balansa malikdir. BİRLİK  istər keçmiş Sovet respublikaları və istərsə də digər xarici ölkələrdən müxtəlif əkin materialları (tinglər, ot toxumları, gül toxumları, gül  şitilləri), müxtəlif avadanlıqlar və texnikalar almaq səlahiyyətinə malikdir.
BİRLİK  geniş bir struktura mailkdir:
“Yaşıllıqtikinti” Podrat İxtisaslaşdırılmış Təmir Tikinti Müəssisəsi;
Bitkilərin Mühafizəsi Stansiyası;
Ağac Bəzək Bitkiləri Sovxozu;
Avtonəqliyyat idarəsi;
Su quyularının İstismarı və Təmiri xidməti idarəsi.
Birlik bu təşkilatların vasitəsilə Bakı şəhərində və Abşeron yarımadasında yaşıllığın inkişaf etdirilməsi, yeni parkların, bağların, bağçaların, istirahət sahələrinin, zeytun plantasiyalarının salınması, onların qorunması, onlara ziyan vuran fiziki və hüquqi şəxslər haqqında öz səlahiyyətləri çərçivəsində tədbirlər görülməsi, toxumçuluğun inkişafı, güllüklərin salınması, habelə şəhər əhalisinin gül və gül məhsulları ilə təmin edilməsi, minimal xərclərlə əmək məhsuldarlığının artırılması, əsas fondların istifadə edilməsinin yaxşılaşdırılması, əkin, material və maliyyə vasitələrindən səmərəli istifadəsini təmin edir.
Bir sözlə,  geniş bir İNDUSTRİYA.
YTB-nin Baş direktoru, Baş mühəndisi, Baş aqronomu  və bir neçə müavini var.
Hazırda  Birliyin Baş direktoru ixtisasca maliyyəçi olan Həsrət Kərəm oğlu Əmrahov,  Baş aqronom isə ixtisasca mexanizator olan Heydərov Oqtay Kamil oğludur.
Yəni YTB-də heç kəs öz ixtisasına uyğun işləmir,  bu qurumda aqronomdan çox müəllimlər çalışır.
Bu birlik  təhlükə yaradan qurumuş ağacı kəsmək üçün  500 manat ŞİRİNLİK Istəyir.
Yaxşı  sabah bir hadisə baş versə, ağac kiminsə üstünə aşarsa, məsuliyyəti kim daşıyacaq ?
Uzun  illər bu qurumda çalışan, 5 saylı sahənin keçmiş rəisi, alim aqronom, ildə  3 milyon ədəd gül-çiçək istehsal edən,  45 il iş təcrübəsi olan və təqaüdə çıxmağa il yarımnan az qalmış, zorla işdən azad edilən  Əsgərov Xanəhməd Əli oğlu  xeyli müddətdir ki, ölkə rəhbərliyinə, dövlət qurumlarına müraciət  edərək  YTB-də baş verən qanunsuzluqların, dövlət vəsaitinin mənimsənilməsinin araşdırlmasını tələb edir.
2  ildir  bu  istiqamətdə ardıcıl mübarizə aparan Xanəhməd Əsgərovun cənab Prezident İlham Əliyevə müraciəti  Gündəlik-Bakıya daxil olub.
Müraciəti olduğu kimi dərc edirik:
Azərbaycan Respublikasinin Perzidenti  cənab İlham Əliyevə
Bakı şəhəri, Xətai rayonu, M.Hadi-21, mənzil 1 ünvanda yaşayan Əsgərov  Xanəhməd Əli oğlundan
                       

MÜRACİƏT  

Çox hörmətli  cənab Prezident !
Siz xalqımız tərəfindən  yekdilliklə Azərbaycan Respublaikasının  Prezidenti  seçildiyiniz vaxtdan bu günə qədər  bütün çıxışlıarınızı diqqətlə izləyirəm. Sizin  xalqımız və dövlətimiz üçün gördüyünüz işlərinizi dəstəkləyirəm.
Siz çıxışlarınızın birində dediniz ki, mən hər bir azərbaycanlının Prezidentiyəm və başqa bir çıxışınızda isə dediniz ki, vətəndaşlar tərəfindən mənə yazılan şikayət  və müracaiətləri mənə  çatdırmırdılar, indi elə şey ola bilməz, siz mənə yazın, gəlib çatacaq.  
Cənab Prezident,  mən Sizin məmur özbaşınalığına, korrupsiya və rüşvətxorluğa  qarşı apardığınız mübarizədə Sizə dəstək olmaq üçün  son üç ildə Bakı şəhəri Yaşıllaşdırma Təsərrrüfatı  Birliyində  büdcədən edilən mənimsəmələr və öz  maddi maraqlarına görə,  mütəxəssislərin zorla işdən çıxarılması və onların əvəzinə kənardan qeyri-peşəkar  insanların gətirilməsi  haqqında məlumat  verməyə çalışmışam. Artıq iki il olur, Sizə, Birinci Vitse-Prezidentə və Baş prokurorluğa  təkrar müraciət edirəm.
Sizə  və Baş prokurorluğa  göndərdiyim müraciətləri  araşdırılmaq üçün Prezident  Administrasiyasının və Baş prokurorluğun  səlahaiyyətli nümayəndəsi fəaliyyətindən şikayət olunan YTB-ə göndəriliblər.
Cənab Prezident, bu nə qədər düzgündür ki, şikayətim fəaliyyətindən şikayət olunan  təşkilata göndərilir və   şikayətçi  ilə görüşmədən  cavab yazır.
Ancaq bir dəfə  Birinci Vitse-Prezident  Mehriban  xanım  Əliyevaya  göndərdiyim müraciət  Baş Prokurorluğun Korrupsiya İdarəsinə göndərilmişdi. Onlar da yazdıqlarımı yoxlamaq əvəzinə məndən izahat  almaqla işlərini bitmiş hesab etdilər.  
Cənab Prezident, axırıncı üç ildə  YTB-də  yaşıl soyqırım və rüşvətxorluq  son əlli ildə olmayan həddə çatıb.  
Cənab Prezident,  neçə ki, vətəndaşların şikayət və müraciətləri sizə çatdırılmayacaq, o vaxta qədər məmur özbaşınalığına və rüşvətxorluğa qarşı  mübarizə aparmaq mümkün olmayacaq.
Cənab Prezident, mənim müraciətlərim Sizə çatmadığına görə, ölkə saytlarında çap etdirmək  məcburiyyətindəyəm, bəlkə bu yolla  Sizə şikayətimi çatdıra bilim.
Cənab Perzident !  YTB-nin rəhbərliyi öz himayədarlarına arxayın olaraq məni həbs etdirməklə hədələyirlər.
Cənab Prezident, mən Sizdən xahiş edirəm ki, Baş prokurorluğa  göstəriş verəsiniz ki, son iki ildə  mənim yazdığım müraciətləri araşdırsınlar. Əgər günahım varsa, mənə cinayət işi açsınlar.
Mən dövlətçiliyimiz  naminə canımdan keçməyə  hazıram. YTB-nin baş direktoru  Həsrət  Əmrahovun mənə göndərdiyi məktubun surətini müraciətimə əlavə edirəm. Hətta  102 xidmətinə  YTB-nin  işinə  qarışa bilmir, ona görə də onlar istədikləri  yaş  ağacları  öz maraqlarına  görə  istədiyi  vaxt  kəsirlər.
Hörmətli cənab Prezident,  son 3 ildə  Bakı şəhərində  yaşıllığın  başına gətirilən soyqırımla  və büdcədən  edilən mənimsəmələrlə  əlaqədar  xahiş edirəm məni qəbul edəsiniz. Əvvəlcədən Sizə öz təşəkkürümü  bildirirəm.
                                          

Əsgərov Xanəhməd Əli oğlu