Xəbər verdiyimiz kimi, Ağstafa şəhər Mənzil Kommunal Təsərrüfatı Birliyi (MKTB) tərəfindən tender elanı yayımlanandan bir gün sonra yaranan şirkətin tenderdə qalib elan edilməsi ölkə miqyasında geniş müzakirə mövzusuna çevrilib.

Gundemxeber.az bizim.media-ya istinadla bildirir ki, Ağstafa MKTB ümumilikdə 47 min manat dəyərində olan son 3 satınalma müqaviləsini həmin şirkətlə bağlayıb.
MKTB-nin inrastrukturuna daxil olduğu Ağstafa Rayon İcra Hakimiyyəti mövzu ilə bağlı Bizim.Media-nın sorğusuna cavab olaraq verdiyi açıqlamada isə sual doğuran məqamlara aydınlıq gətirmək yerinə məsuliyyətdən yayınaraq, Ağstafa Mənzil Təsərrüfatı Birliyini və İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətini hədəf göstərib.
Rəsmi açıqlamada deyilir:
“Məsələ ilə əlaqədar bildiririk ki, kotirovka sorğusu “Dövlət satınalmaları haqqında” Azərbaycan Respublikasının Qanununa əsasən Ağstafa Rayon İcra Hakimiyyəti tərəfindən deyil Ağstafa şəhər Mənzil Kommunal Təsərrüfatı Birliyi tərəfindən verilmişdir.
Nəzərinizə çatdırırıq ki, qeyd olunan bütün əməliyyatlar müraciət etmiş iddiaçılar tərəfindən aydın şəkildə izlənilə bilir. Əgər iddiaçılar tərəfindən hər hansı bir şikayət məktubu əsasında narazılıq irəli sürülərsə işə yenidən baxılır. Heç bir halda rəsmi qeydə alınmamış işlə bağlı maliyyələşmə açılmır. Satınalmaların düzgün həyata keçirilməsinin araşdırılması səlahiyyəti yerli icra hakimiyyəti başçısına deyil, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə aiddir. Satınalan təşkilat tenderdə iştirak etmək istəyən iddiaçı təşkilata məhdudiyyət qoya bilməz”.
İcra hakimiyyəti tərəfindən məsuliyyət sahiblərindən biri kimi göstərilən MKTB ilə əlaqə yaratmaq cəhdlərimiz isə nəticəsiz qalıb.
Xatırladaq ki, Etender.gov.az saytında dərc olunan məlumata görə, Ağstafa MKTB tərəfindən elan edilən tenderlərin qalibi “Palma-Z” MMC (VÖEN – 3601462631) olub. Belə ki, elan 04.04.2022-ci il tarixində verilib. Tender müsabiqəsinin qalibi olan “Palma-Z” MMC 05.04.2022-ci il tarixində, yəni tender elanından bir gün sonra dövlət qeydiyyatına alınıb.
Maraqlıdır ki, “Palma-Z” MMC-nin Hüquqi ünvanı Ağstafa rayonu, Qıraq Kəsəmən kəndində yerləşən MMC-nin nizamnamə kapitalı 10 manat təşkil edir. MMC-nin qanuni təmsilçisi Məmmədova İradə Bayram qızıdır.
“Dövlət satınalmaları haqqında” Qanunun 6-cı maddəsində isə malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığın, təcrübənin, texniki və maliyyə imkanların, işçi qüvvəsinin, idarəetmə səriştəsinin, etibarlılığın olması lazımdır.
Ekspertlərin sözlərinə görə, tender elanından sonra yaradılan şirkətin hər hansı təcrübəyə malik olmasının reallıqdan uzaq olduğunu nəzərə aldıqda, qanunvericiliyin tələbinin pozulduğu aydın görünür.
Mövzunu davam etdirəcəyik.

GundemXeber.Az