XVII əsrdə yaşamış böyük ispan mütəfəkkiri Baltasar Qrassian özünün müəllifi olduğu “Kamillik elmi” adlı fəlsəfi traktatında yazılrdı ki, “Hər şeyin önündə öz çığır-bağırı ilə səfehləri cəlb edən Yalan gedir. Axsaq zamanın ardınca sürünən Həqiqət ən axırda və çox gec gəlir. Ağıllı adamlar təbiətin bizə cüt şəkildə bəxşiş etdiyi hissiyyat orqanlarından (gözlər, qulaqlar) birini Həqiqət üçün qoruyub saxlayırlar”.

Son günlər bir sıra media və sosial şəbəkə səhifələrində Fövqəladə Hallar Nazirliyinin bir neçə əməkdaşının intim xarakterli video və fotoları  yayılandan sonra bəzi çevrələrdə söz-söhbət gəzir ki, FHN artıq nüfuzdan düşdü, rəhbəri Kəmaləddin Heydərov da vəzifədən gedir.

Belə bir yalan yalnız sosial şəbəkədə yayılmış olsaydı, haradasa başa düşülən olardı: Çünki informasiya cəmiyyətinin bu seqmentində dediyinin, yazdığının məsuliyyətini anlamayan, dayaz düşüncə sahibləri az deyil. Bu, onların yazdıqlarını müşayiət edən orfoqrafik səhvlərdən də görünür. Amma təəssüf ki, bəzi rəsmi qeydiyyatdan keçmiş kütləvi informasiya vasitələrində də belə fikirlərə yer ayırılıb. Aydın məsələdir ki, bu sayaq cəfəngiyyatı yayanlar özləri hakimiyyətin daxilindən sistemli şəkildə qaynaqlandırılır. Yəqin, bəziləri istəyir ki, hazırın naziri olsunlar...

Öz yerinə layiq olan adama həmişə ehtiyac var. Hamı görür ki, onun vəzifəyə yox, vəzifənin ona ehtiyacı var: Bəziləri tutduğu yeri, digərlərini isə tutduğu yer gözəlləşdirir. Kəmaləddin Heydərov da tutduğu vəzifəni zinətləndirən şəxsiyyətdir.

Xatırlatmağa dəyər ki, 2005-ci ilə qədər süquta uğramış Sovet hökumətinin qırıq-sallaq avtomobillərindən ibarət ölmüş bir "pojarni" idarəsi var idi. Varlığını itirmiş belə bir idarənin iş fəaliyyəti təqdirəlayiq hesab edilmirdi. Çünki, bu idarə yanğın baş verdiyi zaman hadisə yerinə çata bilmədiyindən, ya obyekt yanıb külə dönürdü, ya da ki, insanlar öz güclərinə söndürüb xilas edirdilər. İndi isə gəlin görək, Kəmaləddin Heydərovun yoxdan yaratdığı Fövqəladə Hallar Nazirliyi bu gün nəyə qadirdir:  2005-ci ildə yaradılan FHN 17 il ərzində oturuşmuş nəhəng bir struktura çevrilib. Nazirliyin tərkibində 9 regional mərkəz, 4 agentlik, 5 xidmət, 3 böyük idarə, Akademiya, idman klubu, istehsalat birliyi, kombinat, mülki müdafiə qoşunları və aviasiya dəstəsi fəaliyyət göstərir. Bu illər ərzində FHN-nin oturuşmuş bir struktura çevrilməsi üçün dövlət resurslarından ciddi şəkildə, səmərəli və təyinatı üzrə istifadə olunub. İndi FHN-nin arsenalı, şəxsi heyətinin hazırlığı, peşəkarlığı o səviyyəyə gəlib çatmışdır ki, Nazirliyin strukturları nəinki Azərbaycanda, hətta qonşu ölkələrdə baş verən fövqəladə hallarla mübarizə aparmağa qadirdirlər.  Keçən il qardaş Türkiyədə baş vermiş meşə yanğınları ilə mübarizədə yardıma getmiş bizim FHN əməkdaşlarının fədakarlığının hamımız şahidi olduq.

Yeri gəlmişkən, meşə yanğınları barədə. İsti iqlim qurşaqlarında yerləşən bütün ölkələrdə olduğu kimi, Azərbaycanda da yayda meşə yanğınları olur. Anlaşılandır ki, hava nə qədər isti və küləkli olsa da, meşələr öz-özünə yanmır, burada antropogen amil, insanların səhlənkarlığı rol oynayır. FHN öz üzərinə düşən vəzifələrin öhdəsindən layiqncə gəlir. Amma hər ilkindən fərqli olaraq bu ərəfədə az qala Laçından köçən ermənilərin od vurduqları meşələrdəki yanğınları da FHN-nin səriştəsizliyi ilə əlaqələndirməyə çalışanlar var. Bu da fürsətcillərin məlum intim videomaterialın gündəmdə olduğu hazırki vaxtda FHN və onun rəhbəri haqqında mümkün qədər çox neqativ informasiya yaymaq istəklərinin təzahürüdür.

Bu sətirlərin müəllifi Kəmaləddin Heydərovun operativ iş bacarığının şəxsən şahidi olmuşuq. Belə ki, Heydərov Dövlət Gömrük Komitəsinin rəhbəri işlədiyi dövrdə onun sürücülərindən biri "Azərbaycan" Nəşriyyatının “QJE” deyilən hissəsində ölkədə nəşr olunan qəzetlərin yayım firmalarına təhvil-təslim olunduğu saatlarda hər qəzetdən bir nüsxə yığaraq saat 06:00-rəhbərinə çatdırmağa tələsirdi. Sürücüyə sual edirdik ki, süb səhər vaxtı komitədə qəzet oxuyan kimdir? Sürücü cavabında deyirdi ki, "şəxsən Kəmaləddin müəllim özü gəlib iş otağında qəzetləri gözləyir". Biz də başa düşdük ki, Kəmaləddin müəllim səhər saat 06:00-dan 09:00-a qədər ölkədə nəşr olunan siyasi qəzetləri oxuyub iş saatı başlayana qədər ölkənin ictimi-siyasi, sosial-iqtisadi həyatında baş verənlərdən tam məlumatlı olur. İndi də belə bir ayıq və hazırlıqlı adamın guya vəzifədən getməyə hazırlaşdığı barədə fikir formalaşdırmaq cəhdlərinin fiaskoya uğrayacağı heç kimdə şübhə yaratmamalıdır.

Sağlam həyat tərzi keçirmək, insanlarla nümunəvi davranmaq, xeyirxah əməllərilə hörmət qazanmaq onun həyat kredosudur. Gücü çatdığı dərəcədə başqalarına təmənnasız kömək etməyə can atır. Səbrli və iradəlidir. Səliqə-sahmanına söz ola bilməz. Qərar verməkdə cəld və ağıllıdır. Gözəl müşahidə qabiliyyəti var, ən xırda təfərrüatları belə görə bilir. Öz üzərində işləməyi bacarır. Çoxlarına çətin görünən işlər və əlçatmaz hədəfləri fəth etmək onun üçün adi bir məsələdir. Mükəmməllik duyğusu onu heç vaxt tərk etmir. Haqqa bağlılığı, dürüstlüyü, hadisələrə vicdanla yanaşması var. Heç vaxt özündən məmnun qalmır, fəaliyyətində süstlük yer almır. Amalı Vətənə, xalqa xidmətdir. Bu xüsusiyyət ona təbii gəlir və bundan zövq alır.

Belə bir bacarıqlı insanın ərsəyə gətirdiyi qurumu aşağılamaq heç də reallığa uyğun görünmür. Hansısa bir xırda məmurun öz kabinetində hoqqa verməsinin başda oturan şəxsin nüfuzuna əsla xələl gətirməyəcəyi hər kəsə gün kimi aydındır. Yel qayadan nə apara bilər ki?! Bu söz-söhbətlərdən sonra boş-boş şayiələr yayanlar öz amplualarında gicəllənib qalacaqlar. Qətiyyən ağlabatan deyildir ki, ölkə başçısı ən işlək güc nazirliyini ləğv edər və ya onun rəhbərini vəzifəsindən kənarlaşdırar. Bu kimi fikirlərlə baş sındıranlar həmçinin bilməlidirlər ki, Kəmaləddin Heydərov Heydər Əliyev və İlham Əliyev siyasi kursuna ən sadiq məmurlardan biri və bəlkə də birincisidir.

Fransa kralı I Fransisk belə demişdir: “Onunla fəxr et ki, əgər Yer kürəsində mərifət, alicənablıq və sədaqət yoxa çıxsa, onları yenidən sənin qəlbində axtara bilərlər”. Cənab Kəmaləddin Heydərovun da şəxsiyyəti, incə ruhu bu yüksək məziyyətlərin ünvanıdır. O, yaxşı bilir ki, kiçik gölməçələr hətta xəfif küləkdən bulanırlar, onların durulması sənin səyindən asılı deyil, əl vurmayıb kənara çəkilməyinlə bağlıdır, hər şey öz-özünə sakitləşəcək. Çünki xalqın gözü tərəzidir.

Məqaləni başlanğıcda olduğu kimi, yenə də filosof Qrassiandan iqtibas gətirməklə yekunlaşdırıram: “Başqalarını ləkələməklə çoxları öz ləkələrini yumasalar da, ört-basdır etməyə çalışırlar. 

Şirin CƏFƏRİ