Bakı şəhər İcra Hakimiyyəti Hacıbala Abutalıbovdan sonra da dəyişmədi; meriyanın ayrı-ayrı departamentlərində yeyintilər, maxinasiyalar - Bəhram Bağırzadə bunları niyə demir...

Bakı şəhər İcra Hakimiyyəti keçmiş başçı Hacıbala Abutalıbovdan sonra da ciddi surətdə dəyişmədi. BŞİH-in ayrı-ayrı departamentlərində yeyintilər, müxtəlif maxinasiya faktları zaman-zaman mətbuatın diqqət mərkəzinə düşür. Görünən odur ki, Eldar Əzizov BŞİH-in fəaliyyətində əsaslı və fundamental dəyişikliklər etməyib. Eyni zamanda, şəhərin idarəçiliyində də biz böyük irəliləyişlərən danışa bilmərik. İstər nəqliyyatın idarə edilməsi olsun, Bakı Nəqliyyat Agentliyi BŞİH-ə tabe etdirildikdən sonra heç nə dəyişmədi, istər yaşıllıqlara münasibət olsun, o cümlədən tikintilər, şəhərin kommunal təsərrüfatı problemlərlə aşıb-daşmaqdadır. Ona görə yaxşı olardı ki, bu günlərdə əməkdar artist Bəhram Bağırzadə bakılı-rayonlu söhbətini ortaya atarkən, Bakının əsas problemlərinə diqqət çəkərdi, paytaxtın məmurların cəngində olması və hər qarışının satılmasını açıq şəkildə qabardardı. Bundan əlavə, şəhərin gözəlliyinin, təbiiliyinin məhv edilməsinə toxunardı.

Bəhram Bağırzadə bundan danışsın!!!

Misal üçün bu yaxınlarda olan bir məsələyə nəzərə yetirək – “Gündəm xəbər” məlumat verir ki, Bakının qranit daşlarla döşənmiş qədim və estetik görüntüsü ilə göz oxşayan yollarından birinin daşları sökülərək asfaltlanıb. Bakı Şəhər İcra Hakimiyyətinin göstərişi ilə Azadlıq prospektinin Füzuli küçəsindən Dilarə Əliyeva küçəsinədək və Füzuli küçəsinin Azadlıq prospektindən Rəşid Behbudov küçəsindək olan hissələrində yola döşənmiş qranit daşlar sökülüb. Sözügedən yol yoxuş olduğundan avtomobillərin sürəti aşağı olurdu. Qranit daşlar avtomobillərin həm müəyyən qədər sürətinə təsir edir, həm də sürücülərin sürəti aşağı salmasına səbəb olurdu. İndi isə qranit daşların sökülməsi ilə həm şəhərin estetik görüntüsü pozulmuş olub, həm də qəza şəraiti yaradır. Onsuz da yoxuş olan yola asfalt döşəmək nə deməkdir? 

Sözügedən yolda onsuz da tez-tez qəzalar baş verirdi. Asfalt örtük isə bu problemi daha da artırır. İcra başçısı Eldar Əziziovun göstərişi ilə yolun təmirini həyata keçirən Azərbaycan Avtomobil Yolları Dövlət Agentliyi isə təmiri sözügedən ərazilərdə qum əsası üzərində düzülmüş kiçik ölçülü qranit daşlarının çox hissəsinin deformasiyaya uğraması ilə əlaqələndirib. AAYDA müəyyən edib ki, yaranmış qüsurlar nəqliyyat və piyadaların hərəkətinə ciddi maneə yaratdığı müəyyən edilmişdir. Bax, Eldar Əzizovun Bakının mərkəzindəki qranit daşların sökməsini Bəhram Bağırzadə tənqid etməliydi, nəinki Bakıya axışan əyalət insanlarının hərəkətlərini...

Başqa bir nümunə - Bakıya yağanda qarı səhər şaxtasında yaşı qadınlara təmizlədirdilər. 60-da çox yaşı olan qadın şaxtalı və küləkli havada yol kənarında yığılıb qalmış, buzlaşmış qarı təmizləyirdi, videosu sosial şəbəkələrdə paylaşıldı. Görünür, Azərbaycan Avtomobil Yolları Dövlət Agentliyinin, Bakı Şəhər İcra Hakimiyyətinin bir texnikası yoxdu ki, belə havada insan əməyini onunla əvəz etsinlər. Bir gün Bakıya yağan qarı ahıl yaşda qadına təmizlədənlər yəqin yoldakı vəziyyətə də isti kabinetində oturaraq nəzarət edir.

Yaşıllaşdırma Təsərrüfatı Birliyində yeyintilər...

Bundan əlavə, Bakı şəhər İcra Hakimiyyətinin tabeliyində olan Yaşıllaşdırma Təsərrüfatı Birliyi və onun müxtəlif çirkab işlərə qarışan baş direktoru Həsrət Əmrahov ən çox tənqid edilən məmurlardan biridir. Bu da göstərir ki, meriyada vəziyyət nə haldadır. Demə, Bakıda qazılan quyuların və onların təmiri məhz bu quruma məxsus imiş. Məlumata görə, Həsrət Əmrahov il ərzində kağız üzərində 100 quyu qazırsa, əslində qazılan quyuların sayı heç 20-ni keçmir. Bundan əlavə olaraq, ay ərzində təmirə ehtiyacı olan quyuların sayı da beşdirsə, Həsrət Əmrahov sənəddə altmış göstərir. Təbii ki, bu minvalla birlik rəisi böyük pullar əldə edir. Su maşınları da eyni qaydada hərəkət edir. Kağız üzərində gün ərzində 200 maşının benzini və suyu yazılırsa, reallıqda 20-30 maşın hərəkət edir. Bax, bu maxinasiyanın ən həyasız formasıdır.

Məlumatda deyilir ki, H. Əmrahovun qazancı bununla məhdudlaşmır. Misal üçün yeni salınan parklara rəis təyin etmək onun səlahiyyətindədir. Buna görə iddialara görə, azı 15-20 min manat tələb olunur. O pulu verib rəis təyin olunan şəxsə minumum 4-5 işçi verilir. Böyük parklarda bu işçi sayı 40-50 də ola bilər. Həmin işçilərin adları işdə, kartları isə Həsrət Əliyevlə təyin etdiyi sahə rəislərinin cibində olur. Məlumat üçün bildirək ki bu qurumun təxminən 1200-1300 əməkdaşı var. Bunların təyinat məsələsində Həsrət müəllim və ona yaxınlığı ilə seçilən xanım əməkdaşın müstəsna rolları olur. (bu haqda gələn dəfə daha geniş yazacağıq) 

Əgər fəhlə keçmək istəyirsənsə 2-3 min manat verməlisən. Digər nəzarətçi işi isə 6-7 manatdır. Bəzən elə olur Həsrət Əmrahov virtual olaraq parkları təmir edə bilir. Məsələn hansısa parkda tamet qopubsa dərhal Həsrət Əmrahovun könlündən dərhal ora 600 kvadrat kafel vurmaq keçir, təbii ki kağız üzərində…

Onu da demək lazımdır ki, Binə qəsəbəsində dekorativ ağacların sovxozu var. İl ərzində 3-4 milyon gül əkilirdi. Oranı dağıdıb həmin gülləri pulla alıblar. 50 qəpiklik gülləri 2-3 manatdan hesablayırlar. Hərçənd ki, idarənin kifayət qədər torpaq sahəsi var, 200-ə yaxın işçisi çalışır, istixanası mövcuddur. Yəni, məqsədli şəkildə bu iş həyata keçirilib ki, həmin “parnik”lər işləməsin. Çünki əgər orada gül bitsə, Həsrət Əmrahov pul qazana bilməyəcək. Ona görə müxtəlif şirkətlərdən pulla alırlar ki, qazansınlar. Həmçinin, öz tələbə yoldaşını ora rəhbər təyin edib, halbuki bu sahədən, bitkiçilikdən bixəbərdir. Şəhərin bütün gül- çiçəyi sovxozun hesabına təmin olunurdu. Orada olan 200-ə yaxın işçinin heç 30 faizi indi qalmayıb. Həmin 30 faiz də boş-boşuna gəlib gedirlər. Bununla bağlı vaxtilə orada müdir olmuş Xanəhməd Əsgərov internet telekanalında kifayət qədər danışıb. 

Milyonluq tenderlər, maxinasiyalar...

Bu məsələləri də kənara qoyaq, gəlin maxinasiyalara və tenderlərə diqqət edək: ötən ilin sonunda Bakı Şəhər İcra Hakimiyyəti ümumi maliyyə dəyəri 182 304.04 AZN olan 4 satınalma müqaviləsi imzalayıb. Müqavilələrə “AK Fergan Company” MMC, “Limdman Company” MMC, “Kaskan Group” MMC və “Berg Gold Company” MMC ilə bağlanıb.

Müqavilələrdə müvafiq ardıcıllıqla “Yanacaq və sürtkü materiallarının alınması” paraqrafına və “Nəqliyyat vasitələrinin cari təmir xərcləri” maddəsinə aid olan malların işlərin və xidmətlərin satınalınması”, “digər malların alınması” paraqrafına və “Maşın və avadanlıqlar” maddəsinə aid olan malların işlərin və xidmətlərin satınalınması”, “İstehlakyönlü müxtəlif xidmətlər” maddəsinə aid olan katriclərin doldurulması üçün malların işlərin və xidmətlərin satınalınması”, “Mətbəə məhsulları üzrə xərclər” və “Sair torpaq, tikili və avadanlıqlar” paraqrafına aid olan malların işlərin və xidmətlərin, o cümlədən “Dəftərxana və təsərrüfat xərcləri” paraqrafına aid printerlər üçün katriclərin satınalınması” nəzərdə tutulur.

İndi isə Bakı Şəhər İcra Hakimiyyətinin müqavilə bağladığı şirkətlər barədə məlumatları təqdim edirik.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, “AK Fergan Company” MMC 20 iyul 2022-ci ildə qeydiyyata alınıb. Nizamnamə kapitalı 10 AZN olan şirkətin hüquqi ünvanı Bakı şəhəri Binəqədi rayonu, 20 yanvar küçəsi, ev 1, mənzil 25-də yerləşir. MMC-nin qanuni təmsilçisi Əhmədov Xəyal Şahsuvar oğludur.

Göründüyü kimi “AK Fergan Company” MMC 5 aydır ki, yaranıb. Açıq mənbələrdə şirkət haqqında heç bir məlumat yoxdur. Xəyal Əhmədova gəlincə, o həm də, “Berg Gold Company” MMC-nin də qanuni təmsilçisidir. Bu şirkətin də nizamnamə kapitalı 10 AZN-dir. Hüquqi ünvanı isə Bakı şəhəri Qaradağ rayonu, Lökbatan qəsəbəsi, keçid 1594, ev 30, mənzil 8-də yerləşir. Maraqlıdır ki, “Berg Gold Company” MMC “AK Fergan Company”dən bir gün sonra yəni, 21 iyul 2022-ci ildə qeydiyyata alınıb.

Bakı Şəhər İcra Hakimiyyətinin müqavilə imzaladığı digər iki şirkətə gəlincə, onların da qanuni təmsilçisi eyni şəxsdir. Reyestr məlumatlarında göstərilir ki, “Limdman Company” MMC 4 oktyabr 2022-ci ildə qeydiyyata alınıb. Nizamnamə kapitalı 10 AZN olan şirkətin hüquqi ünvanı Bakı şəhəri Nəsimi rayonu, Cavad xan küçəsi, ev 34, mənzil 31-də yeləşir. MMC-nin qanuni təmsilçisi Abdinova Nərgiz İbad qızıdır. “Kaskan Group” MMC-yə gəlincə, Nərgiz Abdinovun qanuni təmsilçisi olduğu bu şirkət də “Limdman Company” MMC ilə eyni tarixdə yaranıb. Nizamnamə kapitalı 10 AZN olan şirkətin hüquqi ünvanı Bakı şəhəri Nərimanov rayonu, Fətəlixan Xoyski prospekti, ev 138, mənzil 41-də yerləşir. Bəlli olub ki, Nərgiz Abdinovanın adına daha bir şirkət var – “Family 22 FN” MMC. Bu şirkət də digər iki MMC ilə eyni gündə yaranıb. Bütün bunlar isə Bakı Şəhər İcra Hakimiyyətinin satınalma müqaviləsi imzaladığı bu şirkətlərin sadəcə tender əməliyyatlarında istifadə edilməsi üçün yaradılmasına şübhələri artırır. Bütün bu iddialar, mətbuatda gedən ittihamlarla bağlı BŞİH-in mövqeyini dərc etməyə hazırıq. 

Hazırladı: Rafiq Qara