“Sea Breeze”dəki kütləvi dava ilə bağlı Sabunçu Rayon Məhkəməsində hakim Mirheydər Zeynalovun sədrliyi ilə növbəti məhkəmə prosesi keçirilib.

GundemXeber.Az azpolitika.info-ya istinadən xəbər verir ki, bu ilin iyununda "Sea Breeze"də baş verən kütləvi dava ilə bağlı 3 cinayət işi başlanıb və sözügedən hadisənin iştirakçıları bir cinayət işi üzrə zərərçəkən, digər cinayət işi üzrə isə təqsirləndirilən şəxs qismində çıxış edirlər.

"Sea Breeze" işi üzrə dekabrın 19-da baş tutan məhkəmə prosesinin cinayət materiallarına görə, Elnur Məmmədov tərəfindən təhqir edilən, avtomobili əzilən Elmir Üzeyir oğlu İsmayılov, Peyman Rəhman oğlu Vəlizadə, Məhəmməd Natiq oğlu Həsənzadə və Sumqayıt məktəblərindən birinin 10-cu sinif şagirdi M.Ə təqsirləndirilən şəxs, Elnur Leysan oğlu Məmmədov və dostu Cavad Vahid oğlu Muradov isə zərərçəkən kimi tanınıblar.

Qeyd edək ki, "Sea Breeze"dəki kütləvi davanın iştirakçlarından olan, sözügedən cinayət işində zərərçəkən şəxs kimi tanınan Elnur Məmmədov bu dəfə də məhkəmə prosesində iştirak etməyib.

Hakim əvvəlki iclasda dövlət ittihamçısı Amil Şəkərəliyevin müstəntiqin dindirilməsi ilə bağlı qaldırdığı vəsatəti təmin etməyin mümkün olmadığını deyib. O, Bakı Şəhər Baş Polis İdarəsinə Əlibala Hacıyevin məhkəməyə dəvət olunmasıyla bağlı məktub göndərildiyini, lakin müstəntiqin prosesdə iştirak etmədiyini bildirib.

Prosesin davamında hakim "Sea Breeze"dəki kütləvi dava ilə bağlı videogörüntülərin tədqiq edilməsini istəyib. Məhkəmə zalında quraşdırılan ekranda "Sea Breeze"dəki kütləvi davanın baş verdiyi ərəfələrə dair bir neçə video göstərilib.

Bu zaman təqsirləndirilən Məhəmməd Həsənzadənin vəkili Vüsal Orucov etiraz edib. O, bu görüntülərdə təqsirləndirilən və zərərçəkən şəxslərin olmadığını bildirib.

"Bu video da nə var axı? Təqsirləndirilən və zərəçəkənlər görünmür bu videoda. 40 dəqiqəlik videonu niyə izlətdirirsiniz bizə?",- deyə vəkil etiraz edib.

Hakim vəkildən səbrli olmasını, prosesi pozmamasını tələb edib və növbəti videonun göstərilməsini istəyib. Hakimin bu tələbindən sonra "Vhite villa"da lentə alınan kadrlar ekrana gətirilib.

Bu zaman isə Elmir İsmayılovun vəkili Abbas Kərimbəyli etiraz edib. O da digər həmkarının fikirləri ilə razı olduğunu, bu görüntülər əsasında tərəfləri ittiham etməyin doğru olmadığını deyərək, öz etirazını bildirib.

Dövlət ittihamçısı A.Şəkərəliyev vəkillərin bu etirazından sonra tələb edib ki, görüntülər izlənilsin və daha sonra təqsirləndirilən və zərərçəkən şəxslərin hadisə ilə bağlı fikirləri öyrənilsin.

Hakim tərəflərin diqqətinə çatdırıb ki, məhkəmə ilə bağlı təqdim olunan sənədlər tədqiq olunmalıdır. O, bu səbəbdən növbəti dəfə tərəflərin görüntüləri izləmələrini istəyib.

Məhkəmədə göstərilən növbəti video isə ümumiyyətlə "See Breeze" işinə aid olmayıb. Həmin videoda bu iş üzrə zərərçəkən statusunda olan Cavad Muradovun hadisə günü "See Breeze"də naməlum bir maşından düşən şəxslərlə dalaşdığı, onları döydüyü görünüb.

Ardınca C. Muradovdan görüntülərlə bağlı izahat tələb olunub. O, əvvəl göstərilən mübahisə və dava görüntülərində tərəflərdən heç birinin iştirak etmədiyini, sonuncu videonun isə bu cinayət işi ilə bağlığının olmadığını deyib.

"Burada nə Elmirgil var, nə də başqaları. Bu videoları niyə göstərirsiniz? Orada heç kim yoxdur axı. Əgər istəyirsinizsə, mənim rinqdə vuruşduğum videoları da qoyun baxaq… Sonuncu video isə ümumiyyətlə bu cinayət işinə aid deyil və məlum davadan sonra baş verib. Həmin vaxt avtomobildə əyləşən şəxslər söyüş söydükləri üçün onlarla dalaşmışam. Bunun bura nə aidiyyatı var? Heç onları tanımıram da",- deyə Muradov bildirib.

Daha sonra təqsirləndirilən şəxslərin vəkilləri növbəti dəfə etiraz edərək, bir daha görüntülərin əhəmiyyətsiz olduğunu bildiriblər.

Prokuror A.Şəkərəliyev vəkillərin əksinə israrla vurğulayıb ki, görüntülərdə hər şey açıq-aydın görünür və tərəflər faktiki olaraq orada olublar. Bu zaman təqsirləndirilən şəxslərin vəkilləri ilə prokuror arasında mübahisə baş verib. Hakim onları sakitləşdirib.

Prosesin davamında vəkil Abbas Kərimbəyli göstərilən videoların heç birində Elmir İsmayılovun olmadığını və prokurordan bu məsələdə qərəzsiz davranmamasını xahiş edib: "Baxın, bu videoların heç birində Elmir yoxdur. İndi belə çıxır ki, Elmir ümumiyyətlə orada olmayıb da? Zərərçəkən deyir ki, videoda avtomobillə keçən şəxslər söyüş söyüblər və dava baş verib. Həmin davanın da saatını müəyyən edib əlavə edək istintaqa. Düşünürəm ki, prokuror burada qərəzli olmamalıdır. Bu, hamımızın başına gələ bilər. Xahiş edirəm ki, məsələyə düzgün yanaşaq",-deyə vəkil fikirlərini yekunlaşdırıb.

Vəkil Vüsal Orucov isə bildirib ki, göstərilən videolar ittihamın sübutunda istifadə oluna bilməz.

Sonra prokuror vəsatətlə çıxış edib. O, sözügedən görüntülərin Elnur Məmmədovun qohumu Vüqar Tağıyev tərəfindən təqdim edildiyini və videoda baş verənləri izah etdiyini bildirib. A.Şəkərəliyev tələb edib ki, Vüqar şahid qismində məhkəməyə dəvət olunsun və videoda baş verənləri hər kəsə özü izah etsin.

Daha sonra hakim təqsirləndirilən şəxslərin görüntülərlə bağlı fikirlərini soruşub. Əvvəlcə Peyman Vəlizadə çıxış edib və deyib ki, o, hadisə yerinə sonradan, Elmiri xəstəxanaya aparamq üçün gəlib. Peyman ilk davada iştirak etmədiyini deyib.

Bu zaman dövlət ittihamçısı müdaxilə edərək, onun əvvəlki məhkəmə iclasında ümumiyyətlə orada olmadığını dediyini xatırladıb. Peyman bunu inkar edərək, bir daha belə bir şey demədiyini bildirib. Prokurorun növbəti dəfə eyni şeyi israrla vurğulamasından sonra vəkillər müdaxilə edib və Məhəmmədlə Peymanın o görüntülərdə olmadığını bildirərək, Şəkərəliyevə etiraz ediblər. Hakim tərəfləri sakit olmağa çağırıb.

Digər vəkillərdə dövlət ittihamçısına etiraz edib, onun yanaşmasını "səhv" adlandırıblar.

"Burada yanaşma səhvdir. Həmin kadrlarda 30 nəfərdən artıq şəxs var. Prokurorun sözündən belə çıxır ki, onların hamısını istintaqa cəlb etməliyik. Əgər elədirsə, niyə cəlb olunmayıblar onlar? Niyə bu cinayət işi üzrə cəmi 2 zərərçəkən, 4 təqsirləndirilən şəxs var?", - deyə digər vəkil bildirib.

Prosesin davamında Məhəmməd və Elmir də videogörüntülər də olmadıqlarını bildiriblər.

Daha sonra məktəbli M.Ə-nin (azyaşlı olduğundan adını açıqlamırıq-red.) vəkili hakimin diqqətinə çatdırıb ki, M.Ə hadisədə iştirak etmədiyi, məhkəmə proseslərində belə təqsirləndirilənlərlə adınının eyni anda çəkilmədiyi, heç bir videoada olmadığı halda artıq 10-a yaxın iclasdır ki, məhkəməyə dəvət olunur və proseslərdə iştirak edir. Vəkil həmçinin M.Ə-nin hadisə zamanı harada olmasını müəyyən etmək üçün telefon-anten məlumatlarıyla bağlı "Azercell"-ə sorğu göndərilməsi ilə bağlı vəsatət qaldırıb.

Hakim daha sonra M.Ə-yə söz verib və məktəbli vəkilinin fikirlərini təsdiqləyib. O, univseristetə hazırlaşdığını, hər dəfə məhkəməyə gəlib-getməyin dərslərində problem yaratdığını deyib.

Ardınca Peyman Vəlizadənin vəkili də müdafiə etdiyi şəxsin dava anında harada olmasını müəyyən etmək üçün "Azərcell"ə sorğu gödərilməsi ilə bağlı vəsatət qaldırıb.

Prokuror çıxış edərək, bu vəsatətin təmin olunmasının zəruri olmadığını bildirib. Bundan sonra Elmir İsmayılovun vəkili Abbas Kərimbəyli məhkəmə zamanı maraqlı bir iddia səsləndirib.

Kərimbəyli üzünü dövlət ittihamçısı Amil Şəkərəliyevə tutaraq deyib ki, Elnur Məmmədovun mövqeyində onların aralarında olan söhbətdən sonra dəyişiklik baş verib: "Elnur ilk məhkəmədə çox ürəkli idi. Dava anıyla bağlı hər şeyi etiraf edir, danışırdı. Lakin qatıldığı ikinci məhkəmədən öncə məhkəmə koridorunda sizinlə söhbət etdikdən sonra nədənsə bu mövqeyini dəyişdi…".

Vəkilin bu sözlərindən sonra Şəkərəliyevin bərk həyəcan keçirdiyi zalda əyləşənlərin belə diqqətindən yayınmayıb. Prokuror dərhal cavabında bildirb ki, o, Elnurla məhkəmədən əvvəl yox, sonra söhbət edib.

Vəkil söhbət anının hansı saatda baş tutduğuyla bağlı videogörüntülərin təqdim edilməsini istəyib. Vəkilin tələbindən sonra mübahisə qızışıb və hakim növbəti dəfə onları sakitləşdirmək məcburiyyətində qalıb. Hakim daha sonra bildirib ki, məhkəmə müdafiəçilərin telefon-anten məlumatlarıyla bağlı vəsatətini qəbul edir və sorğunun nəticəsi növbəti məhkəmədə elan olunacaq. Prokurorun Vüqar Tağızadənin məhkəməyə dəvət olunmasıyla bağlı vəsatəti isə təmin olunmayıb. Hakim V.Tağıyevin əvvəl bir dəfə şahid qismində ifadə verdiyini, onun yenidən məhkəməyə dəvət olunmasında lüzum görülmədiyini bildirib.

Növbəti məhkəmə prosesi 26 dekabr tarixinə təyin olunub.

GundemXeber.Az