Nəqliyyat naziri Ziya Məmmədovun, onun deputat qardaşı Elton Məmmədovun,
Ədliyyə naziri Fikrət Məmmədovun, Qubanın icra başçısı Mübariz Ağayevin,
Füzuli Ələkbərovun müavini olmuş Nəbi adlı şəxsin villaları İvanovkada ucaldılıb

Basqalda Daxili işlər naziri Ramil Usubov, Təhsil naziri Misir Mərdanov, Nəqliyyat naziri Ziya Məmmədov, Qafqazın şeyxi Allahşükür Paşazadə, Prezidenti Administrasiyasının Hüquq mühafizə orqanları ilə iş şöbəsinin müdiri Fuad Ələsərov, AZAL-ın prezidenti Cahangir Əsgərov, “Binə” ticarət mərkəzinin sahibi Kəbirə Məmmədova, xalq şairi Zəlimxan Yaqub imarət tikiib

Rayonun Çayqovuşankənd adlanan qəsəbəsində burada Füzuli Ələkbərovun, Müdafiə Nazirliyinin Baş Qərargah rəisi Nəcməddin Sadıqovun, Milli təhülkəsizlik nazirinin müavini Hilal Əsədovun malikanələri var

Quba olayından bir il ötməmiş İsmayıllıda da eyni hadisə baş verdi. Hər iki üsyanın arxasında söyüş, yerli sakinlərin ünvanına təhqir dayandığı üçün insanlar ayağa qalxmalı oldular və nəticə də... Nəticə göz önündədir.
Onu da qeyd etməliyik hər iki rayonun sakinləri təkcə söyüşə görə ayağa qalxmamışdılar. Onlar həm də məmur-oliqarx özbaşınalığından bezərək etiraz edirdilər. Təsadüfü deyil ki, istər Qubada, istərsə də İsmayıllıda üsyan edən, villalar, hotel, xarici avtomobilləri yandıran əhali çıxışılarında icra hakimiyyətinin başçısının üzr istəməsini, istefa verməsini və bununla yanaşı yerli əhali üçün iş yerlərinin açılmasını tələb edirdilər.

İsmayıllıların heç bir problemi yoxdur?

Ancaq təəssüf ki, onların istəkləri yerinə yetrilmədi. Əksinə, Qubada olduğu kimi İsmayıllıda da etiraz edənlər həbs olundu və onlara polis idarələrində min cürə işgəncələr verildi. Bu azmış kimi günlərlə polis qüvvələri – Çevik Polis Alayının Əməkdaşları (ÇPA), Daxil Qoşunların nümayəndələri İsmayıllıda və ona qonşu olan rayonlar da yerləşdirildi. Düzdür, hazırda İsmayıllıda polis qüvvələri olmasa da, Qəbələdə, Şamaxıda çoxlu sayda ÇPA əməkdaşları var.
Onlar sakinlərlə söhbət edir, ağızlarını arayırlar, bundan sonra baş verə biləcək olaylarını qarşısını almağa çalışırlar. Ancaq icra başçısı Nizami Ələkbərov məlum olaydan sonra bircə dəfə də olsun insanların qarşısını çıxıb onlarla maralanmayıb. Əksinə, mediaya müsahibə verərək olayı törədənləri bağışladığını, etiraz edənlərin isə 150-200 nəfərdən artıq olmadığını dedi. Bu azmış kimi bildirdi ki, rayonda insanların heç bir problemi yoxdur. Ancaq rayonda bircə dəfə olanlar bilir ki, İsmayıllıda problemlər dizə qədərdir. Onların həll edilməsi isə məmurları, hakimiyyəti maraqlandırmır.
Keçək rayonun problemlərinə. İsmayıllı da orta aylıq maaş 221 manatdır, halbuki Bakıda bu rəqəm 517,2 manat təşkil edir. Rəsmi məlumatlara görə işsizlər 3%-dən azdır, əslində işsizlik təkcə qonşu rayon olan Qəbələdən 4 dəfə çoxdur. Rayon sakinləri işsizlik üzündən ya Rusiyaya gedir, ya da paytaxta üz tuturlar. Rayonda fəaliyyət göstərən bircə dənə də olsun strateji obyektin rəhbəri yerli sakin deyil. Bütün dövlət obyektlərinin rəhbərləri gəlmələr, ya da icra başçısının nazir qardaşı olan Füzuli Ələkbərovun adamlarıdır.

İvanovkada hansı məmurlar özlərinə imarət ucaldıblar?

İsmayıllı rayonu dağlıq ərazidir. Yəni, buranın kəndləri mal-qara üçün çox əlverişlidir. Yerli əhali təkcə maldarlıqla özünü yaşada bilər. Di gəl, buna imkan vermirlər. Bütün sahələr inhisara alındığı kimi İsmayıllının dağlıq əraziləri də məmur-oliqarxlar tərəfindən zəbt olunub.
Rayonun İvanovka kəndində Əmək və əhalinin sosial müdafiə naziri Füzuli Ələkbərovun və iсra başçısı Nizami Ələkbərovun 10-dan çox malikanəsi var. Nazir və qardaşı kolxozçuların evlərini ələ keçirərək özünə göz oxşayan imarətlər ucaldıb. Bu kənd ölkədə yeganə ünvandır ki, Sovetdən qalma kolxoz təsərrüfatı hələ də burada mövcuddur. Ancaq bu sürətlə davam edərsə yaxın gələcək hamısı məhv ediləcək. Çünki Ələkbərovlarla yanaşı başqa məmur-oliqarxlar da buranı əraziləri zəbt edərək özlərinə göz oxşayan malikanələr tikirlər. Nəticədə yerli əhalinin əkinə yararlı torpaqları məhv olur.
İsmayıllı Ələkbərovların kurasıyasında olsa da ancaq bu o demək deyil ki, buradakı bütün imarətlər bu iki qardaşındır. İsmayıllını gözəl təbiəti imkan vermir ki, ölkə məmurları öz nəfslərinə hakim kəsilsinlər. Məhz buna görə də Nəqliyyat naziri Ziya Məmmədovun, onun deputat qardaşı Elton Məmmədovun, Ədliyyə naziri Fikrət Məmmədovun, Qubanın icra başçısı Mübariz Ağayevin, Füzuli Ələkbərovun müavini olmuş Nəbi adlı şəxsin villaları İvanovkada ucaldılıb.
İvanovkada elə yerləri nazir işğal edib ki, bu ərazilər əvvəllər sakinlərin gəzinti yeri oluib. İndi Füzuli Ələkbərov dəbdəbəli villa tikdikdən sonra həmin ərazilərə heç kim buraxılmır. İmarətin ərazisi kifayət qədər böyükdür: dağ, dərə və dağın arxasında düzəngah. Tikanlı məftillərlə əhatələnən və mühafizə olunan villaya yaxın düşmək isə mümkün deyil.
Onu da qeyd edək ki, bu ərazilər hasara alınıb, tikinti işlərinə başlanılanda ivanovkalılara deyilib ki, mehmanxana tikiləcək. Ancaq bir müddət sonra mehmanxana adlandırılan yerdə villa görəndə hər şeyin yalan olduğunu duyublar.
İvanovkanın əhalisi kəndə olan problemlərlə bağlı dəfələrlə rayon icra hakimiyyətinə, paytaxta üz tutsalar da, Prezident Administrasiyasına şikayət etsələr də heç nə əldə olunmayıb.

Basqal necə işğal olunub?

Zəbt olunmuş ərazilərin siyahısında İsmayıllının Basqal kəndinin də adı keçir. Basqal da Daxili işlər naziri Ramil Usubov, Təhsil naziri Misir Mərdanov, Nəqliyyat naziri Ziya Məmmədov, Qafqazın şeyxi Allahşükür Paşazadə, Prezidenti Administrasiyasının Hüquq mühafizə orqanları ilə iş şöbəsinin müdiri Fuad Ələsərov, AZAL-ın prezidenti Cahangir Əsgərov, “Binə” ticarət mərkəzinin sahibi Kəbirə Məmmədova, Diplomat Akademiyasının rektoru Hafiz Paşayev, xalq şairi Zəlimxan Yaqub və başqa məmurların imarətləri ucaldılıb. Burada villalar o qədər sıxdır ki, son illər Basqala gələn turistlərin sayı azalıb. Səbəb isə odur ki, bütün istirahət obyektləri ələ keçirilib. Bu və ya digər dərəcədə özəlləşdirilib. Ərazilər satın alınıb, buna görə də sözügedən kəndə artıq maraq qalmayıb. Çünki turist bir yerə gəlirsə həmin ünvanı qarış-qarış gəzmək istəyir. Basqalda isə qarış-qarış gəzməyə yer qoymayıblar. Sadəcə bir-iki mehmanxana var ki, orada istirahət etməklə heç nə əldə etmək olmaz.
Bu kənd demək olar ki, başdan-başa mühasirədədir. Kəndə ayaq basan istənilən yad adam o dəqiqə nəzarətə alınır. Bütün villalar təhlükəsizlik kameralarıyla əhatələnib. Yuxarıda adlarını qeyd etdiyimiz məmurlar ilin bütün fəsillərində malikanələrinə gələrək istirahət edirlər, dağlar qoynunda ov ovlayırlar. Bu zaman Basqal kəndi tamamilə ciddi nəzarətə götürülür.
Basqalda Ziya Məmmədova məxsus istirahət məkanı var ki, burada qiymətlər od tutub yanır. Bu, tikilinin inşasını xaricdən gətirilən işçi qrupu hesabına tamamlayıblar. Bir sözlə burada tikilən bütün obyekt və imarətlərin ucaldılmasında nə kəndin sakinləri, nəd rayon camaatı iştirak edib.
Bundan başqa kənddə Fövqəladə hallar naziri Kəmaləddin Heydərovun hektarlarla torpaq sahəsi, üzüm bağları var. Baxmayaraq ki, Füzuli Ələkbərov üzüm bağlarını ələ keçirmək üçün uzun illər “fövqəlnazir”lə çəkişib, ancaq sonda məğlub duruma düşüb. Yəni, Kəmaləddin Heydərov öz biznes imperiyasını sona qədər qorumağı bacarıb.

Buynuzda kimlərin imarətləri var?

İsmayıllının Buynuz kəndi də rayonun zəbt olunmuş qəsəbələri sırasına daxildir. Burada şair Baba Vəziroğlunun, rayonun polis rəisi Nizami Qocayevin, Səbayel rayon polis idarəsinin rəisinin villaları var.
Bu kənd o biri kəndlər kimi hələ də başdan-başa zəbt olunmasa da, yaxın illər ərzində tamamilə malikanələrlə əhatələnəcəyi göz qarşısındadır.
Rayonun Çayqovuşankənd adlanan qəsəbəsində də məmurlar özlərinə villalar tikməyi bacarıblar. Belə ki, burada Füzuli Ələkbərovun, Müdafiə Nazirliyinin Baş Qərargah rəisi Nəcməddin Sadıqovun, Milli təhülkəsizlik nazirinin müavini Hilal Əsədovun malikanələri ucaldılıb.
İsmayıllının Talıstan kəndi isə o biri qəsəbələrə nisbətən az ələ keçirilib. Belə ki, burada Ələkbərovlar qardaşlarına məxsus bir hotel, digər nazirlərə aid isə bir neçə malikanə var.
Rayonun Vələsin yaylağı adlanan ünvanda Füzuli Ələkbərovun daha bir böyük imarət var ki, ilin çox vaxtını burada keçirir. Buradan ova gedən nazir və onun yaxınları bu imarətə gəlmək üçün vertolyotdan istifadə edir.
Dağlarla əhatələnən Lahıc kəndi də məmurların istirahət guşələrindən biridir. Baxmayaraq ki, bura hələ turistlər üçün açıq hava rolunu onaya bilir. Ancaq inşa edilən bir neçə imarətlərdən sonra yəin ki, yaxın gələcəkdə kəndin qapalı zonaya çevrilməsinə şərait yaradılcaq.

Ələkbərovların İsmayıllı biznesi...

İsmayıllıda tikilən obyektlərin çoxu isə Ələkbərovlara məxsusdur. Belə ki, İvanovkada çörək sexi, rayonun mərkəzinə yaxın ərazidə tikilən kərpic zavodu nazirin kurasiyasındadır.
Füzuli Ələkbərovun Məmmədağlı kəndində xaricdən gətirdiyi xarici cins heyvanları bəsləyən ferması var. Fermaya görə yaxınlıqda yaşayan bütün insanlar evlərindən didərgin salınıblar. Onlar ya kəndin lap ucqar nöqtələrinə üz tutublar, ya da baş alıb rayonu tərk ediblər.
Onu da qeyd etmək yerinə düşər ki, məmur-oliqarxlar malikanələr tikmək üçün ərzazidə yaşayan sakinləri köçürəndə onlara yaxşı kompensasiya da verirlər. Məsələn, İvanovkada bir mənzil sahibinə 70-80 min manat pul ödənilir. Bu rəqəm kəndlər arasında dəyişir. Elə qəsəbə var ki, orada sakinlərə daha çox pul ödənilir. Ancaq bütün kompensasiya məsələsini məmurlara aid etmək olmaz. Elə imarətlər var ki, onların tikintisi vətəndaşların göz yaşları hesabına başa gəlib. Belə ki, özünə imarət ucaltdıran məmur mənzil sahibinə 10-15 min manat pul, qəsəbənin ucqar yerində yer ayıramaqla kifayətlənməli olub.

Kiçik sözardı...

İsmayıllıda baş verən üsyanın bir səbəbi də budur. Məmur-oliqarxlar özlərinə imarət ucaldırlar, biznes imperiyalarını genişləndirirlər, yerli sakinlər isə hər şeydən məhrum edirlər. Etirazların kökündə təkcə söyüşlər, təhqirlər yox, həm də bu cür özbaşınalıqlar dayanır...
Ramin DEKO