Xəbər verdiyimiz kimi, mətbuatda “Günay Bank” ASC-nin idarə heyətinin sədr müavini Emin Zeynalovun əmanətçilərin 100 milyona yaxın vəsaitini götürərək ölkədən qaçdığı barədə məlumatlar yayılıb.

Mövzu ilə bağlı versiya və məlumatlarını bölüşənlərdən biri də ictimai fəal, bloqqer Bəxtiyar Hacıyev olub. B.Hacıyev bununla bağlı sosial şəbəkədə status yazıb.

Gənc bloqqer bildirib ki, Günay Bank və 100 milyon məsələsində bir neçə mənbədən məlumat alıb: “1) Söhbət gedən məbləğ bankın əmanətçilərinin, bankın rəsmi pulu olmayıb. 2) Söhbət gedən məbləğ 100 milyon yox, daha az məbləğdir. 3) rəsmi yox, müxtəlif adamlardan toplanmış, valyuta dəyişmə əməliyyatlarında istifadə olunan, qara kassanın pulları imiş. 4) Deyilənə görə, Emin Zeynalov Günay Bankda sədr müavini olsa da, bu qara valyuta dəyişmə əməliyyatları təkcə Günay Bankda yox, həddindən artıq yüksək texnologiyalar nazirliyinə tabe olan 'Azərpoçt' MMC filiallarında da aparılırmış”.

Mövzu ilə bağlı “Qafqazinfo”ya açıqlama verən “Günay Bank”ın Müşahidə Şurasının sədri Mahmud Məmmədov bildirib ki, iddialar əsassızdır və bankda heç bir oğurluq faktı qeydə alınmayıb.

Sədr qeyd edib ki, “Günay Bank” Azərbaycanda ən az əmanəti olan bankdır və hazırda cəmi 35 milyon manat əmanət var: “Mən təminat verirəm ki, 26 il ərzində “Günay Bank”dan bir manat da olsun offşor şirkətlərinə pul çıxmayıb. Bizim bütün fəaliyyətimiz göz qabağındadır. 2017-ci ili gəlirlə başa vuran iki bankdan biri olmuşuq. “Günay Bank”ın likvidlik problemi və əmanətçilər qarşısında hansısa problemli öhdəliyi yoxdur”.

M.Məmmədov qeyd edib ki, Emin Zeynalovun bankdan kənarda biznes partnyorları ilə borc problemi olub: “Bu məsələdən xəbər tutan kimi onu çağırdım və işdən azad etdim. Amma xaricə qaçması barədə məlumatlar əsassızdır”.

Qeyd edək ki, ““GünayBank”ın sədr müavini 100 milyonu götürüb ölkədən qaçdı” başlıqlı xəbər Virtualaz.org saytında yayımlanıb.