Prezidentin icra başçıları ilə görüşündən bir neçə gün sonra Qarabağ qazisinin özünü yandırma cəhdi Sumqayıt merinə baha başa gələ bilər; şəhərdə aksiya gözlənilir

Sumqayıtda icra başçısı Eldar Əzizova qarşı aksiyalar gözlənilir. Şəhərdə yaşayan I qrup Qarabağ əlili Malik Məcidovun özünü yandırmaq cəhdinə polisin sərxoş damğası vurması əhalini qəzəbləndirib. Bu məqsədlə E.Əzizova və polisə etiraz olunacaq.
Bu haqda “Gündəm-xəbər”ə verilən məlumata görə, aksiyada Qarabağ qaziləri, veteranları da iştirak edəcəklər. Onlar Sumqayıt polisinin iftira və böhtanına cavab verəcəklər. Qarabağ əlilinin sərxoş kimi təqdim olunub təhqir edilməsi böyük hiddət yaradıb.
Qazilər deyirlər ki, sosial haqsızlığa görə özünü yandıranlara hökumətin yardım etməyi əvəzinə, onlara psix, sərxoş ittihamları yapışdırılır. Yevlaxda özünü yandırana psix, başqa birinə sərxoş adı qoyulmuşdu. Növbəti belə hal Sumqayıtda yaşanır. Məlumata görə, aksiyada polisin üzr istəməsi və E.Əzizovdan qazinin problemlərinin həlli tələb ediləcək.
Artıq Sumqayıtda bir gərginlik hökm sürür. Polisdən isə bildirilib ki, həmin şəxsə həmişə diqqət və qayğı olub. M.Məcidova dövlət tərəfindən maşın və ev də verilib. Lakin o, yenə də maddi durumunun ağır olmasından şikayət edib.
Qazilər isə bununla razılaşmır. Sumqayıtda özünü yandıranı tanıyan şəxslər də danışırlar ki, M.Məcidov içki düşkünü deyil, sərxoş olmayıb və haqqının yeyilməsinə etirazını bildirib. Amma polis onu təhqir etməkdən belə çəkinmir.
Məlumata görə, aksiya xəbəri icra başçısını da təlaşlandırıb. Çünki bir neçə gün öncə prezident icra başçıları ilə görüşdə onlara mühim tapşırıqlar verib, xəbərdarlıq edib. Bunun ardınca Sumqayıtda Qarabağ qazisinin intihar cəhdi heç də E.Əzizova yaxşı perspektiv vəd etmir.
İstisna deyil ki, icra başçısının “qələmi sındırılıb” və “başı kötük” üstədir. E.Əzizovun vəzifədən alınması versiyası da iddia olunur. İcra başçısı prezidentlə görüşdən bir neçə gün sonra əməlli-başlı bəlaya düşüb. Şəhərdə qazinin özünü yandırmasına görə icra başçısı ciddi təhlükə ilə üzləşib. Ümumiyyətlə, Sumqayıtın icra başçısının adı bir sıra maxinasiyalar, korrupsiya faktlarında hallanır. Amma qazinin özünü yandırması artıq ölkə üçün ən həssas problemə çevrilib.
Hakimiyyətin özünü yandıranlara görə başı ağrımağa başlayıb. Prezidentin icra başçıları ilə görüşü də məhz buna hesablanmışdı; insanları incitməyin, şikayətlərini dinləyin, bölgələrdə sosial partlayışlar olmasın, heç bir kəsi təhqir etməyin, söyüşə görə iki dağ rayonunda qiyam qalxıb, vətəndaşları yola verin.
Ancaq bu göstərişlərdən az sonra Qarabağ qazisi üstünə benzin töküb intihara əl atır. Və Sumqayıt polisi vətən uğrunda döyüşən qaziyə sərxoş damğasını vurur. Təbii ki, belə həssas məsələyə kobud şəkildə reaksiya verilməsi Sumqayıt rəhbərliyinə ən ağır zərbədir.
Bu hadisədən əvvəl isə Sumqayıtda yerləşən “Cavid” Ticarət Mərkəzində ticarətlə məşğul olan III qrup Qarabağ əlili Taleh Nəbiyev də özünü yandıracağını demişdi.
T.Nəbiyev deputat Zaman İsgəndərovun univermağında kiçik bir piştaxtanı icarəyə götürüb və ayda 200 manat icarə pulu ödəyib. Corab satışı ilə məşğul olan Qarabağ əlilindən əlavə “haqq” istənilib. Göründüyü kimi, Sumqayıtda Qarabağ veteranlarına haqsızlıq edilir və vəziyyət son həddə çatıb. Bu işdə isə ən böyük məsuliyyət icra başçısının üzərinə düşür.
Mənbə bildirir ki, Sumqayıtda əhali E.Əzizovun gedişini istəyir. Onlar yeni icra başçısı arzulayırlar. Çünki gəldiyi gündən etibarən Sumqayıt üçün bir iş görməyən E.Əzizovdan ciddi narazılıq var. Bu narazılığın da ən kulminasiya nöqtəsi qazinin özünü yandırma cəhdidir. Əgər qazinin hüquqları tapdanırsa, sadə vətəndaşlara qarşı görün necə münasibət göstərilir.
Son xəbərə görə, E.Əzizov hadisəni ört-basdır etmək və qazini razı salmağın yollarını axtarır. İcra başçısı onun ailəsinə və özünə hər bir köməklik göstərilməsini tapşırıb. Polisin açıqlaması isə heç cürə bu məsələnin yatıra bilməz.
Məsələ ilə bağlı Sumqayıt şəhər icra başçısının sosial-iqtisadi məsələlər üzrə müavin Sahib Quliyevin məlumatına görə, hər dəfə bir Qarabağ əlili onlara müraciət edir.
“Qarabağ qaziləri” Birliyinin Sumqayıt təşkilatının sədri Elşən Mustafayev bildirib ki, Məcidov intihar məqsədilə üstünə benzin tökdüyü üçün həmin maye onun dərisinə zəhərlənmə verib. Hazırda Sumqayıt xəstəxanasında müalicə alan əlilin vəziyyəti normaldır. E.Mustafayev həmçinin bildirib ki, əlil M. Məcidovun problemi ilə hələlik heç kim maraqlanmayıb.