Xəbər verdiyimiz kimi, fevralın 21-də “Azadlıq” radiosunun əməkdaşı Xədicə İsmayılova Baş Prokurorluğun Ağır Cinayətlərə Dair İşlər üzrə İstintaq İdarəsində növbəti (4-cü) ifadəsini verib.

Jurnalist iki saat dindirildikdən sonrta azad buraxılıb və fevralın 25- yenidən ifadə vermək üçün dəvət edilib.

X.İsmayılova “Amerikanın Səsi”nə bildirib ki, ondan “Art Garden” restoranında Amerika Senatının nümayəndələri ilə görüşü və nədən danışdıqları barədə suallar verilib. Eyni zamanda iqtidaryönümlü deputat Ceyhun Osmanlının prokurorluğa təqdim etdiyi lent yazısı barədə soruşulub.

Jurnalist həmçinin ona Milli Təhlükəsizlik Nazirliyinin sənədi güman edilən materialın bu qurumun hazırda mühacirətdə olan keçmiş əməkdaşı Ramin Nağıyev tərəfindən göndərildiyini bildirib. Nağıyev bu barədə sosial şəbəkələrdə də yazıb.

Virtualaz.org xatırladır ki, Ramin Nağıyev hələ 2000-ci ilin oktyabrında Bakıdan Moskvaya qaçıb və oradan Azərbaycan diasporunun köməyi ilə Fransaya keçirilib.

Bu isə o deməkdir ki, artıq 2000-ci ilin oktyabrından Ramin Nağıyevin MTN-in məxfi sənədlərinə, necə deyərlər, çıxışı olmayıb. Digər tərəfdən, əgər Ramin Nağıyev elə həmin 2000-ci ildə Fransadan sığınacaq alıbsa və faktiki olaraq MTN-in bir nömrəli düşməninə çevrilibsə, həmin mötəbər dövlət qurumunun 2003-cü ilə aid məxfi sənədini necə əldə edə və Xədicə İsmayılovaya ötürə bilərdi?!

Hələ biz onu demirik ki, adi müstəntiq olduğu üçün R.Nağıyevin işlədiyi dövrdə belə, MTN-in əməliyyat və agentura fəaliyyəti ilə bağlı tam məxfi qrifli sənədlərinə ümumiyyətlə çıxış hüququ olmayıb.