Lənkəran icra başçısının müəmmalı oyunları
O baş rolu ifa etsə də, digər hadisələrdə olduğu kimi, sudan quru çıxmağı bacarıb

Vəzifəyə təyin olunan istənilən şəxsin ümdə vəzifəsi işini qanuna müvafiq şəkildə quraraq, xalqına və dövlətə xidmət etməkdən ibarətdir. Buna əsasən də vəzifə sahibləri əldə etdikləri səlahiyyətdən sui-istifadə etməməlidirlər. Ancaq, Azərbaycan şəraitində təəssüf ki, bunun əksini müşahidə edirik. Vəzifəyə gətirilən əksər şəxslər ona həvalə edilən postdan xalqa və dövlətə xidmət etmək əvəzinə, özünün şəxsi varlanması üçün istifadə edir. Bu xüsusda əsasən də, rayonlara təyin edilən icra başçıları daha çox canfəşanlıq nümayiş etdirirlər.
Lənkəran rayon icra hakimiyyəti başçısı Taleh Qaraşov da bu fonda "fərqlənənlər" sırasındadır. Qeyd edək ki, keçən ayın ortalarında xəstəlik səbəbindən Taleh Qaraşovun Bakıya götürülməsi haqda xəbər yayılmışdı. Buna səbəb isə onunla bağlı olan rüşvət qalmaqalı məsələsi idi. Belə ki, Lənkəran rayonunun Kərgəlan kənd sakini Səfərov Məmməd Həbib oğlu icra başçısının işə düzəlmək adı ilə ondan külli miqdarda pul alması barədə "Yeni Cümhuriyyət" qəzetinə məlumat vermişdi.
Onu da bildirək ki, M.Səfərov əvvəllər Lənkəran şəhər İcra Hakimiyyəti Başçısı Aparatının İctimai-Siyasi və humanitar məsələlər Şöbəsinin baş məsləhətçisi vəzifəsində çalışıb və qalmaqal yarandıqdan sonra vəzifəsindən azad edilib.
Onun mətbuatda gedən yazısından görünür ki, Lənkəran rayon Ağ Ciyər Xəstəlikləri Xəstəxanasının baş həkimi Qurbanov Nurəddin Ələkbər oğlu 2012-ci ilin avqust ayında Lənkəran şəhər İcra Hakimiyyəti başçısının müavini vəzifəsinin boş olmasını, həmçinin Taleh Qaraşov Cəlilabad rayon İcra Hakimiyyətinin başçısı işlədiyi vaxtda Cəlilabad rayon Mərkəzi Xəstəxanasının baş həkimi işləmiş Sadatxan adlı şəxslə yaxın münasibətlərinin olduğunu bildirərək göstərilən vəzifəyə təyin olunmağı M.Səfərova təklif edib. Nurəddin Qurbanov ona bildirib ki, bu vəzifəyə təyin olunmağı üçün Taleh Qaraşova 120 min manat pul verməlidir. M.Səfərov da təkliflə razılaşır. Bundan sonra göstərilən məbləği Nurəddin Qurbanova verib. M. Səfərovun mətbuata dediyi sözlərinə görə, ardınca Qaraşovla da görüşür. O isə Səfərovun sənədlərini Prezident Administrasiyasına aparacağı və onu müavin vəzifəsinə təyin edəcəyini bildirib. Lakin Taleh Qaraşov Bakıdan 120 min manat müqabilində sözügedən vəzifəyə təyinat almaq iddiasında olan M. Səfərovu məyus edəcək təkliflə gəlir.Belə ki, Səfərovun sözlərindən göründüyü kimi icra başçısı Bakıdan həmin vəzifəyə başqa adamı tapşırdıqlarını bildirib. Məhəmməd Səfərova isə başqa vəzifə vəd edilir. Lakin bir müddətdən sonra Taleh Qaraşov 120 min manatı Nurəddin Qurbanova qaytarır. O da bu vəsaiti yiyəsinə, yəni Səfərova verir. Bir müddətdən sonra isə Nurəddin Qurbanov M. Səfərova Lənkəran şəhər Təhsil Şöbəsinin müdiri vəzifəsinə təyin olumağı təklif edir. Bunun üçün də Taleh Qaraşova 150 min manat pul verilməli olduğunu onun diqqətinə çatdırır. Təklifi qəbul edən Səfərov, özünün mətbuata açıqlamasına görə, 150 min manatı 27 mart 2013-cü il tarixdə Lənkəran Dəmir Yol Vağzalında Nurəddin Qurbanova verir. Lakin əsl müəmma da elə bundan sonra başlayır.Həmin vaxtdan bu günədək nə vəd verilən vəzifə təyinatı baş tutub, nə də sözügedən vəzifəni tutmaq üçün verilən pullar geri qaytarılıb. Pulunun qaytarılması üçün M. Səfərov dəfələrlə Qaraşov Talehlə görüşsə də o, bundan imtina edib. Nurəddin Qurbanov isə iddia edib ki, 150 min manatı Taleh Qaraşova çatdırması üçün Hacı Zaura verib. Hacı Zaur Nurəddindən pul almadığını bildirir: "Mən Taleh Qaraşovdan və Nurəddin Qurbanovdan pullarımı tələb etdikdən və vəzifəli şəxslərin dələduzluq və rüşvətalma cinayətləri barədə Lənkəran rayon Prokurorluğuna ərizə ilə müraciət etdikdən sonra Nurəddin Qurbanov özünə məxsus Lənkəran şəhərində yerləşən 5 mərtəbəli binanın 5-ci mərtəbəsində 3 otaqlı evini Taleh Qaraşovun və Polis rəisi Möhübbət Hüseynovun təkidi ilə bağışlama yolu ilə qayınım Ağayev Vüqar Balağa oğlunun adına keçirib”.
Onu da bildirək ki, M.Səfərov pozulmuş hüquqlarının bərpası və qrup şəklində cinayət əməlinə yol vermiş şəxslər barəsində cinayət işinin başlanması ilə bağlı respublika prokurorluğuna da müraciət edib. Hazırda bu işlə bağlı istintaq aparılır. Nurəddin Qurbanov həbs olunub.
Burada bir sıra məqamlar ortaya çıxır. Aydın məsələdir ki, N. Qurbanov korrupsiya qalmaqalında heç də əsas füqur deyil. Burada o yalnız belə demək mümkünsə, kuryer rolunu oynayıb. Prosesdə adı hallanan əsas füqur isə heç şübhəsiz icra başçısı T. Qaraşovdur. Hansı ki, azadlıqda gəzməklə yanaşı hələ də vəzifəsində qalır. Azərbaycanda belə hallar çox baş verir. Hansısa yüksək rütbəli məmur kimisə işə düzəltmək adı ilə başqalarının əli vasitəsilə ondann külli miqdarda pul qoparır. Bu iş alınmadıqda və prosesdən şikayət olunduqda isə, həmişə cavabdeh qismində yüksək çinli məmurla işə düzəlmək istəyən arasında vasitəçilik edənlər çıxış edirlər. Məhz onun nəticəsidir ki, M. Səfərovun şikayəti ilə bağlı olaraq ancaq vasitəçi olan N. Qurbanov həbs olunub. Məsələdə adı hallanan əsas füqur icra başçısı isə hələlik sudan quru çıxmağı bacarıb. Bu istiqamətdə baş verən digər ona oxşar hadisələrə nəzər salsaq, belə qənaətə gəlmək olar ki, N. Qurbanova da az iş kəsiləcək və bir müddətdən sonra azadlığa çıxacaq. Amma 150 min manatın hara yoxa çıxdığını tapan olmayacaq.
Burada başqa bir məqam vəzifə almaq istəyən, yəni Məmməd Səfərovla bağlıdır. Bu şəxsin hansısa vəzifə tutmaq naminə özündən yuxarıda olanların rüşvət təklifinə "müsbət" reaksiya verməsi, onun da sağlam düşüncəli, işinə qanun çərçivəsində yanaşan məmur olmayacağına dəlalət edən amildir. Aydın məsələdir ki, 150 min manat verib vəzifə tutmaq eşqinə düşənlər, heç də həmin kresloya xalqa, dövlətə xidmət etmək naminə gəlmirlər. Onlar da, Lənkəran rayon icra başçısı kimi, ancaq öz şəxsi mənafelərini güdürlər.
Burada Məşədibadın hambalının dediyi sözlərə uyğun fikri bildirmək də sanki yerinə düşür: "Sənin 5 minin cəhənnəm, bə mənim 150 min manatın hara getdi?"

Həsən