Ramiz Mehdiyev, Bəylər Əyyubov və Vasif Talıbov və
qeyrilərinın adlrarı çoxmilyonlu tikinti maxinasiyaslnda

Artıq uzun müddətdir ki, bəzi tikinti şirkətlərinin adları müxtəlif səpkili fırıldaqlarda hallandırılır. Ötən ilin ortalarında “Kamran B.Ə.” MMC tikinti şirkətinin adı da bu siyahıya əlavə edilmişdi. Vətəndaşları aldadaraq külli miqdarda vəsait mənimsədiyi iddia edilən bu tikinti şirkətinin arxasında da bir qrup səlahiyyətli şəxslərin dayandığı söylənilir. Ona görə də zərərşəkmişlər bu günə qədər nə pulunu bəribaşdan ödədikləri mənzillərini, nə də öz halal vəsaitlərini geri ala bilrlər. Nə qədər qapı-qapı gəzsələr də, öz haqlarının müdafiəsinə qalxsalar da, istədiklərinə nail ola bilmirlər…
Baş prokuror yanında Korrupsiyaya Qarşı Mübarizə İdarəsində “Kamran B.Ə.” MMC-nin vəzifəli şəxslərinin cəmiyyətin payçılarının vəsaiti hesabına inşa edilmiş çoxmərtəbəli binada mənzilləri aldatma yolu ilə 291 şəxsə təkrarən satmaqla külli miqdarda özgə əmlakını ələ keçirmələri faktına görə Cinayət Məcəlləsinin 178.3.2 (dələduzluq) və 308.2-ci (vəzifə səlahiyyətlərindən sui-istifadə) maddələri ilə başlanmış cinayət işinin istintaqı tamamlanıb.

Dələduzluq yolu ilə talanan 6 milyon manat

Müəyyən edilib ki, cəmiyyətin təsisçisi və rəhbəri Ələkbər Babayev müxtəlif dövrlərdə MMC-nin direktoru vəzifəsində işləmiş German Hüseynov və Rüfət Nağıyev, tikinti nəzarətçisi Süleyman Əliyev və “İnşaat-E” MMC-nin direktoru Kənan Quliyev ilə qabaqcadan əlbir olaraq cəmiyyət tərəfindən paytaxtın Yasamal rayonu ərazisində tikilən çoxmərtəbəli yaşayış binasında ümumilikdə 92 mənzili saxta müqavilələr tərtib etməklə 291 şəxsə təkrar sataraq əldə edilmiş 8 milyon 566 min manatın 2 milyon 545 min manatını inşa edilən binanın tikintisinə sərf edib, qalan 6 milyon 20 min manat məbləği isə dələduzluq yolu ilə talayıblar.
Bundan başqa “Kamran B.Ə.” MMC vergi ödəyicisi kimi qeydiyyatdan keçdikdən sonra Ə.Babayev 2008-ci ilin yanvar ayından 2011-ci ilin avqust ayına kimi olan dövrdə mənzil satışından əldə etdiyi 7 milyon 428 min manat məbləği zəruri sənədləri tərtib etməyərək vergi bəyannamələrində əks etdirməyib, eyni zamanda mənzil tikintisi ilə məşğul olan şəxslər kateqoriyasına aid hüquqi şəxs olmaqla vergi orqanlarına sadələşdirilmiş vergi hesabatlarını təqdim etməyərək 1 milyon 623 min manat məbləğdə külli miqdarda vergiləri dövlət büdcəsinə ödəməkdən yayınıb.

İşin başında yüksək rütbəli polis durur

İstintaqın gedişində 200 nəfər zərərçəkmişlə binanın tikintisini davam etdirən “Şaiq” MTK arasında yeni müqavilələr bağlanılmaqla onların pozulmuş mənzil hüquqları bərpa olunub. Bundan başqa zərərçəkmişlərdən 12 nəfərə 217 min 699 manat qaytarılmaqla vurulmuş zərərin ödənilməsi təmin edilib digər 79 nəfərə vurulmuş 2 milyon 251 min manat zərərin ödənilməsini təmin etmək məqsədilə təqsirləndirilən şəxslərin adlarına qeydə alınmış daşınar və daşınmaz əmlakların üzərinə həbs qoyulub. İş üzrə təqsirləndirilən şəxslər qismində cəlb edilmiş Ə.Babayevə, G. Hüseynova və R.Nağıyevə CM-in 178.3.2, 213.2.2 (külli miqdarda vergi ödəməkdən yayınma), 308.2 və 313-cü (vəzifə saxtakarlığı), S.Əliyevə CM-in 178.3.2, 308.2 və 313-cü, K.Quliyevə isə CM-in 178.3.2-ci maddələrində nəzərdə tutulan ittihamlar elan edilib. Cinayət işi üzrə istintaq tamamlanaraq baxılması üçün aidiyyəti üzrə Bakı Ağır Cinayətlər Məhkəməsinə göndərilib
Məlumat üçün bildirək ki, Ələkbər Babayevin uzun illər Daxili İşlər orqanlarında müxtəlif vəzifələrdə çalışdığı və hətta Bakı şəhərində Polis Bölməsinin rəisi vəzifəsini daşıdığı da bildirilir. Sonradan Ə.Babayev ofisi Yasamal rayonunda yerləşən ”Kamran B.Ə.” MMC-ni təsis edərək, tikinti işləri ilə məşğul olmağa başlayıb. Tikinti də elə bu ərazidə – Yasamal rayonu, III Yeni Yasamal massivi, D.Bünyadzadə küçəsi, 34 B ünvanında aparılıb…

Fırıldaqçı şirkətin himayədarı-Gülər Əhmədova

İşin maraqlı tərəfi budur ki, sabiq millər vəkili Gülər Əhmədova fırıldaqçılıqla məşğul olan “Kamran B.Ə” MMC-nin arxasında dayanan fiqurlardan biri kimi təqdim olununr.. Xanım Əhmədova ilə MMC-nin təsisçisi, Cinayət Məcəlləsinin 178.3.2 (dələduzluq) və 308.2-ci (vəzifə səlahiyyətlərindən sui-istifadə) maddələri ilə həbs olunan Ələkbər Babayev arasında xeyli zamana dayanan işgüzar münasibətlər olub. Bu cür irimiqyaslı işə başlayarkən Ələkbər Babayev “Azəriqazbank”dan 2 milyon manat kredit götürüb. Krediti əldə etmək üçünsə Gülər Əhmədova zamin dayanıb. Amma kredit vəsaiti tam xərclənsə də, banka ödənəcək nəinki kredit faizi, hətta əsas məbləğin özü də qaytarılmayıb. Bank bu məsələ ilə bağlı prokurorluğa müraciət edib. Baş Prokuror Yanında Korrupsiyaya qarşı Mübarizə Idarəsi “Azəriqazbank”ın çoxsaylı şikayətləri əsasında, iyunun 21-də Bakı Istintaq Təcridxanasında saxlanılan Ələkbər Babayevlə Gülər Əhmədovanı üzləşdirməyə cəhd edib. Lakin o zaman Gülər Əhmədova deputat səlahiyyətlərindən istifadə edərək, üzləşməyə gəlməkdən imtina edib.

İsfəndiyar Axundov və himayədarları

Araşdırmalar zamanı istər adı çəkilən şirkət, istərsə də eyni binanı daha sonra “Kamran B.Ə”dən alaraq satışa çıxaran “Şərur MTK”nın arxasında müxtəlif dövlət məmurlarının adı çıxır. “Şərur MTK”nın sahibi Isfəndiyar Axundov “Kamran B.Ə”nin tikdiyi və bir neçə payçıya satdığı mənzilləri yenidən bazara başqa şərtlərlə çıxarıb. Faktlar açıq-açığına ortada olsa da I.Axundovun məsuliyyətə cəlb olunması mümkün olmayıb. Hətta bu işlə məşğul olan müvafiq dövlət qurumları belə etiraf edirlər ki, Isfəndiyar Axundov işlərini elə qurub ki, onun istintaqa cəlb olunması qeyri-real görünür. Lakin məlum olan odur ki, ”Kamran B.Ə"nin inşa etdiyi binanı daha sonra zəbt edən “Şərur MTK” onsuz da bir neçə nəfərə satılan mənzilləri yenidən başqa payçılara satıb. Bu zaman da bir mənzil bir neçə nəfərə tamamilə başqa şərtlərlə satılıb. Bu şirkətlərin arxasında dayanan şəxslərin adlarına gəlincə, onlar sırasında ən yüksək dövlət məmurları var. Bu məmurlar Ramiz Mehdiyev, Bəylər Əyyubov və Vasif Talıbovdur. Azərbaycanda bu cür addımları hökumətdən ciddi dəstək olmadan atmaq mümkün deyil.
Məlumat üçün bildirək ki, ümumilikdə “Kamran B.Ə” MMC-yə qarşı 96 iddia qaldırılıb. Amma MMC-nin fəaliyyətindən ziyan çəkənlərin sayı 300 nəfərə qədərdir. Yayılan məlumatlara görə, hazırda saxlanılan “Kamran B.Ə”nin rəhbərliyinin əmlakı 1.5 milyon manat məbləğində dəyərləndirilib və bu əmlak hərac vasitəsilə satıldıqdan sonra zərərçəkənlərin pulları qaytarılmalıdır.
Azər Talıbov