Bildiyiniz kimi, ölkə prezidenti cənab İlham Əliyevin ötən ilin oktyabr ayında imzaladığı sərəncamla Nazim Veysov Şəmkir rayon İcra Hakimiyyətinin başçısı vəzifəsindən azad edildi.
Dövlət başçısının digər sərəncamı ilə Alimpaşa Adil oğlu Məmmədov Şəmkir İcra hakimiyyətinin başçısı təyin edilib. Heç kimə sirr deyil ki, yeni icra başçıları vəzifələrinin icrasına başlayan kimi sələflərinin yol verdiyi nöqsanları axtarmağa, başqa sözlə desək özlərini müsbət tərəfdən göstərməyə başlayırlar. Bu proses özünü daha çox ticarət obyektlərinə qarşı sərgilənən münasibətdə göstərir. Adətən rayon yerlərində yol kənarlarında, yəni ticarət üçün əlverişli sayılan ərazilərdə tikilən obyektlərin sənədlərində müəyyən qanunsuzluq olur. Məhz yeni icra başçıları bu məqamı nəzərə alıb köhnə başçının dövründə tikilən obyektlərin sənədlərini araşdırır, əksər hallarda isə söküntü qərarı verirlər. Bu baxımdan Şəmkir rayonunda da vəziyyət olduqca kritikdir. Adının açıqlanmamasını xahiş edən Morul kənd sakininin redaksiyamıza verdiyi məlumata görə, Şəmkir şəhər bələdiyyəsinin sədri Müseyib Vəliyevin köhnə başçı Nazim Veysovla birgə həyata keçirdiyi qanunsuz işlər bu gün öz fəsadını göstərməkdədir: «Məlum olduğu kimi, ötən ilin dekabr ayında ölkəmizdə bələdiyyə seçkiləri keçirildi. Mərkəzi Seçki Komissiyası seçkinin yekun nəticələrini hələ ki, açıqlamayıb. Lakin buna baxmayaraq, artıq Şəmkirdə şəhər bələdiyyəsinin və kənd bələdiyyələrinin sədrlərinin kim olacağı indidən bəllidir. Şəhər bələdiyyəsinin sədri Müseyib Vəliyev bu vaxta kimi dəhşətli qanun pozuntularına imza atıb. Belə ki, o Nazim Veysovun rayona rəhbərlik etdiyi vaxtlarda onunla əlbir olaraq yol qırağında 3000-dən çox obyekt yerini satıb. Deyilənə görə, bunun üçün 4 min manatdan yığılıb. Satılan obyekt yerlərinin əsas hissəsi isə Şəmkir-Gədəbəy «kraz» yolunun kənarında yerləşir. Rayonun icra başçısı dəyişəndən sonra sözügedən ərazidə yerləşən ticarət obyektlərinin gələcək taleyi sual altına düşüb. Çünki icra başçısı Alimpaşa Məmmədov adamlarına köhnə başçının dövründə tikilən obyektlərin sökülməsi barədə tapşırıq verib». Mənbənin sözlərinə görə, bu xəbəri eşidən sahibkarlar çıxılmaz vəziyyətdə qalıb: «Onlar nə edəcəklərini, kimə şikayət ünvanlayacaqlarını bilmirlər. Nazim Veysovla Müseyib Vəliyevin pullarını yığan isə bələdiyyə sədrinin tanışı İsrail kişi, həmçinin bələdiyyə rəhbərinin «Fizi» ləqəbi ilə tanınan qardaşı olub. Yığım işi bu iki nəfər həyata keçirib. Ortalıqda gəzən söz-söhbətlərə görə, məsələdən xəbər tutan başçı Alimpaşa Məmmədov Müseyib Vəliyevi yanına çağıraraq ona deyib ki, get qardaşın «Fizi»yə de yığdığı pulları gətirib qaytarsın. Həmin pulların kimə və necə qaytarılacağı isə bilinmir. Deyilənə görə, köhnə icra hakimi və bələdiyyə sədri obyekt tikintisi üçün satdıqları torpaq sahələrinin qarşılığında ümumilikdə 2 milyon manata yaxın qazanc əldə ediblər. Məsələnin ciddiləşməsi isə pul yığımında ittiham olunan İsrail kişi və «Fizi»ni təşvişə salıb. Buna dözə bilməyən İsrail kişinin ürəyi partlayıb ölüb. Dünyasını dəyişən İsrail kişi bir növ məsuliyyətdən canını qurtarmış oldu. İndii yerdə qalıb «Fizi». Alimpaşa Məmmədov Müseyib Vəliyevə həmin pullar gətirib qaytarılmasa, obyektlərin hamısının buldozerin qabağına veriləcəyini bildirib. Bu səbəbdən bələdiyyə sədrinin başı dərddədir». Biz Alimpaşa Məmmədovun bu qərarını həm təqdir edirik, həm də yox. Təqdir edirik ona görə ki, icra başçısı bu sahədə mövcud olan qanunsuzluqları aradan qaldırmaq istəyir. Amma digər tərəfdən onu da, Nazim Veysovu da icra başçısı vəzifəsinə cənab prezident təyin edib. Ölkə başçısı Nazim Veysovun vaxtında Şəmkirə bir neçə dəfə səfər edib. Əgər məsləhətli olsaydı, cənab prezident özü qeyd olunan ərazidəki obyektlərin sökülməsini başçıya tapşırardı. Deməli, Alimpaşa müəllim bu işdə başqa maraqlardan çıxış edir. Onu da qeyd edək ki, həmin obyektlərin sayəsində yüzlərlə ailə özünə dolanışıq yeri tapıb. İcra başçısı bu obyektləri sökdürsə, rayonda işsizlik baş alıb gedəcək. O ki, qaldı Şəmkir bələdiyyəsinin sədri Müseyib Vəliyevin və qardaşı «Fizi»nin qanundan kənar əməllərinə, aidiyyəti dövlət qurumlarının nümayəndələri onların fəaliyyətini dərhal araşdırmalı və lazımi ölçü götürməlidir.

Qarşı tərəfi də dinləməyə hazırıq…