Taleh Qaraşovun rəqibləri fəallaşıb; Lənkəranın icra başçısının müavinləri, polis rəisi yeni güc kimi meydana çıxıb.

Bu günlərdə adı yenidən gündəmə gələn Lənkəranın icra başçısı Taleh Qaraşov və yeni vəzifəyə təyinat almış oğlunun barəsində yayılan məlumatların intensivləşməsi səbəbsiz deyil.
Xatırladaq ki, Taleh Qaraşovun rayonun polis rəisi Mörübbət Hüseynovla konfliktdə olması, ikincinin birinci haqqında kompromatlar toplaması və sair kimi problemlər barədə, ayrı-ayrı saytlarda maraq doğuran yazıların sayı artıb. Onun Daxili İşlər Nazirliyinin Daxili Təhqatatlar İdarəsinin rəisi vəzifəsindən, Lənkərana polis rəisi vəzifəsinə göndlərilmiş Möhübbət Hüseynovla konfliktinin güclənməsi ərəfəsində, Bakıda 8-ci polis bölməsinin rəisi olan oğlu haqda ilginc xəbərlərin yayılmasının da təsadüfi olmadığı iddia olunur.
Bu və ya digər məlumatlarla bağlı qəzetimizi məlumatlandıran mənbə maraqlı fikirlər açıqlayıb. Mənbənin sözlərinə görə, icra başçısının polis rəisi olan oğlu Vüsal Qaraşovu, Bakı şəhər Baş Polis İdarəsinin rəisi, general Mirqafar Seyidovla üz-üzə gətirmək istəyənlər olub:
«Xatırlayırsınızsa Vüsal Qaraşovun haqqında yayılan xəbərlərdə bildirilirdi ki, Bakı Şəhər Baş Polis İdarəsinin yeni rəisi, polis general-mayoru Mirqafar Seyidov, paytaxtdakı polis idarə və bölmələriyoxlamağa başlayıb. Və o, ilk yoxlamanı Taleh Qaraşovun oğlunun rəisi olduğu Səbail Rayon Polis İdarəsinin 8-ci polis bölməsində həyata keçirib.
Məlumata görə, M.Seyidov bölmənin inzibati binasına mülki geyimdə şikayətçi qismində daxil olub. Bölmə əməkdaşları M.Seyidovu tanımayıblar və BŞBPİ-nin rəisi dəhlizdə gözləməli olub. Bir müddət sonra isə, gələn "şikayətçi"nin BŞBPİ-nin rəisi olduğu məlum olub.
Düzdür, bu xəbərdən sonra icra başçısının oğlu Vüsal Qaraşov danışdı və deyilənləri təkzib etməyə çalışdı. Amma, bu olay diqqəti yenə də Taleh Qaraşovun üzərinə yönəltdi. Böyük ehtimalla bu olayda Taleh Qaraşovun mənsub olduğu qruplaşma ilə ziddiyyət yaşayan qrup, bu məsələnin xüsusi qabardılmasında maraqlı oldular. Və ona görə də, onun oğlunu və özünü hədəfə gətirməyə çalışdılar».
“Gündəmxəbər”ə verilən məlumata görə, Vüsal Qaraşovun adı ətrafında “tufan qabağı” yaşanan bu olaylar, Taleh Qaraşovun fəaliyyətindən qaynaqlanır: “Fasiləsiz olaraq 20 ilə yaxındır icra başçısı vəzifəsində çalışan Taleh Qaraşovun Lənkərana rəhbərlik etdiyi illər ərzində, yol verdiyi ciddi səs-küylü, qalmaqallı olaylar onun karyerasını bitirmək üzrədir.
Maraqlı burasıdır ki, onun bu qalmaqallara cəlb olunması və adının daha ağır məsələlərdə hallanmasında, bəzi rəhbər şəxslərin, o cümlədən hüquq-mühafizə orqanlarında çalışanların da rolunun az olmadığı bildirilir. Elə Lənkəranda əvvəl icra başçısının müavini, daha sonra isə təhsil şöbəsinin müdiri təyinatı üçün 150 min manatlıq rüşvət qalmaqalını xatırlatmaq yetər. Bəli, Taleh Qaraşov Kürdəmir, Neftçala və Cəlilabadda ehtiyatlı apardığı talançılıq siyasətini, Lənkəranda firon kimi həyata keçirməyə başladı. O, yaşının və karyerasının belə bir dövründə elə ciddi səhvlərə yol verdi ki, bundan sonra həmin ittihamları üzərindən təmizləmək qeyri-mümkün görünür. Sözsüz ki, bu məsələdə onun tabeliyində olan məmurların, hətta rayonun hüquq-mühafizə orqanlarının da səriştəsiz fəaliyyətləri az rol oynamadı. Lakin Taleh Qaraşov güclü iradə ortaya qoyub, bunlarla bacara bilmədi. Nəticə etibarilə rayondakı bəzi pullu və vəzifəli şəxslərin «ayağı yer» aldı. Onlar artıq Taleh Qaraşova əvvəlki kimi, ciddi yanaşmırlar. Hətta onun iki müavini və köməkçisinin də sərbəst hərəkətlər etməsi və bəzi məsələlərdə icra başçısınn əleyhinə qərar vermələri də, sirr deyil. Bu baxımından onların böyük maliyyəyə sahib olan Mörübbət Hüseynovla əlbir fəaliyyət göstərmələri də istisna deyil».
Müsahibimiz deyir ki, Lənkərandakı məmurlarla bərabər, Taleh Qaraşovun postuna ən ciddi namizədlərdən biri də, Əmlak Məsələləri Dövlət Komitəsinin sədri Kərəm Həsənovun himayəsində olan Cəlilabadın icra başçısı Əziz Əzizovdur: “İcra başçısından daha çox, biznesmen kimi qəbul edilən Əziz Əzizov, bu gün Lənkərana göndəriləcək ən şanslı namizədlərdən biri sayılır».
Sonda qeyd edək ki, Lənkəranda yaşanan hadisələrlə bağlı “Gündəm – Xəbər” geniş araşdırmalara strat verib və bu araşdırmaları yaxın saylarımızda oxuya bilərsiniz.

Cəfər MƏRDANOĞLU