Nədənsə Qax rayonunun da icra başçısı sarıdan bəxti gətirmir. Prezident İlham Əliyev hər hansı rayona icra başçısı təyin edərkən, 15 dəqiqə də olsa başçı gedəcək adamı qəbul edib, ona yerlərdə camaatla yaxşı işləməyi tövsiyə edir. Təəssüflər olsun ki, icra başçıları ölkə başçısına yalandan “baş üstə” deyirlər. Rayona təyin olunan kimi necə deyərlər, pələngə, şirə dönürlər. Yerlərdə əhalinin guzaranının yaxşılaşdırılmasına, sosial məsələlərin həllinə yardımçı olmaq əvəzinə, vətəndaşlara yalan satır, onların yaşam tərzinə ciddi ziyan vururlar. Elə Qax rayonunda da beləcə oyunlar gedir.

Rayonda biznesmen kimi tanınan Qax RİH-nin başçısı Musa Şəkiliyev yerli adam olmasına baxmayaraq, başçı gəldiyi 2010-cu ildən ancaq talançılıqla məşğuldur. Araşdırmalar göstərir ki, Qaxda icra nümayəndəliyinin inzibati binasının təmiri üçün, hələ 2013-cü ildə 11 900 manat vəsait ayrılıb. Bunun müqabilində binaya rəngli boyadan başqa heç nə edilməyib. Küllü miqdarda vəsait də mərkəzi yolun təmirinə ayrılmasına baxmayaraq, “asfalt” yeyənlərin gördüyü işlər çox keyfiyyətsizdir. Rayonun Əlibəyli kəndinin girişinə xərclənən 345 000 manatdan, bəlkə də heç 50 min manat xərclənməyib. Ləkid kəndinin yollarının əsaslı təmirinə, yaddaşlarda 111 000 manat xərcənib. Lakin oraya heç 20 000 manatın belə xərclənməməsi müşahidə olunur. Dar yol, nazik və yarasız asfalt yola ayrılan pulun havaya neçə sovrulmasını əyani sübut edir.

Qaxda səhiyyə sisteminə xərclənən vəsaitə nəzər saldıqda, istər-istəməz narahatçılıq yaranır. Belə ki, burada da vəsaitlər aidiyyətsiz yerlərə xərclənib. Məsələn, 2013-cü il bərk inventarlara 49 800 manat, avadanlıqlara 47 800 manat və maşın avadanlıqlarına isə 70 899 manat xərclənib. Bundan əlavə, şəhər icra nümayəndəliyi M.P.Vaqif küçəsinin təmiri üçün 158 000, C. Cabbarlı adına küçədə su arxının təmirinə 102 000 manat xərclənib. 5 saylı uşaq bağcasının təmirinə isə 15420 manat pul xərclənməsi bildirilir.

Bu rəqəmlərə, əlbəttə heç kimin şübhəsi də ola bilməz. Lakin, məsələ burasdıdır ki, pulun yeyilməsi xətrinə yuxarıda silinən vəsaitin müqabilində işlər, sözün həqiqi mənada tam yarıtmaz şəkildə aparılıb.

Sakinlərin dediyinə görə, icra başçısı Musa Şəkiliyev meşələrdəki ağacların kəsilməsində maraqlı olan şəxslərdən biridir. Belə ki, rayon rəhbərinin burada böyük mebel biznesi mövcuddur. Bir sıra şəxslər ağacları doğrayıb, onları mebel sexinə göndərirlər. Həmin adamlar özləri də icra başçısına yaxın şəxslərdir. Məhz buna görə də, onlar Qaxda başqa adamların ağac qırmasına, onları mebel sexinə satmasına imkan vermirlər. Qaxlıların söylədiklərindən belə çıxır ki, icra başçısı mebel biznesindən böyük gəlir əldə edib. O, hətta bununla özünün biznes imperiyasını da yaratmağa nail ola bilib. Musa Şəkiliyevlə bağlı sakinlərdən əldə etdiyimiz digər xəbərlər onun rayonun bir sıra sahibkarları ilə münasibətləri barədədir. Bildirilir ki, rayonda bəzi işgüzar şəxslərlə, kiçik sahibkarlarla yola getmir. Belə ki, rayonda hamının "Su Camal" ləqəbi ilə tanıdığı "Qax-1", "Qax-2", "Qax-3" müəssisələrinin rəhbəri, Camal adlı iş adamıyla yola getmir, onun fəaliyyətini məhdudlaşdırmağa, biznesini sıxışdırmağa çalışır.

Digər mənbənin söylədiyinə görə, icra başçısı rayonda “ailə podratı” ilə işləyir. Qohumlarının əksəriyyəti sənədlərdə “ölü canlar” gedir. Yəni, işdə adları getsə də, iş yerlərində tapılmırlar. Bundan əlavə, rayonda belə bir deyim də ağızdan-ağıza düşüb. Başçı “kreslosunda” ilk dəfə əyləşən Musa Şəkiliyev yaxın adamlarının yanında belə ifadə işlədib: ”Heç ağlıma da gəlməzdi ki, məndən icra başçısı olar. Bu mənə yuxu kimi gəlir”

Əlbəttə, icra başçısı olması Şəkiliyevə yuxu kimi gələr. Çünki, meşəbəylikdən bu vəzifəyə gəlmiş Şəkiliyev, rayona özünün biznes məkanı kimi baxır. Onu hamı belə də tanıyır.

Qarşı tərəfin də fikirlərini dinləməyə hazırıq.

Vüqar