Son təyinatlar nəqliyyat nazirinın gücünü göstərdi; Nazirin komandasını möhkəmlətməsi rəqiblərini kəskin qıcıqlandırıb

Dünən prezident İlham Əliyev nəqliyyat naziri Ziya Məmmədov və onun qruplaşmasını yaxından maraqlandıran bir neçə sərəncam verib.

«Gündəm Xəbər» məlumat verir ki, İlham Əliyev "Azərbaycan Dəmir Yolları” Qapalı Səhmdar Cəmiyyətinin sədri Arif Əsgərov tutduğu sözügedən vəzifəsindən azad edib. Ancaq növbəti sərəncamla o, Ziya Məmmədova müavin təyin olunub.

Prezidentin cəmiyyəti və iqtidardakı qruplaşmaları yaxından maraqlandıran digər sərəncamı isə "Azəryolservis” Açıq Səhmdar Cəmiyyətinin sədri Cavid Qurbanovla bağlı olub. Prezident onu vəzifəsindən azad eləsə də, bu, deputatın «vurulması» anlamına gəlmir. O, daha prestijli vəzifəyə təyin olunub. Belə ki, Arif Əsgərovdan boşalan postu deputat Cavid Qurbanov tutub. Yəni bundan sonra Cavid Qurbanov, "Azərbaycan Dəmir Yolları” Qapalı Səhmdar Cəmiyyətinə rəhbərlik edəcək.

Bu və ya digər sərəncamları qəzetimizə şərh edən ekspertlərdən biri deyib ki, son bir neçə ayda baş verənlər və dünənki sərəcamlar, Ziya Məmmədovun hakim komandada düşünüldüyü qədər zəif olmadığını göstərdi: «Hətta mən deyərdim ki, Ziya Məmmədov hakimiyyətdə gözlənilən geniş islahat dalğasından nəinki özünü, hətta bütövlükdə komandasını qorudu. Bununla Ziya Məmmədovun son bir ildə üzərinə gələn hücumları dəf etdiyini və hətta güclənərək, ən azı növbəti bir il üçün üstün mövqedə olacağı göründü».

Müsahibimiz deyir ki, yanvar ayının sonunda Prezident İlham Əliyevin üç icra başçılarının yerdəyişməsi ilə bağlı imzaladığı sərəncamlar da, Ziya Məmmədovun ağıllı manevr edərək, rəqiblərinə əzələ nümayiş etdirdiyini söyləmək olar:

«Gəlin açıq danışaq ki, son bir ildə Ziya Məmmədovun və komandasının «vurulacağı», hətta onların fəaliyyətinin yoxlanılaraq bəzilərinin həbs ediləcəyi də deyilirdi. Üstəlik, qardaşı Elton Məmmədovun oğlunun avtoşluğundan tutmuş, jurnalist döydürməsinə qədər informasiya hücumlarının yüksələn xətlə getdiyi ərəfədə, Ziya Məmmədov müvazinətini itirmədi. Əksinə, hucumlar sanki Ziya Məmmədovu daha püxtələşdirdi. Bununla da nazir hələ 2000-ci illərdə yeni yaradılan Nəqliyyat Nazirliyinin rəhbəri uğrunda güclü rəqibləri ilə savaşdan təsadüfi qalib çıxmadığını təsdiqlədi. Elə yanvar ayının sonunda nəqliyyat nazirinin yaxın qohumu, barəsində ən sərt ittihamlar səsləndirilən Mənsur Məmmədovun Göyçay rayon İcra hakimiyyətinin başçısı vəzifəsindən azad edilərək, Ucar rayonuna başçı təyin olunması, digər sərəncamla Qubanın icra başçısı Mübariz Ağayevin Göyçaya, Ucarın icra başçısı Yaşar Məmmədovun isə Qubaya başçı göndərilməsi də, Ziya Məmmədovun hakim komandada ən güclü 3 fiqurdan biri olduğunu sübut etdi. Sözsüz ki, onun bu qədər güclənməsi hakimiyyətdəki rəqiblərini qıcıqlandırır və onlar artıq Ziya Məmmədovla belə mübarizənin effekt vermədiyini anlayıblar. Ona görə də rəqiblərinin taktikanı dəyişərək, Ziya Məmmədovu tamam başqa «cinah»dan zəiflətməyə çalışacaqları gözləniləndir».

Ziya Məmmədovun saraydaxili çəkişmələrin mahir ustalarından biri olduğunu deyən müsahibimiz deyir ki, qarşıda iqtidardakı qruplaşmaların «Aazəryolservis» ASC uğurunda gərgin mübaprizə gözləyir: «Əgər Ziya Məmmədov milyonların dövr etdiyi bu quruma da öz adamının təyinatına nail olarsa, o zaman onun birmənalı şəkildə ölkənin ən güclü qrupuna sahibləndiyini açıq mətnlə demək mümkün olacaq».

Cəfər