Məhkəmə direktor və onun müavinlərini cəzalandırdı

Quba şəhərində H.Hüseynov adına 4 saylı humanitar fənlər təmayüllü məktəb-liseyin direktoru Xanımsona Əkbərova, direktorunun təlim-tərbiyə işləri üzrə müavini Elmira Qasımova və təsərrüfat işləri üzrə direktor müavini Nüsrəddin Hacıbabayevin cinayət işi üzrə məhkəmə prosesi başa çatıb.

İttihama görə, Nüsrəddin Hacıbabayev vəzifəli şəxs olmaqla xidməti vəzifələrinin icrası ilə əlaqədar üçüncü şəxslər üçün qanunsuz üstünlük əldə edib. O, vəzifə səlahiyyətlərindən sui-istifadə edərək rəsmi sənədlərə bilə-bilə yalan məlumatları daxil etməklə vəzifə saxtakarlığı törədib.

Nüsrəddin Hacıbabayev 15 sentyabr 2011-ci il tarixli, 128 saylı əmrlə həmin məktəbin texniki işçisi təyin olunmuş Anjella İbrahimova işə çıxmayıb. Buna baxmayaraq o, Anjellaya 4 mart 2013-cü il tarixədək olan müddətdə əlavə əməkhaqqı yazıb. Həmin əməkhaqqı cədvəlləri məktəbin möhürü ilə təsdiq olunub, daha sonra isə Quba rayon İcra Hakimiyyəti başçısının Quba şəhəri üzrə nümayəndəliyinə göndərilib. Nümayəndəlik tərəfindən Anjella İbrahimovaya 2011-ci ilin sentyabr ayından 2013-cü ilin mart ayınadək olan dövr üzrə cəmi 1759 manat əməkhaqqı hesablanıb və

həmin məbləğ onun “KapitalBank” ASC-dəki hesabına köçürülüb.

Digər təqsirləndirilən şəxslər Xanımsona Əkbərova və Elmira Qasımova isə Nüsrəddin Hacıbabayevanın qanunsuz əməlinə göz yuyublar. Nüsrəddin Hacıbabayev və Xanımsona Əkbərova Cinayət Məcəlləsinin 313-cü (vəzifə saxtakarlığı), 314.1-ci (səhlənkarlıq), 308.1-ci (vəzifə səlahiyyətlərindən sui-istifadə) maddələri ilə, Elmira Qasımova isə Cinayət Məcəlləsinin 314.1-ci (səhlənkarlıq) maddəsi ilə ittiham olunublar.

Quba rayon Məhkəməsinin hökmü ilə Nüsrəddin Hacıbabayev və Xanımsona Əkbərova 1000 manat cərimə olunub. Digər təqsirləndirilən şəxs Elmira Qasımovanın barəsində ittiham hökmü çıxarılmayıb. Onun ittiham olunduğu maddə üzrə ittihamın müddəti keçdiyi üçün hakim belə nəticəyə gəlib. Həmçinin hakim Nüsrəddin Hacıbabayev və Xanımsona Əkbərovanın ittiham olunduğu Cinayət Məcəlləsinin 308.1-ci maddəsini ittihamdan xaric edərək, həmin maddə ilə adları qeyd olunan təqsirləndirilən şəxslərə cəza təyin edilməyib.

Hökmdən narazı qalan Nüsrəddin Hacıbabayev və Xanımsona Əkbərova apelyasiya şikayəti verərək cərimə cəzalarının ləğv olunmasını istəyiblər. Həmçinin prokurorluq apelyasiya protesti verib və təqsirləndirilən

şəxslərin cəzalarının ağırlaşdırılmasını tələb edib. Tərəflərin şikayəti baxılması üçün Sumqayıt Apellyasiya Məhkəməsinə göndərilib.

Hakim İlham Həsənovun sədrliyi ilə keçirilən prosesdə çıxış edən prokuror Zəfər Ramazanov bildirib ki, təqsirləndirilən şəxslərin barəsində Quba rayon Məhkəməsinin çıxardığı hökm ləğv edilməlidir. Prokuror Nüsrəddin Hacıbabayevi Cinayət Məcəlləsinin 308.1 və 313-cü maddələri ilə, Elmira Qasımovanı Cinayət Məcəlləsinin 308.1-ci maddəsi ilə və Xanımsona Əkbərovanı Cinayət Məcəlləsinin 313 və 314.1-ci maddələri ilə təqsirli bilinmələrini tələb edib: Məhkəmə hökmdə təqsirləndirillən şəxslər Nüsrəddin Hacıbabayev və Elmira Qasımovaya irəli sürülmüş ittihamın tam təsdiqini tapdığını göstərib. Bu səbəbdən də onların ittiham olunduğu Cinayət Məcəlləsinin 308.1-ci maddəsi ittihamdan xaric edilib. Təqsirləndirilən şəxslər Nüsrəddin Hacıbabayev və Elmira Qasımovaya Cinayət Məcəlləsinin 308.1-ci maddəsi ilə verilmiş ittiham “artıq ittiham” kimi nəzərə alınıb və onlara verilmiş həmin maddə ümumi ittihamdan xaric edilib. Məhkəmə qeyd olunan nəticəyə gəlməsini hökmdə eyni zamanda Rusiya Federasiyası Məhkəmələrinin məhkəmə təcrübəsindən nümunələr gətirməklə əsaslandırıb. Halbuki, iş materialları və məhkəmədə tədqiq olunmuş sübutlarla təqsirləndirilən şəxslərin cinayət əməli sübuta yetirilib. İş materiallarında qeyd olunub ki, Elmira

Qasımova H.Hüseynov adına 4 saylı humanitar fənlər təmayüllü məktəb-liseyin direktoru vəzifəsində işlərkən məktəb direktorunun müavini vəzifəsində işləyən Gülnar İbrahimovanın xahişi ilə gəlini Anjella İbrahimovanı xadimə kimi işə götürüb, təsərrüfat işləri üzrə direktor müavini vəzifəsində işləyən Nüsrəddin Hacıbabayev onun işə çıxmaması, işləməməsi barədə dəfələrlə məlumatlandırılıb. Buna baxmayaraq, Nüsrəddin Hacıbabayev saxta sənədləri imza və təsdiq etməklə Quba rayon İcra Hakimiyyəti başçısının Quba şəhəri üzrə nümayəndəliyinə göndərib. Nəticədə Anjella İbrahimovaya işləmədiyi halda əmək haqqı alıb”.

Prokurorun sözlərinə görə, Elmira Qasımova qeyd edilən əməllərini direktor müavini Gülnar İbrahimova qarşısında nüfuz qazanmaq məqsədi ilə törədib. Onun sözlərinə görə, Elmira Qasımova vəzifə saxtarkarlığı cinayətini törətməzdən əvvəl öz vəzifələrindən sui-istifadə edib. Prokuror qeyd edib ki, təqsirləndirilən şəxs işçisini içə çıxmamasına göz yumub.

Sonda işə baxan hakim prokurorun protestinin təmin edilməsi barədə qərar açıqlayıb və qərara görə, prokurorun protesti qismən təmin edilib və Quba rayon Məhkəməsinin hökmü ləğv edilib. Yeni hökmə əsasən, təqsirləndirilən şəxslər istintaq orqanının irəli sürdüyü ittihamlarla

mühakimə ediliblər və onların hər biri 1000 manat miqdarında cərimə olunublar.