Oğlu ölən “McDonalds Azərbaycan” şirkətinin icraçı direktorundan şok ittihamlar

Bakı Ağır Cinayətlər Məhkəməsində ölümlə nəticələnən yol qəzası törətməkdə təqsirləndirilən İlham Əsgərli və Əhliman Süleymanovun cinayət işi üzrə məhkəmə prosesi başlayıb. Hakim Ramella Allahverdiyevanın sədrliyi ilə keçirilən prosesdə prokuror ittiham aktını elan edib.

İttihama görə, ötən ilin sentyabrın 27-də Xəzər rayonu Türkan qəsəbəsində Qəbələ rayon sakini Əhliman Süleymanovun idarə etdiyi “Hovo” və Bakı şəhər sakini Pərvin Fətullayevin idarə etdiyi “Mercedes” markalı avtomobillər toqquşub. Pərvin Fətullayev və 2 sərnişini xəstəxanaya yerləşdirilib, sərnişinlərdən 16 yaşlı Sənan Mirzəyev orada ölüb.

Faktla bağlı Cinayət Məcəlləsinin 263.2-ci (Yol hərəkəti və nəqliyyat vasitələrinin istismarı qaydalarını pozma; eyni əməllər ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi açılıb.

Məhkəmə iclasında ifadə verən İlham Əsgərli və Əhliman Süleymanov elan olunmuş ittiham üzrə özlərini təqsirli bilməyiblər. Prokuror deyib ki, təqsirləndirilən şəxslər özlərini təqsirli bilmirlər. Buna əsaslanan prokuror əvvəlcə zərərçəkənləri və şahidləri dinləməyi, sonda təqsirləndirilən şəxslərin ifadələrini almağı təklif edib. Zərərçəkənin hüquqi varisi Maqsud Mirzəyev və onun nümayəndəsi Afət Qazıyeva əvvəlcə təqsirləndirilən şəxslərin dindirilməsini istəyiblər. İlham Əsgərlinin vəkili Bəylər

Məmişov isə zərərçəkmişlərin ifadəsinin alınmasını təklif edib: “İttiham tərəfi sübutlarını ortaya qoysun. Bundan sonra təqsirləndirilən şəxslər ifadə verəcək”.

Yerində müşavirə keçirən hakimlər məhkəmə istintaqının aparılması ilə bağlı qaydaları açıqlanması barədə qərar qəbul edib. Qərara görə, əvvəlcə zərərçəkənlərin, sonra şahidlərin, sonda isə təqsirləndirilən şəxslərin ifadəsi dinləniləcək. Bu səbəbdən ifadə verməsi üçün Sənan Mirzəyevin atası Maqsud Mirzəyev kürsüyə dəvət olunub.

O, qeyd edib ki, təqsirləndirilən şəxslərdən İlham Əsgərlini tanıyıb. Onun sözlərinə görə, hadisə baş verən vaxtı həyat yoldaşı ilə birlikdə Nyu-Yorkda olub: “Bizə zəng gələndən sonra Bakıya qayıtdıq. Mən hadisəni araşdırmağa başladım. Məlum olub ki, hadisədən əvvəl oğlum evdə olub. İlham oğluma zəng edib, paintball oynamağa getməyi təklif edib. Bunun üçün Şüvəlana getməyi təklif edib. Oğlum sürücü olmadığını, sürücü olmadan evdən çıxamdğını deyib. Buna baxmayaraq, İlham oyunu oynamağa getməyi israr edib. Bundan sonra İlham deyib ki, özü gələrək onu götürəcək. Belə də edib. Evin ətrafında olan kameralara baxanda görünüb ki, avtomobili sürücü yox, İlhamın özü sürüb. İlhamın avtomobili idarə etmək üçün sürücülük hüququ olmayıb. Sürücülük vəsiqəsi olmadan sükan arxasında əyləşib və nəticədə törətdiyi qəza nəticəsində oğlum vəfat edib”.

Maqsud Mirzəyev daha sonra qeyd edib ki, oğlu baxımsızlıqdan həyatını itirib: “Məni yandıran odur ki, oğlum daha yüksək səviyyəli xəstəxanaya yox, Sabunçu xəstəxanasına aparılıb. İlham əsgərli Pərvin Fətullayev əvvəlcə Kliniki Tibbi Mərkəzə, sonra isə

İstanbul xəstəxanasına aparılıblar. İlham Əsgərli, Pərvin Fətullayev Sabunçu xəstəxanasında müayinə edilməsi üçün məqsədə müvafiq olmayıb. Amma mənim oğlumu Sabunçu xəstəxanasında müayinə etmək məqsədə uyğun bilinib. Belə olan halda oğlum yiyəsiz qalıb və nəticədə aldığı xəsarətdən vəfat edib. Məlum hadisə saat 6-da baş verib. Bu müddətdə 3 saat mənə hadisə ilə bağlı məlumat verilməyib. Üç saatdan sonra, yəni 9-10 arası hadisə ilə bağlı bizə məlumat verilib. Burada mənim oğluma qarşı laqeydsizlik olub. Bu hadisənin günahkarlarının layiqli cəza almasını istəyirəm”.

Prokurorun suallarını cavablandıran Maqsud Mirzəyev bildirib ki, oğlu Sənanla İlham Əsgərli bir sinifdə oxuyublar. Onun sözlərinə görə, onların münasibətləri normal olub. O, daha sonra qeyd edib ki, Sabunçu xəstəxanasında da ona qarşı münasibət yaxşı olmayıb: “Biz Bakıya çatan kimi birbaşa Sabunçu xəstəxanasına gəldim. Orada həkim səviyyəsində heç kim bizi qarşılamadı. Bir süpürgəçi Mərdəkanda olan morqa getməyi təklif etdi. Bildirdi ki, oğlumuz ordadır. Oğlum Sabunçu xəstəxanasına aparılmasaydı, yaşayacaqdı. Çünki həmin xəstəxanada təmir gedir. Müalicə üçün normal şərait yoxdur. Oğlum uzun müddət küçədə yaralı vəziyyətdə qalıb. Sonra qırıq bir təcili yardım maşını ilə xəstəxanaya aparılıb. Elə oğlum baxımsızlıq ucbatından yolda dünyasını dəyişib”.

Daha sonra hadisə zamanı xəsarət alan İlham Əsgərlinin sürücüsü Pərvin Fətullayev ifadə verib. O, bildirib ki, hadisə baş verən günü İlham ona zəng edərək paintball oynamağa getməyi təklif edib. Ona özümü yaxşı hiss etmədiyimi, bu səbəbdən də maşın sürə

bilməyəcəyimi dedim. İlham maşında oturmağımı, avtomobili isə özü idarə edəcəyini dedi. Mən də etiraz etmədim”.

Prokurorun suallarını cavablandıran Pərvin Fətullayev bildirib ki, hadisənin baş verməsində özü günahkardır. Onun sözlərinə görə, İlham Əsgərlinin sürücülük vəsiqəsi olmayıb: “Bunu bildiyim halda sükanı İlhama vermişəm. Buna görə özümü günahkar sayıram”.

Pərvin Fətullayev qeyd edib ki, 10 ildir sürücü kimi fəaliyyət göstərir. Onun sözlərinə görə, 1 il 6 ay olardı sürücülük şirkətində işləməyə başlayıb: “Həmin şirkətdə işləyən gündən İlham Əsgərlinin sürücüsü olmuşam. Bu müddətdə İlham məndən maşın sürməyi öyrənmək istəməyib. Heç vaxt da mənim yanımda maşın sürməyib. Hadisə baş verən günü özümü pis hiss etdim. O da maşını idarə etmək istədi, buna da etiraz etmədim. Əgər sükanı İlhama verməsəydim, bu məlum hadisə də baş verən deyildi”.

Daha sonra Pərvin Fətullayev Maqsud Mirzəyevin nümayəndəsi Afət Qazıyevanın suallarını cavablandırıb. Suallara cavab verən Pərvin Fətullayev bildirib ki, birinci Sənan Mirzəyevi təcili yardım maşını ilə xəstəxanaya aparıblar: “Onun birinci aparılmasında məqsəd olmayıb. Çünki Sənan Mirzəyevin xəsarətləri daha ağır idi. Bu səbəbdən də onu birinci apardılar. Sonra gələn maşınla İlhamı və məni xəstəxanaya apardılar. Sənanı və yaxud İlhamı hansı xəstəxanaya aparılmasından xəbərim olmayıb. Həmin vaxt orada bizim də qohumlarımız olmayıb. Bizi də orada olanların vasitəsi ilə xəstəxanaya apardılar”.

Suallara cavab verən Pərvin Fətullayevin ibtidai istintaq zamanı ziddiyyətli ifadə verməsi üzə çıxıb: “İstintaqa sükan arxasında mənim olduğum barədə ifadə verdim. Sonradan İlhama da belə ifadə verməsini təklif etdim”.

Prosesdə Pərvin Fətullayevin sürücü kimi işlədiyi şirkətin nümayəndəsi Ceyhun Əliyev ifadə verib. O, bildirib ki, hadisə zamanı avtomobilə ziyan dəyib və nəticədə şirkət 5820 manat ziyan çəkib. O, şikayəti və tələbləri olmadığını deyib.

Məhkəmə iclası aprelin 15-də davam etdiriləcək.

Qeyd edək ki, ölən Sənan Mirzəyevin “McDonalds Azərbaycan” şirkətinin icraçı direktoru Maqsud Mirzəyevin oğlu olduğu bildirilir. İlham Əsgərli isə Səbail Rayon İcra Hakimiyyətinin başçısı Asif Əsgərovun oğludur.