Diasporla iş üzrə dövlət komitəsinin sədrinin qardaşı “Kredit qalmaqalı”na görə həbs edilən, sonradan borcunun bir qismini ödədiyinə azadlığa buraxılan Hacı Ibrahim Nehrəmlinin Beynəlxalq Banka borcu heç də 78 milyon manat deyil.

Onun açıqladığı bu məbləğ yalnız prezidenti olduğu “Avesta Konserni” MMC-nin borcudur. Bildirilir ki, nədənsə Hacı Ibrahim Nehrəmli faktiki olaraq ona məxsus olan başqa şirkətlərin adına rəsmiləşdirlən kreditləri “unudur” və indi onlar bəzi məsələləri iş adamının yadına salmaq, eləcə də cəmiyyətin aldadılmasının qarşısını almaq istəyirlər.

Hacı Ibrahim Nehrəmlinin prezidenti olduğu şirkətin işçilərinin məlumatına görə, yalnız Gəncə şəhər icra hakimiyyətinin keçmiş başçısı Eyvaz Babayevin direktoru olduğu “Həsən-96" MMC-yə Beynəlxalq Bankın ”ABB Premyer Müştəri Xitməti" Filialı tərəfindən ayrılmış kreditin məbləği 50 milyon 776 min manatdan çoxdur. May ayının əvvələrində isə “Həsən-96" MMC-nin banka borcu 70 milyon manata çatıb.

Hacı Ibrahim Nehrəmlinin qaynı Ələsgər Nadirovun rəhbərlik etdiyi “Həsən-96" Mənzil Tikinti Kooperativinin adına 25 milyon manatdan artıq kredit rəsmiləşdirilib. ”Həsən-96" MMC və “Həsən-96" MTK-nın adları Hacı Ibrahim Nehrəmlinin kiçik oğlu Həsənin adını və təvəllüdünü bildirir.
Ancaq həm Eyvaz Babayevin, həm də qaynı Ələsgər Nadirovun adına rəsmiləşdirələn kreditlərin məbləği Hacı Ibrahim Nehrəmlinin baldızı oğlu Ilqar Ibrahimovun rərbərlik etdiyi şirkətlərin adına rəsmiləşdirilmiş kreditlərin yanında dənizdə damla kimidir. Bu şəxsin rəhbərlik etdiyi şirkətlərin adına rəsmiləşdirilmiş kreditin bank faizləri ilə birlikdə 350 milyon manatdan artıqdır. Yeri gəlmişkən, qeyd edək ki, Hacı Ibrahim Nehrəmli saxlanıldıqdan sonra Ilqar Ibrahimov da “Bandotdel”in əməkdaşları tərəfindən saxlanılmış, onun evində axtarış aparılmış və ifadə verdikdən sonra sərbəst buraxılmışdı.

Məlumatlara görə, “Bandotdel”in əməkdaşları kiçik bir araşdırma ilə Ilqar Ibrahimovun əsl cavabdeh olmadığı, onun adına rəsmiləşdirilən kreditin də əslində Hacı Ibrahim Nehrəmli tərəfindən götürüldüyünə əmin olublar. Iddialara görə, dəqiq araşdırılma aparılsa kreditlərin götürülməsi ilə bağlı sənədlərdəki imzaların da Ilqar Ibrahimova məxsus olmadığı, bəzi kredit tarnşlarının ayrıldığı günlərdə bu şəxsin ümumiyyətlə Bakı şəhərində olmadığı üzə çıxa bilər.

Məlumata görə, faktiki olaraq Hacı Ibrahim Nehrəmlinin götürdüyü kreditlərin ümumi məbləği mayın əvvəlində 524 milyon manat təşkil edib və bu borc faizlərə görə hər ay təxminən 40 milyon manat artır. Buna görə də bu gün onun dəqiq nə qədər borcu olduğunu Beynəlxalq Bankının aidiyyatı əməkdaşlarından başqa heç kim, hətta Hacı Ibrahim Nehrəmlinin özü də dəqiq bilmir. Ancaq təxmini hesablamalara görə, hal-hazırda Hacı Ibrahimin yalnız kredit borcu təxminən 600 milyon manata yaxındır. Bundan başqa Hacı Ibrahim Nehrəmlinin ailə üzvülərinin adına rəsmiləşdirdiyi bir neçə milyon maanatlıq ipoteka borcu da var.

Buraya təxminən 7-10 milyon manatlıq vergi borcunu, bir neçə şirkətə isə götürdüyü mal və “podrat”çılara gördürdüyü işə görə bir neçə milyon manatlıq borcunu da əlavə etsək Hacı Ibrahim Nehrəmlinin maliyyə durumu haqqında ümumi rəy yarana bilər. Məlumata görə, artıq həmin şirkətlərin bəziləri borclarını almaq üçün məhkəməyə müraciət ediblər.

Ancaq bu da son deyil. Hacı Ibrahim Nehrəmlinin işçilərinə də bir neçə aylıq əmək haqqı borcu var. Bir zamanlar özünü milyader kimi təqdim edən bu adam indi işçilərinin qarşısına belə çıxa bilmir. Işçiləri bir neçə dəfə telefonla danışaraq onu görüşə dəvət etsələr də, Hacı Ibrahim onların qarşısına çıxmayıb.