Sabirabadın Mərkəzi rayon Xəstəxanasında qətliam

Uşaq qatillərinin meydan suladığı bu xəstəxana, əslində dövlət içində bir dövlət hesab olunur
Sabirabadın Mərkəzi rayon Xəstəxanasında yaşanan özbaşınalıq, bu gün demək olar ki, kritik həddə çatıb. Dövlət içində dövlət hesab olunan bu tibb müəssisəsi, əslində baş həkim Əziz Mikayılovun sayəsində “killer”lərin və uşaq qatillərinin yuvasına çevrilib. Xəstəxanada həkimlər nə istəyirlər, onu da edirlər. Əvvəlcə cibləri boşaltdıran həkimlər, sonra da xəstələrin canlarını alırlar. Insanlıq hissini itirmiş belə həkimlərin sayəsində, bu günədək qəsdən öldürülmüş, həyata göz açmayan yüzlərlə körpə uşaqlar da var. Xəstəxananın doğum şöbəsi hamilə qadınlar üçün “ölüm kabusu” olsa da, əslinə baxsan ora Əziz Mikayılovun əsas gəlir yerlərindən biri də hesab olunur. Doğum şöbəsinin qapısını “ərəbzəngi” kimi kəsən tibb bacıları, Əziz Mikayılovun tətbiq etdiyi qaydaları, xəstələrin yaxınlarının diqqətinə elə çatdırırlar ki, gəl görəsən. Şöbədə adi doğuşun qiyməti 150 manat, cərrahiyyə əməliyyatı ilə uşağın götürülməsi isə 480 manatdır. Müalicə üçün lazım olan iynə və dərmalara gəldikdə, bütün bu kimi ləvazimatlar da xəstələrin üzərinə atılır. Xəstəxana ərazisində 24 saat fəaliyyət göstərən aptek, dövlətin xəstəxanaya verdiyi dərman preparatlarını və digər tibbi ləvazimatların satışını həyata keçirir. Təbii ki, buradan əldə olunan gəlir də Ə.Mikayılovun cibinə daxil olur. Baş həkimin şəxsi büdcəsinin doldurulması üçün, doğum şöbəsində çalışan Ofelya və Güllü adlı ginekoloq həkimlər, hər gün hər cür qanunsuzluq əməllərinə əl atmaqdan belə çəkinmirlər. Uşaq qatilləri kimi tanınan hər iki ginekoloqun etdiyi cinayətlərə baxmayaraq, sanki heçnə olmamış kimi yığdıqları çirkli pulların hesabına, hər dəfə sudan quru da çıxmağı bacarırlar. Ümumiyyətlə, Sabirabadın Mərkəzi rayon Xəstəxanasının doğum şöbəsi, sanki ölüm düşərgəsini xatırladır. Oradan sağ çıxmaq, deyəsən bu günəcən çoxlu sayda anaya və körpəsinə heç də müyəssər olmayıb. Məsələn, bu yaxınlarda yolum Əziz Mikayılovun özününküləşdirdiyi xəstəxanaya düşmüşdü. Doğum şöbəsinin qarşısında olarkən, sanki gördüklərim məni dəhşətə də gətirdi. Cavan bir qadın çarəsiz halda ağlayaraq öldürülmüş körpəsini istəyirdi. Yaxınları nə qədər çalışsalar da, həmin ananı evinə apara bilmirdilər. Ürək ağrıdan acı mənzərəyə, heç cür baxmaq olmurdu. Ananın fəryadı ətrafdakıları da məyus edirdi. Yaşlı bir qadının ağlayaraq bu anı Allah-Təalaya dua etməsi, dərhal diqqətimi çəkdi. Yaxınlaşıb nə olduğunu soruşduqda o, bildirdi ki, “ay bala daha nə olacaq, qızımı bura saat 8:00-dan gətirmişəm, özü də sağlam, onuncu ayının içindədir. Qızımın balasını Güllü həkim açıq-aşkar öldürüb. Düz yeddi saata yaxın idi ki, uşaq ana bətnində çırpınırdı. Qızımın vəziyyəti getdikcə pisləşirdi. Dedim həkim cərahiyyə əməliyyatı ilə uşağı götür, axı qızım ölür, uşaq da boğulur. O isə saymazyana halda onu bildirdi ki, qorxulu heçnə yoxdur, adi doğuş olacaq”. Dərindən ah çəkən yaşlı qadın onu da vurğuladı ki, “kiçik qızımın da uşağını Ofeliya həkim öldürüb”. Çox keçmədi ki, həmin qadın gözləmə otağına keçdi. Mən bunun nə ilə bitəcəyini gözləmək qərarına əldim. Doğum şöbəsinin qarşısında olduqca maraqlı faktların şahidi oldum. Çünki, tibb bacıları gözləmə otağının qapısını kəsib, əvvəlcədən pul verməyən qadınları çölə buraxmırdılar. Kim ki, pul verə bilmirdi, o halda şəxsiyyət vəsiqəsini girov qoymağa məcbur olurdu. Bütün bunları gördükcə Azərbaycan səhiyyəsinə nifrətim birə on artırdı. Qeyd olunan ünvanda olduğum vaxtdan, təqribən 10 saatdan çox keçmişdi. Alan almışdı, verən də vermişdi. Ətrafda sanki nisbi sakitlik hökm sürürdü. Çox keçmədi ki, bu sakitliyi haqqında söhbət açdığım yaşlı qadının qışqırtısı pozdu. Dünyaya yenicə göz açan oğul nəvəsini itirmişdi. Qadının yaxınlarının danışıqlarından belə başa düşmək mümkün olurdu ki, 13 saat çarəsiz və baxımsız qalan ananın uşağını, Güllü həkim öldürüb. Bəli, bir gündə 4 oğlan uşağının ölümü, əslində faciə idi. Zərəçəkmişlərin “Gündəm Xəbər” in əməkdaşına verdikləri məlumatlara görə, xəstəxanada yaşanan faciəli faktlarla bağlı Səhiyyə Nazirliyinin qaynar xəttinə və Sabirabad rayon prokurorluğuna dəfələrlə müraciətlər etmişik. Amma, sözügedən qurumların səlahiyyətliləri, həmişə Əziz Mikayılovun “killer”lərini müdafiə ediblər. Sabirabadın Mərkəzi rayon Xəstəxanasında belə qətliamların nə dərəcədə məqsədyönlü şəkildə aparıldığını deyə bilməsək də, amma atılan bu cür addımlar, birbaşa dövlətçiliyimizə və millətimizin genefonduna vurulan zərbədir.

Cəfər

“Gündəm Xəbər”