Bəzi məmurlar ölkə rəhbərinin ABŞ-na növbəti səfərinin planlaşdırıldığı bir vaxtda, yenə də çirkin niyyətlərindən əl çəkmək istəmirlər

Bu da bir həqiqətdir ki, Azərbaycanda fəaliyyət göstərən bəzi müstəqil mətbu orqanlara qarşı ayrı-ayrı vəzifə sahibləri tərəfindən göstərilən basqılar, artıq uzun illərdir ki, davam etməkdədir. Bu sırada gündəmi zəbt edən və adı daha çox hallanan “Gündəm Xəbər” qəzeti və onun təsisçisi Şirin Cəfəri ilə bağlı yaşananlardır. Bir anlığa olub-keçənlərə nəzər salaq və azacıq da olsa tarixə ekskurs etməklə, bəzi məqamlara aydınlıq gətirməyə çalışaq. Çünki, “Gündəm Xəbər” qəzeti bir mətbu orqan olaraq daim dövlətimizə, xalqımızın milli maraqlarına xidmət edən müstəqil, ictimai-siyasi qəzet olaraq, bu gün də çoxsaylı oxucularının varlığı ilə seçilən mətbu orqanlardan biridir. Qəzet fəaliyyət göstərdiyi illər ərzində daim dövlətçiliyimizi, xalqımızın milli maraqlarını öndə tutmuş və həmin maraqların əleyhinə çıxan qüvvələrə qarşı ardıcıl mübarizə aparmaqla, zaman-zaman qətiyyətli mövqeyini də ortaya qoymuşdur. Eyni zamanda sosial əhəmiyyət kəsb edən problemləri də qabartmaqla, səhlənkar, savadsız, üzərinə düşən vəzifə borcunu lazımınca yerinə yetirməyi bacarmayan rəhbər şəxsləri də, hər zaman tənqid etməkdən belə çəkinməmişdir. Bütün bunlara baxmayaraq, bu gün “Gündəm Xəbər” qəzeti və onun təsisçisi Şirin Cəfəri ilə bağlı yaşananlar ölkə mediası ilə bərabər, tam əksəriyyəti də düşündürməkdədir. Buna səbəb, guya ki, vaxtilə Şirin Cəfərinin vergidən yayınması və belə bir səbəb üzündən də, ona Azərbaycan Respublikası CM-nin 213.2-ci maddəsi ilə cinayət işinin qaldırılması olub. 20 may 2013-cü il tarixdə Gəncə şəhəri Kəpəz rayon Məhkəməsində keçirilən məhkəmə prosesində, ona üç il şərti, iki il isə sınaq müddətinə məhkəmə hökmünün elan olunması, olduqca absurd, qərəzli və heç bir həqiqəti ifadə etməyən bir qərar olur. Çıxarılmış məkhəmə qərarından Gəncə Apelliyasiya Məhkəməsinə apelliyasiya şikayəti verilsə də, çox təəssüflər olsun ki, çıxarılmış qərar qüvvədə saxlanılır. 02 sentyabr 2015-ci il tarixdə isə, birinci instansiya məhkəməsinin çıxartdığı qərardan Ali Məhkəməyə müraciət olunur ki, bu da nəticəsiz qalır. Yəni Ali Məhkəmə də, birinci instansiya məhkəməsinin qərarını qüvvədə saxlayır.

Diqqəti o hal da cəlb edir ki, Şirin Cəfəri barəsində çıxarılmış iki illik şərti cəza müddəti 20 may 2015-ci il tarixdə başa çatdıqdan və Ali Məhkəmə tərəfindən birinci instansiya məhkəməsinin qərarı qüvvədə saxlandıqdan sonra, Ədliyyə Nazirliyinin İstintaq İdarəsində yenidən CPM-nin 306.1-ci maddəsi ilə cinayət işi qaldırılır və toplanmış iş materialları baxılması üçün Yasamal rayon Məhkəməsinə də göndərilir. Sözsüz ki, Şirin Cəfəriyə qarşı növbəti dəfə belə bir addımın atılması, ölkə ictimaiyyətinin nəzər-diqqətini yenidən yaşanan problemin varlığına yönəltdi. Çünki, onun saxta, qondarma vergi ittihamı ilə ittiham olunması, keçirilən məhkəmə prosesində isə, dövlət ittihamçısının Şirin Cəfəriyə qarşı 5 il həbs cəzası istəməsi, artıq problemin ciddiliyindən xəbər verdi ki, bu da müstəqil mətbuata təzyiq kimi qiymətləndirilməlidir.

Amma, Milli Məclisin 15 mart 2016-cı il tarixdə keçirilən iclasında BAXCP sədri, millət vəkili Qüdrət Həsənquliyevin yaşanan problemlə bağlı mövqeyini ortaya qoyması, bir daha ölkəmizin məhkəmə sistemində kompleks islahat proqramları aparılmasının zəruriliyini ortaya çıxartdı. Məsələn, o, çıxışı zamanı bildirir ki, “bir sıra hallarda qəbul olunmuş məhkəmə qərarlarına möhür vurulmamış, məhkəmə icraçıları onu icra etməyə başlayırlar. Misal üçün mən “Gündəm xəbər” qəzetinin oxucusu olmasam da, onu deyə bilərəm ki, bu qəzetin təsisçisi ilə bağlı Ali Məhkəmədə qərar qüvvəyə mindikdən sonra, çox keçmir ki, onun icrasına başlanılır. Yəni, Şirin Cəfəri barəsində qərar qəbul olunub ki, guya o, vergi borclarını ödəmir. Qeyd olunan vergi borcunun necə hesablanmasının nə qədər ədalətli olub-olmaması məsələsini hələlik bir kənara qoyuram. Bu adam artıq həmin borcu ödəməyə başlasa da, məhkəmə bir-iki günə onun işinə baxacaq. Mən bu barədə məlumatları mətbuatdan oxumuşam. Yəqin ki, Şirin Cəfərini həbs edəcəklər. Ola bilsin ki, qəzet səhifələrində işıq üzü görən açıqlamalar, hansısa məmurun xoşuna gəlməyib”.

Bütün bunlar bir daha onu söyləməyə əsas verir ki, “Gündəm Xəbər” qəzetinin təsisçisi ilə bağlı qərəzli yanaşma, bəzi vəzifə sahiblərinin tənqidə dözümsüzlüyünü ortaya çıxarır. O halda meydana çoxsaylı suallar da çıxır ki, əgər “Gündəm Xəbər” qəzeti daim sosial problemləri ictimailəşdirirsə, bəzi vəzifə sahiblərinin fəaliyyətini tənqid atəşinə tutursa, həlli vacib olan problemlərin həlli istiqamətində silsilə açıqlamalar dərc edirsə, bütün bunların nəyi pisdir? Belə bir addımların atılması, bəyəm dövlətimizə və xalqımıza xidmət etməklə bərabər, ölkə rəhbərinin yürütdüyü siyasətə verilən dəstək də deyilmi? Əgər “Gündəm Xəbər” qəzeti fəaliyyət istiqamətini bu yöndə davam etdirirsə, o halda sual oluna bilər ki, qəzetin təsisçisi ilə bağlı qərəzli yanaşmaya səbəb nədir? Deməli, Şirin Cəfəriyə qarşı bəslənilən belə bir yanaşma, istər dövlətçiliyimizə və xalqımızın milli maraqlarına, istərsə də ölkə rəhbərinin yürütdüyü siyasətə edilən xəyanətdən başqa bir şey deyil.

Diqqəti o halda cəlb edir ki, yaxın vaxtlarda ölkə rəhbərinin ABŞ-na növbəti səfəri baş tutacaq ki, səfər proqramı şərçivəsində iki ölkə arasında əhəmiyyət kəsb edən bir çox məsələlər də müzakirə olunacaq. Belə bir vaxtda Şirin Cəfərinin həbs olunması, yəqin ki, Azərbaycan hakimiyyətinə başucalığı da gətirməyəcək.

Zöhrab Təmrazov