Bu səbəbdən də Ziya Məmmədov «Bakı Beynəlxalq Dəniz Ticarət Limanı»nın baş direktorunu neytrallaşdırmağa çalışır.

Təxminən, bir ay bundan öncə «Bakı Beynəlxalq Dəniz Ticarət Limanı» Qapalı Səhmdar Cəmiyyətinin (QSC) yaradılmasının 1 illiyi qeyd olunub. Məhz həmin tədbirdə nəqliyyat naziri Ziya Məmmədov da iştirak edib və adıçəkilən QSC-nin fəaliyyətini yüksək qiymətləndirdiyini bildirib. Bu isə özlüyündə olduqca maraqlı məqamlardan xəbər verir. Çünki nəqliyyat naziri ilə «Bakı Beynəlxalq Dəniz Ticarət Limanı»nın baş direktoru Taleh Ziyadov arasında münasibətlərin bir o qədər də yaxşı olmadığı artıq çoxlarına bəllidir. Mövzu ilə bağlı əldə etdiyi bilgiləri paylaşan məlumatlı şəxsin sözlərinə görə, Ziya Məmmədov məhz bu yolla, yəni QSC-nin ünvanına təriflər yağdırmaqla onun baş direktorunu ələ almağa, Taleh Ziyadovu neytrallaşdıraraq öz tərəfinə çəkməyə çalışır: «Lakin bunun baş tutmaq ehtimalı olduqca zəifdir. Çünki «Bakı Beynəlxalq Dəniz Ticarət Limanı»nın baş direktoru Ziya Məmmədovun yerinə iddialılar sırasında qərarlaşıb. Belə ki, o, rəhbərlik etdiyi QSC-də özünü pekəşar kadr kimi göstərdikdən sonra nəqliyyat naziri postuna doğru irəliləməyə başlayacaq. Taleh Ziyadov məclislərin birində bunabənzər ifadə işlədib və qeyd edib ki, Ziya Məmmədovun vəzifədən azad olunmasına çox az zaman qalıb. QSC rəhbəri ümid edir ki, himayəsində olduğu şəxslər Ziya Məmmədovun istefaya göndərilməsindən sonra məhz onu Nəqliyyat Nazirliyinin başına gətirəcək. Odur ki, Ziya Məmmədov nə qədər çaba sərf etsə də, Taleh Ziyadovu neytlaşdıra, onu öz tərəfinə çəkə bilməyəcək». Bakı Beynəlxalq Dəniz Ticarət Limanı»nın baş direktorunun Azərbaycan Diplomatik Akademiyasının elmi işçisi və professoru olduğunu qeyd edən mənbə hesab edir ki, Taleh Ziyadov hazırda nəqliyyat naziri postuna ən iddialı namizədlərdəndir: «Onun ABŞ-ın Vaşinqton dairəsində yerləşən Corctaun Universitetinin Diplomatim Xidmət məktəbində magistr təhsili alması, Kembric Universitetində doktorluq dərəcəsi üzrə təhsilini davam etdirməsi, eyni zamanda bir müddət öncəyə qədər ABŞ-da Kolumbiya dairəsində Vaşinqtonda yerləşən ABŞ-Azərbaycan Ticarət Palatasının icraçı direktorunun müavini vəzifəsində çalışması, bir sözlə Qərb təhsilli olması nəqliyyat naziri postuna gətirilməsində geniş imkanlar yaradır. Bir məsələni də nəzərə almaq lazımdır ki, Taleh Ziyadov «Bakı Beynəlxalq Dəniz Ticarət Limanı»nın baş direktoru vəzifəsinə gətirilərkən Ziya Məmmədovun bununla bağlı rəyi nəzərə alınmayıb. Halbuki sözügedən QSC Nəqliyyat Nazirliyinin nəzdində fəaliyyət göstərdiyindən belə bir addımın atılması gözlənilirdi. Lakin bu, baş vermədi. Təbii, bu, bir daha onu sübuta yetirir ki, Ziya Məmmədov artıq «yuxarılar» üçün o qədər də əhəmiyyətli kadr deyil. Odur ki, o, hər an vəzifəsindən azad oluna bilər. Bir qədər öncə də qeyd etdiyim kimi, Taleh Ziyadov həmin günü səbirsizliklə gözləyir».
Mövzu ilə əlaqədar qarşı tərəfin də mövqeyini işıqlandırmağa hazırıq.