“Prezident seçkilərindən dərhal sonra Bakıda xeyli ev söküləcək, nəticədə minlərlə ailə evsiz qalacaq”.

Bunu virtualaz.org saytına açıqlamasında Neftçilərin Hüquqlarını Müdafiə Təşkilatının sədri Mirvari Qəhrəmanlı deyib. Təşkilat sədri bildirir ki, Dövlət Neft Şirkətinə məxsus olduğu iddia edilən ərazilərdəki evlər söküləcək. Artıq Sabunçu və Ramana qəsəbəsində söküntü işlərinə başlanılıb.

“ARDNŞ-in balansında olduğu iddia edilən ərazilərdəki evlərin dəqiq siyahısını hazırlamaq mümkün deyil. Lakin evlərin yerləşdiyi ərazilərin siyahısı, eləcə də şirkət rəhbərlərinin ayrı-ayrı vaxtlarda açıqladığı rəqəmlər söküləcək evlərin minlərlə olacağını deməyə əsas verir” - deyə hüquq müdafiəçisi bildirib.

M.Qəhrəmanlı qeyd edib ki, şirkət Səbayel rayonunda Bibiheybət, Bayıl, “20-ci sahə” adlı ərazilərdə, Sabunçu rayonunda müxtəlif ərazilərdə, o cümlədən də Ramana və Balaxanı qəsəbələrində qanunsuz evlərin olduğunu açıqlayıb: “Qeyri-qanuni hesab edilən evlərin siyahısında birinci yeri isə Binəqədi rayonu tutur. Abşeron rayonunda da ARDNŞ tərəfindən “qara siyahı”ya salınıb sökülmə növbəsi gözləyən xeyli belə ev var”.

Xatırladaq ki, şirkətin 2011-ci ildə yaydığı açıqlamadasında təkcə Binəqədi rayonu ərazisində şirkətə məxsus ərazilərdə 37 min evin inşa edildiyi göstərilmişdi.

M.Qəhrəmanlı Sulutəpə ərazisindəki evlərin də ARDNŞ tərəfindən siyahıya salındığını vurğuladı: “Həmçinin Bakı Neft Emalı Zavodunun yaxınlığındakı evlər də söküləcək ərazilərin siyahısına daxil edilib”.

Hüquq müdafiəçisi söküntü zamanı yalnız sənədləri qaydasında olan evlər üçün kompensasiya ödənildiyini deyir: “Lakin kompensasiya müəyyənləşdirilərkən evlər bazar qiymətlərinə uyğun qiymətləndirilmir. Nəticədə ödənilən kompensasiya evlərin tikintisinə çəkilən xərclərin yarı hissəsi qədər belə olmur. Bu məbləğlə yeni ev almaq və ya tikmək isə müşkülə çevrilir”.



Hüquq müdafiəçisi məhkəmə araşdırmaları zamanı geoloji xəritələrin təqdim olunmadığını söyləyir: “Evlərin sökülməsi zamanı yaranan problemlər məhkəmə müstəvisində həll edilir. Amma bu zaman da vətəndaşların hüquqları pozulur. Məhkəmələrin monitorinqi onu deməyə əsas verir ki, əksər hallarda vətəndaşın iştirakı təmin olunmadan məhkəmə birtərəfli hökm çıxarır. Əsas məsələ isə ARDNŞ-in geologi xəritə təqdim etməməsidir. Yəni həmin ərazinin doğrudan da şirkətə məxsus olmasının rəsmən təsdiqlənməsi lazımdır, şirkət isə bunu etmir”.

M.Qəhrəmanlı deyir ki, əksər ərazilərdə, xüsusilə də “Bibiheybət” NQÇİ yaxınlığındakı evlər sökülərkən Dövlət Neft Şirkətinin mütəxəssisləri ərazilərin neftlə çirkləndiyini əsas gətirərək bu ərazilərin yaşayış üçün təhlükəli olduğuna dair sənədlər vermişdilər. Lakin təhlükəli sayılan ərazilərdə sonradan məktəb, uşaq bağçası və digər sosial obyektlər tikildi: “İndi də həmin ərazilərin yerində yeni obyektlərin tikilməyəcəyinə təminat verilmir”.

Hüquq müdafiəçisi daha bir məqama diqqət çəkir: “Hər kəsə bəllidir ki, neft ərazilərindəki evləri kimlərinsə razılığı olmadan inşa etmək mümkünsüzdür. Bəziləri bələdiyyədən, mənzil istismar sahəsindən, bəziləri isə şirkət rəhbərliyində olan şəxslərdən müvafiq icazə alıb. Əgər o evlər qeyri-qanuni inşa edilibsə, o zaman məsul şəxslər barədə cəza tədbirlərinə başlanılmalıdır”.

Təşkilat rəhbəri seçki ərəfəsində narazıların sayının artmaması üçün söküntü işlərinin hələlik qəsdən yubadıldığını qeyd etdi: “Parlament seçkiləri ərəfəsində deputatlarla görüş oldu. Sonra söküntü işləri yubadıldı, əhaliyə bildirdilər ki, problem artıq həll olunub. Lakin seçki bitən kimi ev söküntüsü yenidən intensiv şəkil aldı. Bu dəfə belə olacaq”.

Qeyd edək ki, mətbuatda ARDNŞ-ə istinadən 25 minə yaxın qanunsuz tikilinin söküləcəyinə dair xəbərlər yer alıb.