Məscid tikintisi üçün ayrılmış ərazi «Texnikabank» tərəfindən zəbt olunub, əhali prezidentə şikayət edəcək

1990-cı ildə Beyləqan rayon xalq deputatları sovetinin icrayə komitəsinin 73 N-li qərarı ilə inşasına başlanılan Rayon Cümə məscidinin tikintisi, bu günə kimi başa çatdırılmayıb. Beyləqan rayon XDS icrayə komitəsinin qərarı ilə rayon məscidinin tikintisi üçün şəhərin 23 N-li məhəlləsi ərazisindən 1,5 hektar torpaq sahəsi ayrılıb və tikinti işlərinə başlanılıb. Təəssüflər olsun ki, məscidin tikintisi 1992-ci ilin axırlarında dayandırılıb. Adıçəkilən rayonda olarkən fürsətdən istifadə edib yarımçıq cümə məscidinin ərazisinə baş çəkdik. Müşahidələr zamanı məscid ərazisinin ayrı-ayrı şəxslər və «Texnikabank»ın rayon filaialı tərəfindən mənimsənildiyini öyrəndik.
Məsciddə şəraitsizliyin höküm sürməsinə baxmayaraq, yarımçıq beton lövhələrin bir küncünə sığınıb ibadətlə məşğul olan insanları görmək olur. Məcid də ibadət edən insanlara söhbətimiz zamanı öyrəndik ki, məscidin küncündəki bir otaqlı daladalanacaq (hücrə) rayon ictimaiətinin köməkliyilə tikilib. Rayon dindarları isə qeyd etdiyimiz bu kiçik otaqda namaz qılıb dua edirlər. Daha sonra, məsciddə namaz qılan insanlarla söhbət edib mövcud şəraitlə maraqlandıq.
Yarımçıq məsciddə hər gün ibadətlə məşğul olduğunu deyən İlham adlı şəxs tikintinin başa çatdırılmasın istəyir. Onun sözlərinə görə, məscidin tam inşa edilməsi ilə bağlı rayon rəhbərliinə müraciət olunub: «Rayonun əvvəlki rəhbərliyinə müraciət etdik. Rəhbərlik səviyyəsində məscidin tikintisinin başlaması ilə bağlı müzakirələr aparıldı. İcra Hakimiyətindən bildirdilər ki, tikintini davam etdirilməsinə kömək etməyə hazırdırlar. Beyləqan rayon ictimaiyyəti də tikintiyə dəstək verməyə hazırdır. Sadəcə olaraq tikintinin başlaması ilə əlaqədar olaraq bir təşkilatçı qrupun yaradılmasına ehtiyac var. Rayon rəhbərliyi ilə görüşdə əvvəlki icra başcısı İrşad Əliyev təklif etdi ki, bir nümayəndə heyyəti yaradılsın və müəyyən vəsaitin toplanmasına başlanılsın. Biz bununla razılaşmaqla, rayon rəhbərinin göstərişi ilə bu heyyətin yaradılmasın təklif etsək də, rayon rəhbərliyi bununla razılaşmadı».
Digər həmsöhbətimiz Vaqif Məmmədov isə bildirdi ki, məscidin tikintisi səhlənkar şəxslərin və məmurların günahı ucbatından başa çatdırılmayıb: «Bu işdə bir ağsaqqal lazımdı ki, qabağa düşsün və bu işin həllinə istiqamət versin. Gördüyünüz kimi Cümə Məscidinin 70%-i tamamlanıb, sadəcə olaraq məscidin gümbəzi yarımçıq qalıb. Bunun üçün də, külli miqdarda vəsait tələb olunmur. Buna baxmayaraq İcra Hakimiyyəti və məmurlar bu işdə heç bir səy göstərmirlərsə, görünür özlərinin bu ərazidə marağı var. Artıq Cümə Məsccidinin bir hissəsi mənimsənilib, buna baxmayaraq yenə çıxış yolu var. Məscidin bərpasında və tikilməsində, bizim əlimizdən gələn fəhləlik və 5-10 manat puldur ki, bunu da etməyə hazırıq. Bir də sizdən çox xahiş edirəm ki, məscidin torpaq sahəsinin bir hissəsinin satılmasını xüsusi olaraq qeyd edəsiniz».
Rayon sakinləri və dindarlarla müsahibəni yekunlaşdırdıqdan sonra, Beyləqan Şəhər İcra Hakimiyyətinə gələrək, adı çəkilən rayonun baş memarı Oqtay Bəşirovun fikirlərin öyrəndik. Rayon memarının sözlərinə görə, Cümə Məscidinin tikintisi maliyyə vəsaiti olmadığından yarımçıq dayandırılıb. Cümə Məscidinin tikintisi üçün ayrılan torpaq sahəsinin satılması məsələsnə isə O. Bəşirovun cavabı belə oldu: «Şəhər Cümə Məscidinin ərazisi heç kimə satılmayıb, heç satıla da bilməz. Kim bu ərazini sata bilər. Hər kəsə bəllidir ki, məscid ərazisi yalnız Cümə Məscidinin tikintisi üçün nəzərdə tutulmuşdur, nə zaman vəsaitimiz olarsa, Cümə Məscidi də o zaman tam tikilərək axıra çatdırılacaq».
Bununla belə O.Bəşirov «Texnikabank»ın məscid ərazisin zəbt etməsi xəbərinə aydınlıq gətirməkdən nədənsə imtina etdi.
Sonda qeyd edək ki, rayon ictimaiyyəti və dindarlar, Cümə Məscidinin tam tikintisi və zəbt olunan torpaq sahəsinin məscidə qaytarılması ilə bağlı yaxın günlərdə prezident İlham Əliyevə müraciət ünvanlayacaqlarını bildirdilər.
Əziz