Tofiq Quliyev: “Gəmi təmiri seximi dağıtdılar, nazir özü isə mənə dedi ki...”

“Vaxt gələcək, o bulvarda istirahət edəcəklər. Ancaq heç kəs bilməyəcək ki, üstündə gəzişdikləri məkana görə müflisləşib ürək xəstəliyinə tutulanlar, xirtdəyə kimi borca girdiyi üçün ürəyi dözməyib dünyadan köçənlər olub. İnanın ki, indi mən həmin vəziyyətdəyəm. Mənimlə ölüm arasında bir addımdır...”

Bu sözləri deyən Tofiq Quliyev keçmiş sahibkardır. Qabaqlar imkanlı iş adamı olub. İndi isə bir həsirdir, bir də Məmmədnəsir. Onu bu günə hökumətin sonuncu bulvar layihəsi salıb. Bu layihə işləri yağ kimi gedən sahibkarı əməllicə müflisləşdirib.

Tofiq Quliyevin bəxti onda gətirməyib ki, sahibi olduğu gəmi təmiri sexi bulvar layihəsinin ərazisinə düşüb. Bircə saatın içində söküb qoyublar yerə.

Sahibkar başına gələnlərdən ürək ağrısı ilə danışır: “Mənim bir şirkətim vardı - “Tərsanə LTD” MMC. Gəmi təmiri ilə məşğul olurduq. Keçən ilin yanvarında qəflətən ağır texnikanı tökdülər zavoda, başladılar şumlamağa. Dedim a kişi, bir əl saxlayın, bu zavod burda elə-belə dayanmayıb ki... Bunun yiyəsi var, gəlin bir danışığa, görək kimsiniz, nəçisiniz, niyə sökürsünüz. Amma dayanmadılar”.

Tofiq Quliyevə bəlli olub ki, söküntünü Vergilər Nazirliyi aparır. Qışqır-bağırından sonra işi yarımçıq dayandırıblar. Sahibkara kompensasiya boyun olublar. Bir ay sonra vergilər naziri onu özü şəxsən qəbul edib.

Sahibkar sözünə davam edir: “Nazir dedi ürəyini sıxma, kompensasiya da olacaq, üstəlik başqa ərazidə yer də ayıracaqlar, fəaliyyətini davam etdirəcəksən, razı qalacaqsan. Düşündüm ki, bunu deyən sıradan biri deyil, nazirdir, dedisə, mütləq edəcək”.

Bəs niyə Vergilər Nazirliyi?

Bu sualı sahibkar özü də nazirlik işçilərinə verib. Ona bircə kəlmə ilə cavab verilib ki, indi şəhərdəki abadlıq işlərinə bütün nazirliklər, o cümlədən Vergilər Nazirliyi də cəlb olunub.

Sonralar sahibkarın başı nələr çəkib, özü danışsın: “Beləliklə, arxayın oldum ki, kompensasiya olacaq, fəaliyyət üçün başqa münasib yer ayrılacaq və sair. Dedilər yer tap, icarəhaqqısı bizlikdir. Dəzgahları, avadanlıqları aparaq hələlik yığaq ora. Hələ demişdilər avadanlıqları daşımaq üçün fəhlə-filan tut, pullarını özümüz ödəyəcəyik. Mən də qollarımı çirmələdim, işə başladım”.

Sahibkar yer də tapıb, yükünü daşıtdırmağa fəhlələr də. Amma bir də xəbər tutub ki, nə kompensasiya, nə kömək...



“Başladılar üstümə audit vergiləri yollamağa. Günaşırı dəftər-kitabları qoltuğunda dayandılar qapımda. Bu yolla mənə təsir etmək istəyirdilər. Hər dəfə maşına oturdub nazirliyin istintaq idarəsinə aparırdılar, mənimlə elə davranırdılar ki, guya şübhəli şəxsəm, ya cinayətkaram. Bu yolla təzyiqlər göstərə-göstərə nəyim vardısa, alt-üst elədilər. Gəmi təmiri üçün avadanlıqlar, gəmi hissələri məhv oldu... Əmlak əvvəl bir tanışın obyektində qaldı, icarəhaqqını ödəyə bilmədim, o da çıxarıb tökdü çölə. Yığmağa yer tapmadım, hamısı ortada qalıb sıradan çıxdı, getdi metalloma. Obyekti də ki, yerlə yeksan elədilər. Bir sözlə, nazirlik məni lüt eləyib buraxdı”.

Sahibkarın ən böyük dərdi indi banklarda faizi faiz üstə yığılan borclarıdır. Bir az əvvələ qədər maldan-mülkdən nəyi vardısa, satıb ödəyirmiş. İndi isə...: “Təkcə sahibkarlıq fəaliyyətimlə bağlı 800 min manat kreditim vardı. Faizlərini ödəyə bilməmişəm, indi rəqəm vurub çıxıb kəlləçarxa”.

Sahibkarın deməsinə görə, bütün bu işlərə Vergi Auditi Departamentinin rəisi Habil Məmmədov rəhbərlik edib. İndi rəis yaxasını çəkib kənara. Deyir indi məni heç nazirliyin qapısına yaxın buraxan da yoxdur.

T.Quliyev Vergilər Nazirliyini məhkəməyə verib. 1 saylı İnzibati İqtisad Məhkəməsi onun “Az-İmport" Məhdud Məsuliyyətli Cəmiyyətə, Dövlət Bayrağı Meydanı Kompleksi İdarəsinə və Vergilər Nazirliyinə qarşı iddia ərizəsini qəbul edib. Sahibkar iddiaçı qismində qoyduğu təşkilatlardan müştərək qaydada 1 milyon 248 min manat tutularaq ona ödənilməsini tələb edir. İş adamı obyektinin sökülməsində həmin təşkilatların da iştirak etdiyini söyləyir.

Bir neçə ay əvvəl məhkəmə T.Quliyevə məxsus obyekti sökənin kimliyini müəyyən etmək üçün ekspertiza təyin edib və prosesi qeyri-müəyyən vaxtadək təxirə salıb.

Vergilər Nazirliyi isə bu iddiaları qəbul etmir. Nazirliyin mətbuat xidmətindən virtualaz.org-a bildirilib ki, sahibkar Tofiq Quliyevə məxsus gəmi təmiri sexinin söküntüsünün onlarla heç bir əlaqəsi yoxdur.

Qeyd edək ki, məhkəmədə şahid kimi dindirilənlər obyekt sökülərkən Vergilər Nazirliyinin işçilərinin ərazidə söküntü işlərinə nəzarət etdiklərini və göstərişlər verdiklərini təsdiqləyiblər.