Hacı İbrahim Nehrəmlidən bu dəfə 2 milyon 655 min manat pul tələb olunur

Bir neçə gün əvvəl fırıldaq yolu ilə 355 min manat pulu mənimsənilən əslən Qazax rayonundan olan iş adamı Elşad Məmmədov başına gələn oyunlara dövlət qurumlarının biganəliyi səbəbindən özünü «Avesta» konserninin binası qarşısında yandıracağını bəyan etmişdi.
Xatırladaq ki, Elşad Məmmədov «Avesta» konserninin sahibi Hacı İbrahim Nehrəmlini onun 355 min manat vəsaitini ələ keçirməkdə ittiham edir və bu barədə iş hətta ayrı-ayrı məhkəmə instansiyalarında da baxılıb. Lakin hələ də pulunu geri ala bilməyən sahibkar artıq intihara əl atmaq zorunda qaldığını da söyləyir.
Sahibkar “Gündəm Xəbər”ə açıqlamasında bildirir ki, borc əlindən ailəsinin dolanışığını da təmin edə bilmir: «Əvvəllər xırda sahibkarlıqla məşğul idim. İndi əlimdə olan pulumu Hacı İbrahim Nehrəmlinin adamları aldığından borc aldığım adamların qarşısında girov qalmışam. Bilmirəm nə edim. Buna görə də çıxış yolunu intiharda görürəm».
Sahibkar bu arada maraqlı bir açıqlamada da bulundu: «Bu gün baxıram ki, banklar vətəndaşları özlərinin ağır faizləri ilə borca salırlar. 27 faizlə vətəndaşlara borc hesablayırlar. Mən iki ildir ki, Hacı İbrahimdən 355 min manatımı ala bilmirəm. Əgər mən də bu banklar kimi 27 faizlə borc hesablasaydım, indii Hacı İbrahim Nehrəmlinin mənə 2 milyon 300 min manat, borclu ulduğu pula birgə 2 milyon 655 min manat borcu olardı. İndi nə edim? Mən də durum bəyan edim ki, Hacı İbrahim, pulun üstünə faiz gəlib, milyonlarımı qaytar? Adamın Allahı olar. Mən halal haqqımı tələb edirəm».
Sahibkar onu da təkrar olaraq bildirdi ki, əgər pulunu ala bilməsə, intihardan başqa çıxış yolu qalmayıb.
Qarşı tərəfi də dinləməyə hazırıq…

Kənan