Deputatın sabiq komitə sədri ilə müəmmalı “işbirliyi”

Bu günlərdə Qırğızıstanın paytaxtında Heydər Əliyevin anadan olmasının 91 illiyi münasibətilə Bişkekdə kikboksinq üzrə "Heydər Əliyev kuboku” uğrunda Azərbaycan-Mərkəzi Asiya turnirinin yekun nəticəsinin elanı ilə bağlı maraqlı situasiya yaranıb. Daha doğrusu, turnirin Azərbaycan tərəfindən təşkilatçılığını üzərinə götürən şəxslərin böyük yalanı ifşa olunub. Xatırladaq ki, sözügedən turnirin təşkilatçıları Kikboksinq Federasiyalarının prezidenti, millət vəkili Adil Əliyev və Azərbaycanın Qırğızıstandakı səfiri Hidayət Orucov olub. “Gündəm xəbər” sübutlarla adıçəkilən şəxslərin, xüsüsilə də Adil Əliyevin Azərbaycan xalqına ünvanladığı doğru olmayan məlumatın nədən ibarət olduğuna aydınlı gətirmək istəyir.
Millət vəkili Adil Əliyev turnirin yekunları ilə bağlı 3 may tarixində öz Facebook hesabında bunları yazıb: "Dostlar, ulu öndər Heydər Əliyevin xatirəsinə həsr olunmuş, Azərbaycan Orta Asiyaya qarşı yarışımız 6-6 hesabı başa çatdı. İdmançılarımız çox məharətlə vuruşdular. Bu tədbirimiz çox ağır keçdi, çunki biz dörd ölkənin ən güclü idmançılarına qarşı vuruşduq. İndi isə mediada 3 may tarixində Bişkekdən yaydığı məlumatla tanış olaq: “Bişkek, 3 may Azərbaycanın Qırğızıstandakı səfirliyinin və hər iki ölkənin Kikboksinq federasiyalarının təşəbbüsü ilə ulu öndər Heydər Əliyevin anadan olmasının 91 illiyi münasibətilə Bişkekdə kikboksinq üzrə "Heydər Əliyev kuboku” uğrunda Azərbaycan-Mərkəzi Asiya turniri keçirilmişdir.
Yarışlarda Azərbaycan, Qırğızıstan, Qazaxıstan, Özbəkistan və Tacikistan idmançıları iştirak etmişlər.
Qırğızıstanın Bədən Tərbiyəsi və İdman üzrə Dövlət Agentliyi direktorunun müavini Bolot Motukeev çıxış edərək "Heydər Əliyev kuboku” uğrunda keçirilən turnirin gözəl təşəbbüs olduğunu diqqətə çatdırmışdır. O, son vaxtlar Azərbaycan ilə Qırğızıstan arasında idman sahəsində əlaqələrin genişləndiyini söyləmişdir.
Azərbaycanın Qırğızıstandakı səfiri Hidayət Orucov bildirmişdir ki, ümummilli lider Heydər Əliyev SSRİ Nazirlər Soveti sədrinin birinci müavini işlədiyi dövrdə Orta Asiya ölkələrində də digər sahələrlə yanaşı, idmanın inkişafına xüsusi diqqət göstərirdi.
Səfir bildirmişdir ki, bu gün Prezident İlham Əliyevin rəhbərliyi ilə Azərbaycanda idmanın inkişafı istiqamətində mühüm işlər görülür. İdmançılarımız beynəlxalq yarışlarda, Olimpiya Oyunlarında böyük uğurlar qazanırlar.
Diplomat 2015-ci ildə Azərbaycanda birinci Avropa Oyunlarının keçiriləcəyini xatırlatmış, bunun ölkəmizdə idmanın sürətlə inkişafının göstəricisi olduğunu vurğulamışdır. O demişdir ki, Azərbaycan sözün əsl mənasında idman ölkəsinə çevrilmişdir və qələbələrimiz hələ qarşıdadır.
Azərbaycan Kikboksinq Federasiyasının prezidenti, Milli Məclisin üzvü Adil Əliyev ölkəmizdə idmanın inkişafına göstərilən dövlət qayğısından danışmışdır. O, dövlətimizin başçısı İlham Əliyevin Milli Olimpiya Komitəsinin prezidenti kimi bu istiqamətdə mühüm xidmətlərini qeyd etmişdir. Azərbaycanın beynəlxalq idman yarışlarına da ev sahibliyi etdiyini deyən A.Əliyev kikboksçularımızın nailiyyətlərindən söhbət açmışdır.
Qırğızıstanın əmək, miqrasiya və gənclər nazirinin müavini Marat Nuraliev, Qırğızıstan Milli Olimpiya Komitəsinin rəhbəri Aleksandr Voinov ölkələrimiz arasında bütün istiqamətlərdə, o cümlədən idman sahəsində əlaqələrin inkişafı haqqında danışmış, idmançılara uğurlar arzulamışlar.
Sonra yarışlara start verilmişdir. Gərgin keçən yarışlar 6:6 hesabı ilə başa çatmış, idmançılara sertifikatlar və qiymətli hədiyyələr təqdim olunmuşdur.
Salonda "Dostluq qələbə qazandı” şüarları səsləndirilmişdir.
Göründüyü kimi, millət vəkili Adil Əliyevlə medianın yaydığı informasiya məzmun və mahiyyət baxımından üst-üstə düşür. Qeyd edək ki, hər iki məlumat 3 may tarixində Bişkekdən yayılıb. Məsələnin ziddiyyətli tərəfi isə bundan ibarətdir ki, “Gündəm xəbər”ə Azərbaycan yığmasının həmin turnirdə 7-6 hesabı ilə uduzduğu haqda informasiya daxil olub. Bu səbəbdən də məlumatı dəqiqləşdirmək üçün Bişkekdəki həmkarlarımızla əlaqə saxladıq və məlum oldu ki, turnurin yekun hesabı doğrudan da 7-6 olub.
“Gündəm xəbər” deyilənləri sübut etmək üçün Qırğızıstanın ən nüfuzlu media orqanlarından sayılan “Veçernıy Bişkek”də dərc edilən məqalənin sürətini təqdim edir. Qeyd edək ki, sözügedən media orqanı 39000 nüsxə ilə rus dilində çap olunur və bütün Orta Asiyada məşurdu. Təqdim etdityimiz faktdan da görünür ki, qəzet Azərbaycan komandasının uduzduğunu sübut edən dəlil kimi keçirilən bütün görüşlərin nəticəsi haqda geniş informasiya verir. Təbii ki, biz də Azərbaycan yığmasının nəinki heç-heçə etməsini, böyük hesabla qələbə qazanmasını istərdik. Ancaq idmanda hər şey ola bilər. Yeri gələndə məğlubiyyətlə də barışmağı bacarmaq lazımdır. Məğlubiyyəti isə heç vaxt yalanla kompensasiya etmək mümkün deyil.
İndi söz Adil Əliyevlə, Hidayət Orucovundur…
SAMİR