Düşünmək və fikir tərzi insanın gündəlik həyatına böyük təsirlər qoyar. İnsanlar dünyaya olan baxışlarına və təfəkkürlərinə görə bir-birindən fərqlənirlər. O insan ki, müsbət düşüncəlidir, bu aləmdə baş verən heç bir hadisəni yaxşı və ya pis qarşılamır. Onun nəzərinə görə bu hadisələr anbaan hesaba alınmış və Allah tərəfindən nəzarət edilən hadisələrdir. O, Allahın lütf və rəhmətindən ləzzət alar.

İnsan özündə müsbət düşüncələri inkişaf etdirmək qabiliyyətinə malikdir.
gundemxeber.az deyerler.org-a istinadən bildirir ki, biz həyatda çox sayda insanlara rast gəlirik ki, xoşbəxtdirlər. Lakin elələri də vardır ki, bəxtlərinin olmadığından şikayət edirlər. Əslində bu insanlar öz varlıqlarından kənarda xoşbəxtliyin axtarışındadırlar. Halbuki, hər bir insanın xoşbəxtliyi daxilindədir və çox təəssüf ki, bir çoxları bundan qafildirlər.
Əhli-Beytin (ə) nəzərinə görə, mömin həyata qarşı nikbin olmalı və eyni zamanda, başqa möminləri də sevindirməyə, xoşbəxt etməyə cəhd göstərməlidir. Həzrət Peyğəmbər (s) buyurur: "Allah Təala yanında ən sevimli iş - möminləri şad etməkdir". İnsan o zaman başqasını şad edə bilər ki, müsbət düşüncəli olsun. Bu insan ləzzət almağı həm özü bacarır və başqalarını da şad etməyə çalışır.
Başqa bir tərəfdən, insan başqalarını şad edən zaman onların sevincinə şərik olar və özü də sevinər. Ona görə də həyatda nikbin düşüncəli olmağı öyrənmək lazımdır ki, həm özün xoşbəxt olasan və həm də ətrafında olanlara bu xoşbəxtliyindən pay verəsən. Bunun üçün insan öz istedadlarına və qabiliyyətlərinə diqqət etməlidir. Allahın ona əta etdiyi maddi və mənəvi nemətləri görməyə çalışmalıdır. İmanını gücləndirməli və həyatının hər bir sahəsində Allaha təvəkkül etməyi bacarmalıdır. Nəzərə almalıdır ki, Allahın fəzl və rəhməti daimidir, müvəqqəti deyildir. İnsan bu həqiqəti dərk etməlidir. "Həqiqətən Allah (dünyada) bütün insanlara qarşı lütf və mərhəmət sahibidir və lakin onların çoxu şükür etmirlər". ("Yunus" 60).
"Allah (Öz) bəndələrinə qarşı mülayim rəftarlı, onları çətinliyə salmayan və diqqətlidir. İstədiyinə (mənəvi və maddi) ruzi verir və O, qüvvətli və yenilməz qüdrət sahibidir". ("Şura" 19).
Beləliklə deyə bilərik ki, möminin müsbət düşüncəli olması imanının sayəsində meydana gələr. Allaha olan iman insanın həyata olan baxışlarını nikbin edər. Əgər Kərbəla hadisəsinə nəzər salsaq, görərik ki, bu hadisənin faciəsi və müsibətin böyüklüyü Xanım Zeynəbin (s.ə) nikbin baxışlarını dəyişdirə bilmədi. O, bu hadisə ilə bağlı buyurdu: "Mən gözəllikdən başqa bir şey görmədim". Xanımın (s.ə) bu sözləri o həqiqəti bir daha sübut edir ki, insanların rəftarı dünyaya olan baxışlarının təsiri altında olar. Müsbət düşüncəli insan, həyatının ən ağır anlarında belə, gözəllikləri görə bilir. Bu baxış və düşüncə isə Allaha iman və təvəkkül sayəsində formalaşır.