Əslində yazmamaq, yazmaqdan daha ağır gəlir mənə. Sadəcə ürəyimin gözlərimə rəhm etməməsi əndişələndirir. "Göy madyan" adı həm atın rəngini, həm də onun və zamanın hərəkət sürətini, onunla yanaşı birinci Qarabağ savaşçısının xəyal dünyası və real durumundan bəhs edəcək. Burada at, əlil olmuş döyüşçünün bütün istirablarına baxmayaraq, sona yaxın muradına yetməsi təsvirinin maraqlı finalının səbəbkarı olacaq. Sadəcə yazmamaqda acizəm.

 Göy madyan - 1-ci hissə 

--Hardadır o bədbəxt, yenə yatır! Oğlanlarımın qoçaqları ayrılıb ev oldu, mənə aciz, avarası qaldı.

Mən oyaq idim. Sadəcə düşünürdüm ki, özümü yuxuluğa vurmaqla fantom ağrısını aldada bilərəm.

Gecə saat on birə kimi dözüb, atam yatandan sonra, şiddətli fantom ağrısının məni vadar edib aldırdığı 0,5 l, arağı əl damında yavaş-yavaş içib boşaltmışdım. Əlillkdən qabaq, bəlkə də iki ayda bir dəfə 100 qramdan artıq içməzdim.

Protezləşmə mərkəzində pasient olan zamanlarda, şiddətli sinir ağrıları səhərə kimi mənə işgəncə verib yuxu şirinliyindən məhrum edərdi. Hər dəfə belə olanda, bir qrup əlilin şad-xürrəm qəhqəhələr içrə söhbətləşdiyi, nərd oynadıqlarını təəccüb edirdim.

Gecələrin birində, dözülməz ağrıların istirabını çəkərək dəhlizdə gəzərkən həmtalelərim mənə səslənib, bir siqaret uzatdılar.

-Al çək. Dərdini bilirik. Hökümət dərman verməsə də, "dərmanı" özümüz tapırıq.

-Nədir bu?

-Yaxşı maldır. Yandır ruhun və canın dincəlsin.

Onsuz da onları ağrıdan coda edən bu əməllərindən məlumatlı idim. Sadəcə evdə allaha tapşırıb gəldiyim üç uşağın talehin düşünərək, bu vərdişlərdən uzaq durmağa özümü məcbur edirdim. Və ona görə də etirazım qəti oldu. Əlillərin 

demək olar hamısı yaşda məndən kiçik idilər.

Mənim 34 yaşım var idi.

Günlərin birində, baş leytenant Fikrətin ad gününü qeyd edirdik. Mənə də araq süzdülər. Əvvəl etiraz etsəm də dizdən aşağı ayağını itirmiş Fikrət inandırdı ki, ağrıların azalmasına kömək edir. Ömrümdə ilk dəfə idi ki, 300 qrama yaxın alkaqol içki içdim. Və həmin gecəni rahat yatdım.

Qoltuq ağaclarına təpinib, atamın hüzuruna çıxdım.

- Ay oğul, günortaya qədər yatanın əlbbətdə cöngələrini apararlar. "Nizami" kolxozunun sahələrinin kövərlərinə hörüklənmiş altı mal-qaradan iki iri 160-180 kq-lıq danaları və Göy madyanı oğurlamışlar. Oğrunun insaf damarı da işə düşübmüş. Ya da işini müşkülə salmamaq qərarı veribmiş .

- Xalxın oğlanları oralarda döyüşə-döyüşə vazgenlərin mal-qarasını qənimət gətirdi. Sən isə bir ayağını da oralarda qoyub, üstümə qayıtdın. İndi də döyüş görməyənlər sənin heyvanlarını oğurlayır.

Mən bilirdim ki, atam halal adamdır. Bu qənimət, qarət məsələsini də yandığından dilə gətirir. Bizim qəsəbədə onun qədər çox saylı heyvan 

bəsləyən yox idi. Camaat onun bu yorulmazlığından söhbət açanda, qürurla deyərdi ki, Savalanın suyundan, havasındandır.

Atamdan bir az rəncidə idim; Bir il öncə İcra başçısı Maşallah bəy onunla tanış olarkən, məni xeyli təriflədikdən sonra, nəyə ehtiyacımız olduğunu soruşanda, atam da oğlunun əlil olduğu səbəbindən, ot-ələf tədarükünü kəsir olduğunu dilə gətirmişdi. Atamın bu təmənnası məni bərk narahat etmişdi. Heç vaxt olmadığı qədər, səsimi yüksəldərək, niyə yardım istədin? Cöngənin birini satıb, ot-ələf ala bilərdik axı, demişdim. Başçı kolxoz sədrlərindən birinə 100 ədəd ot presi tapşırmışdı. Sonralar Maşallah bəyin gözündən yayınmağa çalışırdım. O həm də könüllülər batalyonunun qurucusu sayılırdı. Əraziləri azad etmədə əsas rollardan birinə üstlənmişdi.

Digəlki, heç bir il də başçı qala bilmədi. 4 iyun qiyamından sonra istefa verdi.

Qoltuq ağaclarına güvənib, 1,5 km məsafə qət edərək cöngələr hörüklənmiş əraziyə gəldim.

Məni də, atamı da yandıran, Göy madyanın oğruya yalından yapışmasına rüxsət verməsi idi. Göy madyan 

ikimizdən özgə heç kəsə tabe olmazdı. Görünür quldur təcrübəli at minən imiş. Danaları altı metrlik zəncirlərlə hörükləyirdik. Heyvanların aparılma istiqamətini bilmək üçün, hörük sürüntəyi axtarsam da görə bilmədim. Görünür təcrübəli oğru, hörükləri danaların boğazına dolayıbmış ki, iz buraxmasın. Elə ilk ağlıma gələn, cənub istiqaməti oldu. Erkəc, Mənəş, Buzluq istiqaməti. Ona görə də quru çaylağa düşüb, cənub istiqamətində axtarışımı davam etdirdim. Quru çaylağın qumələyən yerində, səkkiz inək dırnağı, dörd nal izi müşahidə etdim...

 Davamı var.

GundemXeber.Az