“GündəmXəbər” qəzetinin “Seçmələr” rubrikasının bugünkü müsahibi meydan hərəkatının liderlərindən biri, Azərbaycanın sabiq müdafiə naziri Rəhim Qazıyevdir. O, 19 yanvarda gerçəkləşən mitinq və aksiya sonrası 15-16 yaşlı qız uşaqlarının zorla polis bölmələrinə aparılması ilə bağlı fikirlərini bizə danışdı.

-Rəhim bəy, son zamanlar 15-16 yaşlı qızların zorla polis bölmələrinə aparılması nədən xəbər verir?

-“YAP” hakimiyyətinin “Azərbaycanın təhlükəsizliyinin qarantı, xalqın layiqli həyat səviyyəsinin təmin edəcəyik” – deyərək, vədinə xilaf çıxması və apardığı yalnış siyasətin nəticəsidir. Qısası ölkədə qanun adından qanunsuzluq, ədalət adından ədalətsizlik baş alıb gedir.

-Sizcə, ötən ayın 19-dakı mitinqin əsas səbəbi nə idi?

-Səbəblər sonsuz saydadır, saymaqla bitməz. Bilirsiniz, indiki iqtidar SSRİ rəhbəri olmuş Leonid İliç Brejnevi də kölgədə qoyub. Brejnev SSRİ-də yüksək vəzifə tutmaqla qalmamış, həmçinin “Qəhraman ana” ordenindən başqa yerdə qalan bütün orden-medallarla özünü təltif etmişdi. Ona görə də 1982-ci ildə o, ölən zaman tabutunu qəbrə qoyanda ağırlıqdan onun gupultusunun səsi bütün dünyaya yayıldı.
Mədəsinin ölçüsünü itirən, ayı ətindən kabablar yeməklə doymayan, mövcud iqtidar başını yeməkdən qaldıranda trilyonlarla kapitalı olan Vatikanda kilsə tikir, Fransada kilsələr təmir edir, Rusiyada kimsəsizlər üçün evlər, sığınacaqlar tikdiyi halda bir çox kənd-qəsəbələrimizdə hələ də “Xudayar” bəyin tövlələri vəziyyətində qalan doğum evləri, məktəblər, mədəniyyət evləri qalmaqdadır, həmçinin öz vətəndaşına qarşı son dərəcə ögey, qeyri-səmimi münasibət göstərilir. Ona görə də xalq rejimə ikrah hissi bəsləyir. Gənclər başda olmaqla xalqın haqlı etirazından vahiməyə düşən iqtidar artıq 15-16 yaşlı uşaqları, özü də qız uşaqlarını qanunsuz, zorla polis bölmələrinə apararaq gənclərin gözünü qorxutmaq, mübarizə əzmini qırmaq istəyir.

-15-16 yaşlı qızların atalarının gözü qabağında, məktəbdən zorla polis bölmələrinə aparılması Azərbaycan mentalitetini aşağılamaq deyilmi?

-Milli-mənəvi dəyərlərdən danışmaq üçün birinci olaraq o dəyərlərin qorunması üçün mübarizə aparılmalıdır. Bu gün Faiq Ağayev, Aygün Kazımova, elgizlər, zaurlar və digər bu qəbildən olanlar durub xalqa “mənəviyyat” dərsi keçirsə, hansı milli mentalitetdən danışa bilərik?!...
Adlarını çəkdiyim “mənəviyyat carçıları” sayəsində cəmiyyətimizdə fahişəlik, əxlaqsızlıq çiçəklənir.

-Rəhim bəy, “Azərbaycan Xalq Hərəkatı” (AXH) gənc qızların zorla polis idarələrinə aparmasına kəskin etiraz bildirməklə qalmamış, həm də aclıq aksiyasına başlamışdır. Siz də bu aksiyaya qoşulmusunuzmu?

-Əslində burda uzun müddətli aclıq aksiyasından söhbət getmir. Sadəcə olaraq AXH-in öncülləri baş vermiş hadisəyə etiraz olaraq bir gün aclıq elan etdilər. Şəxsən mən heç vaxt aclıq aksiyasının tərəfdarı olmamışam. Onsuz da bizi istəməyən iqtidar gecə-gündüz arzu edir ki, hamımız birdəfəlik qırılaq. Aclıq edərək onları niyə sevindirməliyəm? Əksinə, mən hər zaman fiziki gücə malik olub iqtidarla aktiv, barışmaz mübarizə aparmağı hər şeydən üstün tuturam.

-AXH haqqında nə deyərdiniz?

-Bu hərəkatı ərsəyə gətirən və müstəsna xidmətləri olan İsgəndər bəydi. O, hərəkatı yaradıb xalqı yenidən həmrəyliyə çağıraraq, yeni mübarizənin başlanğıcını qoydu. Buna görə ona dərin minnətdarlığımı bildirirəm. Bu hərəkata böyük ümidim var. Düşünürəm ki, AXH şaxələnəcək, böyük etirazçılar ordusunu ətrafında birləşdirərək, xalqın uzun illərdir arzuladığı dəyişikliyi həyata keçirəcək.

Abdulla İsmayıloğlu
GundemXeber.Az