“Repressiya və İşgəncələr əleyhinə Komitə”nin koordinatoru, hüquq müdafiəçisi Oqtay Gülalıyevin avtomobillə vurulması, bir aydan çoxdur Türkiyənin “Avrasiya” və “Amerikan” xəstəxanasında komada olmasından hərkəs xəbərdardır. “Seçmələr” rubrikasında bu məsələylə bağlı daha geniş “Gündəm Xəbər” qəzetinin baş redaktoru Şirin Cəfəriylə söhbət etdik.

-Şirin bəy, həm partiya, həm də əqidə yoldaşınız, hüquq müdafiəçisi Oqtay Gülalıyevin son zamanlar başına gələn hadisələr haqqında danışardız.

-Ötən ayın 29-u “28 May” deyilən ərazidə Oqtay bəyin və mənim tanıdığım yaxın yoldaşla çayxanda oturub gözləyirdik. Oqtay bəy də bizim yanımıza gəlməlidi. Təxminən 17.22 radələrində Oqtay bəyi maşın vurduğunu bildik. Daha doğrusu onun mobil telefonu ilə bir şəxs mənə zəng vurub məlumat verdi. Mən dərhal özümü hadisə yerinə yetirdim. Polis və təcili yardım hələ gəlməmişdi. Oqtay bəy huşsuz vəziyyətində yerdəydi. Əvvəlcə sınıq-çıxıq olub-olmamasıyla bağlı onun əlini, qolunu, ayağını yoxladım. Sonra bir qədər səsimi ucaldaraq: “onu kim vurub”? deyə, maraqlandım. Haraya gələn adamlardan biri dedi ki, “vuran adam qaçmayıb burdadı”. Mən həmin şəxsə yaxınlaşan da onun da şok da olduğunu gördüm.

Bir qədər sonra Oqtay bəy də özünə gəlməyə başladı. İlk sözü də o oldu ki, Şirin mənə nə olub? Dedim ki, qorxulu heç nə yoxdur, sadəcə yıxılmısan. Daha sonra avtomobilləvuran şəxsə Oqtay bəyi dərhal “Semaşko” adlanan xəstəxanaya çatdırılmasını bildirdim, eyni zamanda kafeyə daxil olub mənimlə birgə olan yoldaşa da məlumatlandırdım ki, Oqtay bəyi maşın vurub. Dərhal küçəyə çıxdıq və gördük ki, Oqtay bəyi vuran sürücü xəstəxanaya çatdırmaq üçün yola düşüb. Bundan sonra mənim avtomobilimə əyləşərək biz də xəstəxanaya yol aldıq. Həmçinin Oqtay bəyi vuran avtomobilin markası, nömrəsini özümdə qeyd etdim. Qeyd edim ki, yol boyu Oqtay bəylə telefon əlaqələri yaradaraq danışırdım.
“Semaşka”ya çatdıqdan sonra Oqtay bəyə ilkin müayinələr başladı, tomoqrafiyadan da keçirildi. Oqtay bəy artıq özünə gəlmişdi, danışırdı, gəzişirdi, hətta artıq evə getmək istəyirdi. Amma orda Əmralı həkim var, professordu, O, müayinə zamanı Oqtay bəyin beynində çat olduğunu vurğuladı, ən azı bir neçə gün xəstəxanada qalmalı olduğunu vurğuladı. Eyni zamanda dönə-dönə qeyd etdi ki, 3-4 saatdan sonra yenidən beyin müayinəsindən keçməlidir. Birdən vəziyyət ağırlaşa, beynə qan sızsa dərhal əməliyyata başlamalıyıq.

-Dediklərinizdən belə başa düşdüm ki, Oqtay bəyin səhhəti ilk əvvəl o qədər də acınacaqlı olmayıb, bəs sonra necə oldu ki, Oqtay bəy komaya düşdü?

-Oqtay bəy xəstəxanaya çatdırıldıqdan bir saat sonra müxalifət və demokratik düşərgənin partiya sədrləri, nüfuzlu şəxsləri və digərləri xəstəxanaya gəldilər. Belə qərara gəlindi ki, xəstəni şəraiti, tibbi imkanları daha yüksək olan özəl klinika “BAKU CİTY Hosbital”a köçürülsün. Sözün düzü digər xəstəxanaya köçürülmə mənim ürəyimcə deyildi. Çünki, artıq burda müayinələr aparılmış, ilkin diaqnozlar qoyulmuş, xəstənin vəziyyətində hər hansı dəyişiklik olsa ona müvafiq tədbirlər görüləcəkdi. Hətta adı çəkilən klinikada çalışan və demokratik düşərgənin də üzvlərindən olan həkim Adil Qeybulla burda (yəni Semaşkada A.İ) da normal əməliyyatlar aparıla biləcək səviyədədir deyə vurğuladı. Lakin müxalifət camiyası “heç bir məsrəfdən qaçası deyilik, əsas Oqtay bəyin sağlamlığı vacibdir” deyərək, köçürülmə qərarını qüvvədə saxladılar. Çoxluğun qərarına hörmət edib etirazımı bildirmədim.

Beləliklə oktyabrın 29-u axşam saat 9-10 radələrində Oqtay bəy adı çəkilən özəl klinikaya köçürüldü. Bizlərə həmin klinikada gözləməyə icazə verməyərək dedilər ki, rəhbərlik gözləməyə qoymur. Məsələ burasındadır ki, adı çəkilən klinikada Oqtay bəyə heç bir müayinə, müalicə aparılmadı. Nə müayinələr olmuşdusa “Semaşka”da olmuşdu. Gecə saat 24.00 radələrində bizə dedilər ki, xəstə dərin yuxudadır gözləyirik. Ayın 30-u isə bizə məlum oldu ki, Oqtay bəy, artıq komadadır.

-Sözünüzdən belə çıxır ki, xəstəxanalar arası yerdəyişmədən sonra Oqtay bəy komaya düşdü?
-Bəli. Çünki heç bir müayinələr olmadı, əməliyyat aparılmadı.

-Şirin bəy, bilirsiniz ki, Oqtay Gülalıyev “Repressiya və İşgəncələr əlehinə Komitənin” rəhbəridir, ölkədə baş verən qanunsuzluq, korrupsiya, özbaşınalığa qarşı daim öz etiraz səsini çəkinmədən ucaltmaqdadır. Sizcə məhz bunlara görə əqidə yoldaşınızın əvvəlcə maşınla vurulması, sonra da komaya düşməsində hər hansı yüksək rütbəli məmurun sifarişi ola bilərmi?

Bu sualınıza nə hə, nə yox deyə bilirəm. Çünki Oqtay bəy, özü də hər zaman deyirdi ki, məni sıxışdıranlar, izləyənlər çoxdur. Həmçinin etirazlarına görə onu tez-tez prokurorluq və polis orqanlarına da çağrırdılar. Amma yenə də bunun sifariş olunmasını təsdiq etmək üçün hüquq-mühavizə oqanları şəffav araşdırma aparmalıdır. İlk öncə Oqtay bəyi vuran maşının hadisə törədənə qədər cızdığı trayektoriya mütləq nəzərdən keçirilməlidir. “Azərbaycan Dəmir Yolları QSC”-nin inzibati binası istiqamətindən, hadisənin baş verdiyi yerə qədər, yəni, Oqtay Gülalıyevi vuran «Hyundai» markalı, 90-PZ-543 dövlət nömrə nişanlı avtomobil və onun sürücüsü Kənan Abdullayevin qəsdən vurması və ya qəsdən vurmaması məsələsinə aydınlıq gətrilməsinə görə, ən vacib məsələ avtomobilin hərəkət etdiyi xətt üzrə kameraların açılmasıdır.

Şəxsən özüm bir jurnalist kimi ilkin araşdırma apararaq, adı çəkilən yol trayektoriyası boyunca kameraların olmasını yoxlamış, fotoşəkillərini də çəkmişəm. Artıq sosial şəbəkələrdə də yayımlamışam. Sürücü Kənan Abdullayev Azadlıq radiosuna açıqlamasında bildirib ki, onun özü də kameraların açılmasında maraqlıdır, hətta onun vəkili bu məsələ ilə bağlı müvafiq qurumlara sorğu da göndərib.

-Oqtay bəyə xəsarət yetirən sürücü barəsində hansı tədbir görülüb?

-Hüquq-mühavizə orqanları sürücünü “Semaşka”dan həmin gecə apardılar. İki-üç gündə saxladılar. Sonra şərti olaraq buraxdılar. Artıq “təsadüfən yüngül xəsarət yetirməklə” bağlı cinayət işi də açılıb. Amma bayaq yuxarıda qeyd etdiyim ki, heç də Oqtay bəyə yetirilən xəsarət yüngül deyil, ağırdır. Çünki o artıq bir aydır komadadır.

-Sözünüzdən belə çıxır ki, düzgün maddə ilə cinayət işi açılmayıb?

-Bəli.

-Şirin bəy, hal-hazırda Oqtay bəyin vəziyyəti necədir?

-Bilirsiniz ki, “CİTY Hosbital”dakı həkimlərin məsuliyyətsizliyindən sonra Oqtay bəyi, Türkiyə Respublikasındakı “Amerikan xəstəxanasına” köçürüldü. Amma vəziyyəti hələ də ağırdı. Baxmayaraq süni nəfəs vermə aparatlarından ayrılıb. Qan dövranı, ürək döyünməsi normaldı, böyrək fəaliyyətlərində problem yoxdur. Bir qalıb komadan ayılması.

-Ölüm riski varmı?

-Mən ümumiyyətlə ölüm düşünmürəm, heç bu sözü eştmək belə istəmirəm. İnanıram ki, Oqtay bəy tezliklə sağalacaq.

-Oqtay bəyin, başına gələn bu hadisələrlə bağlı mətbuatda, cəmiyyətdə, sosial şəbəkələrdə ictimailəşdirən ilk siz oldunuz. Sizin bu addımınıza dəstək olaraq digər media nümayəndələri də bu barədə dilə gəldilərmi?

-Bəli. Bizə qarşı əks olan iqtidar yönümlü medialarda bu barədə xeyli yazdı. Hətta ölkənin I Vitse-Prezidenti də bu məsələni nəzarətə götürdü və Oqtay bəyin Türkiyədə müayinə olunması xərclərini birbaşa Heydər Əliyev Fondu tərəfindən ödəniləcəyini bildirdi.

-Sonda nə demək istərdiniz?

-Allahdan Oqtay bəyə şəfa diləyir və tezliklə ayağa qalxaraq sıralarımıza qayıtmasını arzulayıram!

Abdulla İsmayıloğlu
GundemXeber.Az