44 günlük qələbə ilə bitən şanlı Vətən müharibəsindən sonra Azərbaycanda şəhid ailəllərinə, qazilərə hörmətdən, qayğıdan çox danışılıb. İstər cəmiyyətin, istərsə də rəsmilərin, Başda Ali Baş Komandan, prezident İlham Əliyevin xüsusi qayğı göstərdiyi kateqoriyadan olan qazilərimizə diqqəti göz qabağındadır. Bunu görməyən kordur. Qazilərin maksimum sağalmaları, onların bütün sosyal problemlərinin həlli prezident İlham Əliyevin, Birinci vitse-prezident Mehriban xanım Əliyevanın xüsussi diqqət mərkəzindədir. Demək olar ki, rəhbərlik üçün əsas prioritetdir.

Əfsuslar olsun ki, bu müqəddəs missiyaya xor baxanlar da var və bu ölkə rəhbərliyinin nəcib əməllərinə kölgə salır. Belələrindən biri də, deputat Elman Nəsirovdur. Başa düşülən deyil deputat seçildiyi Cəlilabad rayonunun Təzəkənd kəndinin müharibə qazisi Fərid Qədir oğlu Abbasovu “kiçiltməyə, alçaltmağa” yönəlmiş məntiqsiz açıqlamaları.

Məsələ ondan ibarətdir ki, Zəngilanın və Cəbrayılın alınması uğrunda vuruşan, yaralandığı halda, yenidən döyüşə atılan Fərid Abbasovun indi vəziyyəti ağırlaşıb, bədənində olan mərmi, onun bütün bədəninə zəhərlənmə verib. Ağrıdan yata bilmir. Bununla bağlı rayon deputatlarına, icra nümayəndəsinə, icra hakimiyyətinə dəfələrlə müraciət edib. Lakin onun bu acınacaqlı vəziyyətinə məhəl qoyan olmayıb.

Qazinin istəyi isə, çox kiçikdir, “dənizdən bir damla su istəmək qədər kiçik”. İxtisaslaşdırılmış Hərbi Hospitala yatırılmaq və mərminin fəsadlarını müəyyən qədər aradan qaldırmaq üçün iynə-dərman edilməsi.

Kömək etmək əvəzinə əksinə, Cəlilabadın deputatı Elman Nəsirov, qazini ələ salır, onun guya döyüşdə olmadığını, yaralanmadığını, bədənindəki yaraların isə guya natəmizlikdən əmələ gəldiyini bildirir.

Hansı ki, türklər demişkən ortada “qapı kimi” sübutlar var. Yaralandığı zaman Hərbi Hospitalın rəyi və aldığı ordenlər...

Jurnalist olaraq, dəqiq bilirəm ki, qazinin Hərbi Hospitala və ya Azərbaycanda fəaliyyətdə olan hər hansı ixtisaslaşdırılmış bir xəstəxanaya yerləşdirilməsi, “3 rəqəmli telefon xəttiylə” beş dəqiqəlik telefon danışığından asılıdır. Belə ki, deputat Elman Nəsirov səlahiyyətlərindən istifadə etməklə, anında onu müalicə üçün müalicə müəssisəsinə yatızdıra bilər. Dəlixanaya yox a, müalicə müəssisəsinə.

Dəlixana sözünü elə-belə yazmadım. Qazinin dediyinə görə, bir həftə öncə Cəlilabadın Mərkəzi Xəstəxanasının baş həkimi qazini, Elman Nəsirovun göstərişiylə, Lənkəranda yerləşən ruhi dispanserə göndərirmiş. Qazinin yaxınları səs-küy salaraq, qazinin dəli olmadığını, haqqını tələb etdiyini bildirib, ölkə rəhbərliyinə şikayət edəcəklərini söylədikdən sonra bu iyrənc əməldən əl çəkmişlər...

Elman Nəsirovun təhqirlərindən usanan qazi, artıq müalicə istəmir. Deyir heç olmasa, Vətən müharibəsində vuruşub, yaralanmağımı ələ salmasın. Çoxları yaxşı bilir ki, münaqişə davam edir və hələ də mənfur düşmənlərimiz Dağlıq Qarabağda təxribata hazırlaşırlar.

Əgər Fərid Abbasov kimi oğullara belə təhqirli, ögey münasibət göstərilsə, üçüncü savaşa kimlər gedəcək? Keçmiş döyüşçülərin acınacaqlı vəziyyətdə, ortalıqda qaldıqlarını görən gənclər döyüşə atılar? Fəridin hərbi formanı birdəfəlik çıxarıb atmalı olduğunu deyən Elman Nəsirovun qohum-əqrabaları görəsən nə əcəb o formadan geyinmirlər? Formaya “allergiyasl” olan Elman Nəsirov bilmir ki, o formaya şəhidlərimizin, qazilərimizin qızıl qanları tökülüb? O halda bu müqəddəs formadan imtina bu qədər asandırmı?

Inanıram ki, yuxarı dairələr Elman Nəsirova susmağı, danışdıqca batmamağı tövsiyə edəcək və qazi Fərid Abbasovun müalicəsi üçün, lazımi addımları atacaqlar.

Gundemxeber.Az