Azərbaycanın İnsan Haqları Klubunun sədri Rəsul Cəfərov Vaşinqtona səfəri zamanı keçirdiyi görüşlər barədə Amerikanın Səsinə müsahibə verib.
Söhbət zamanı cənab Cəfərov prezident seçkilərindən sonra ölkə insan haqlarının durumu barədə də danışıb. Onun sözlərinə görə, son 5-6 ildə Azərbaycanda insan haqları sistematik şəkildə pozulub.
"Turan" isə bildirir ki, cümə axşamı demokratiya müdafiəçilərindən ibarət bir qrup məktub göndərərək, Obama administrasiyasını “İlham Əliyev hökumətinə güvənməməyə” çağırıb.
“Turan”ın məlumatına görə, bu, Ağ Ev rəhbərinin məktubunun Azərbaycan prezidentinin saytında dərc edilməsindən bir neçə saat sonra baş verib. Məktubda ABŞ prezidenti I.Əliyevi üçüncü müddətə prezident vəzifəsinin icrasına başlaması münasibətilə təbrik edib.
“Bu təbriklər özü-özlüyündə problem əlamətidir. Təsəvvür edin ki, sizin doğum gününüzdür, amma kimsə sizi bir aydan sonra təbrik edir”, - deyə “Amerika Azərbaycanlıları Demokratiya Uğrunda” (AZAD) Cəmiyyətinin sədr müavini Qorxmaz Əsgərov bildirib.
AZAD yaranmış vəziyyət, həmçinin Azərbaycanda insan hüquqları və demokratiyanın pozulması ilə bağlı müzakirələr təşkil edib. Əsas məruzəçilər Insan Haqları Klubunun rəhbəri və “Art for democracy” layihəsinin koordinatoru Rəsul Cəfərov, bu layihənin direktoru Rebekka Vinsent, post-kommunist ölkələrinin demokratikləşməsi məsələləri üzrə tanınmış ekspert Irena Lasota olub.
AZAD-ın rəhbəri Elmar Şahtaxtinski və digər natiqlər tədbirdə çıxış edərək bildiriblər ki, Azərbaycanın gələcəyini azərbaycanlılar özləri həll edəcəklər. Lakin ölkədə vəziyyətin pisləşməsi Qərbi və ABŞ-ı demokratiya və insan hüquqları məsələsinin prioritetliyini etiraf etməyə məcbur edəcək.
Çıxışçılar bildiriblər ki, demokratiya ilə bağlı vəziyyətin pisləşməsi və korrupsiya ilə əlaqədar Azərbaycanın Qərbin stabil tərəfdaşı olması sual altında qalır.
“Azərbaycan özünü hər vəchlə etibarlı tərəfdaş kimi təqdim etməyə çalışır, amma belə deyil”, - deyə Rebekka Vinsent vurğulayıb.
“Azərbaycan BMT, Avropa Şurasına daxil olarkən və bir sıra beynəlxalq sənədləri ratifikasiya edərkən insan hüquqları sahəsində üzərinə götürdüyü öhdəliklərini yerinə yetirmir.
Azərbaycan hökuməti sistemli şəkildə insan hüquqlarını pozur, beynəlxalq tənqidlərə məhəl qoymur ki, bu da hakimiyyətin demokratik normaları və insan hüquqlarını təmin etməkdə maraqlı olmadığından xəbər verir" - bunu isə Rəsul Cəfərov qeyd edib.
Azərbaycanda söz azadlığının vəziyyətindən danışan Rebekka Vinsent bildirib ki, hökumət cəmiyyətdə özünüsenzura atmosferi yaratmaq məqsədilə ən müxtəlif addımlar atır. Xanım Vinsent xatırladıb ki, Azərbaycanda 140 siyasi məhbusdan 9-u jurnalist, biri bloggerdir: “Yeni tendensiya odur ki, artıq jurnalistləri öz işlərinə görə yox, xuliqanlığa, narkotik maddə saxlamaq, vergidən yayınmaq, terrorizm və s. ittihamlarla həbs edirlər. Bu da təqiblərin siyasi motivli olduğunu gizlətmək məqsədilə edilir.
Ilham Əliyev Azərbaycanı Türkmənistana çevirməyə çalışır. Məsələ də budur ki, Əliyevin Qərb ölkələrilə əməkdaşlığından nə gözləmək olar? Vaşinqton öz dəstəyini davam etdirməli və optimist olmalı, insanlarla daha yaradıcı əməkdaşlıq yolları tapmalıdır".
Çıxışlarda qeyd olunub ki, dövlət elektron mediaya tam nəzarət etdiyindən Internet yeganə ümid olaraq qalır, lakin bu sahədə də vəziyyət pisləşir.
“Hökumət tənqidi fikirlərini ifadə etmək üçün Internetdən istifadə edənləri cəzalandırmaq ənənəsini davam etdirir. Bütün bunlar belə deməyə əsas verir ki, dövlət başçısı ölkəni xalqın iradəsinə uyğun olaraq qanuni şəkildə idarə etdiyini bildirsə də, əslində, bu, belə deyil”, - deyə Qorxmaz Əsgərov vurğulayıb.
ABŞ-ın Azərbaycandakı keçmiş səfiri Riçard Kozlariç auditoriyaya müraciət edərək deyib ki, iqtisadi duruma daha çox diqqət yetirmək lazımdır, xüsusən sərvətin ədalətli bölgüsünə, iqtisadi islahatların vacibliyinə: “Prezidentin 85 faiz səslə seçildiyi rejimlər ”çox həssasdır". Azərbaycanın iqtisadi durumuna baxsaq, görərik ki, neft hasilatı azalır, rejim indiyədək əldə etdiyi gəlirlərlə yaşamağa adət etməli olacaq".